Pusuana 6
6
1Tuasia ciang Topa in Moses tungah, “Tu in kumpipa tungah ka sep tu te na mu tu hi. Ka mite a paisak natu in ka seam nanak tu hi. A tatakin ci leang a leitang pan ka mite a hawlkeak tu in ka sawl nanak tu hi,” ci hi.
Pathian in Moses Sam
2Pathian in Moses tungah, “Keima in Topa ka hi hi. #Pian 17:1; 28:3; 35:11; Pu 3:13-15 3A Vaanglianbel Pathian in Abraham, Isaac le Jacob tungah ka kilangh a, ahizong Topa ci in ka min thiangtho taw amate ka hesak bua hi. 4Ngamdangmite bangin a teenna Canaan ngam sia amate tung piak tu kamciam in amate taw thuciamna zongh ka vawt hi. 5Tu in Egypt te ii salin a mat Israel te tauna ka za zo a, ka thuciamna ka phawk hi. 6Tua ahiciang Israel te tungah, ‘Keima in Topa ka hi hi; Egypt te sal panin note kong hun tu a, kong suaktasak tu hi. A thahat ka khut laamin amate tungah a lauhuai daan ka tungsak tu a, note kong hun tu hi. 7Note keima mihing kong suaksak tu a, keima in note Pathian ka hi tu hi. Egypt saltanna pan kong suataksak ciang na Topa na Pathian ka hina nong he tu uh hi. 8Abraham, Isaac le Jacob tungah piak tu in ka ciamsa ngam ah kong paipui tu a; tua ngam sia note neisa tu in kong pia tu hi. Keima in Topa ka hi hi,’ ci in, son ta'n,” ci hi. 9Moses in Israel te tungah hi thu teng son a, ahizong amate in nadon ngawl uh hi, banghang ziam cile a sila tanna ah kivawtsia in a thin uh tamhtham zo hi.
10Tuasia ciang Topa in Moses tungah, 11“Egypt kumpipa kungah va pai ta'n a, Israel te na ngamsung pan pusuaksak hamtang in ci ta'n” ci hi.
12Ahizong Moses in, “Israel te ngawngawn zongh in ka thuson hong ngai ngawl tu ci leang bangbangin kumpipa in hong ngai tu ziam? Kampau thiam ngawl mama pa ka hi hi,” ci kik hi.
13 Topa in Moses le Aaron tungah: “Egypt ngam pan Israel te pusuana ah lampui tu in noma thu kong piak sia Israel te le Egypt kumpipa tungah son tavun.”
Moses le Aaron Innkuan Tepteena
14Jacob taciil Reuben in tapa li nei a: Hanoch, Pallu, Hezron, le Carmi hi a; amate min a putsak bee le phungte ii pianna taanghpupite ahi uh hi. 15Simeon in tapa luk nei a: Jemuel, Jamin, Ohad, Jachin, Zohar le Canaan numei khat taw a tapa Shaul hi; amate min a putsak bee le phungte ii pianna taanghpupite ahi uh hi. 16Levi in tapa thum nei a: Gershon, Kohath le Merari hi; amate min a putsak bee le phungte ii pianna taanghpupite ahi uh hi. Levi sia kum 137 nungta hi. #Mi 3:17-20; 26:57-58; 1 Khang 6:16-19 17Gershon in tapa nii nei in: Libni le Shimei hi a, amate in suan le paal tam mama nei hi. 18Kohath in tapa li nei a: Amram, Izhar, Hebron, le Uzziel ahi uh hi. Kohath kum 133 nungta hi. 19Merari in tapa nii nei a: Mahli le Mushi ahi hi. Hite sia Levi bee le phungte le a suan a paalte ahi hi.
20Amram in a pa suapuinu Jochebed teenpui in, Aaron le Moses nei hi. Amram sia kum 137 nungta hi. 21Izhar in tapa thum nei in: Korah, Nepheg, le Zichri ahi uh hi. 22Uzziel zongh in tapa thum nei a: Mishael, Elzaphan, le Sithri ahi hi.
23Aaron in Amminadab ii tanu, Nahshon ii suapuinu Elisheba teenpui a; Nadab, Abihu, Eleazar le Ithamar nei hi. 24Korah in tapa thum nei a: Assir, Elkanah le Abiasaph ahi hi; amate Korah bee le phung hong pianna taanghpupite ahi uh hi. 25Aaron ii tapa Eleazar in Putiel ii tanute khat teenpui in, Phinehas nei hi. Hite sia innkuan lutangte hi a, Levi minamte ii pianna bee le phungte ahi uh hi.
26Aaron le Moses tungah Topa in, “Israel minamte lampui in Egypt pan pusuapui vun,” ci in a sawl ahi hi. 27Amate sia Israel te suatak natu in, Egypt kumpipa tungah thusonte ahi uh hi.
Moses le Aaron tungah Topa ii Thupiak
28Egypt ngamsung Moses tungah Topa in thu a son lai in, 29ama in, “Keima in Topa ka hi hi. Kong son theampo Egypt kumpipa tungah son in,” ci hi.
30Ahizong Moses in, “Nong heak bangin kampau ka thiam bua hi; banghangin kumpipa in ka thuson hong ngai thong tu ziam?” ci in zo hi.
Currently Selected:
Pusuana 6: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
