Pusuana 5
5
Egypt Kumpipa Mai ah Moses le Aaron
1Tuaciang Moses le Aaron Egypt kumpipa kungah pai in, “Topa Israel te ii Pathian in, ‘Ka mite sennealngam ah kei zatak piakna poai khat a khaam thei natu in paisak in’ hong ci hi,” ci hi.
2Kumpipa in, “Topa sia akua ziam? Banghangin ama thu ngai in Israel te paisak tu khi ziam? Tua Topa ka he bua hi; Israel te ka paisak buatu hi,” ci hi.
3Moses le Aaron in, “Hebrew te Pathian sia kote tungah ama le ama hong kilangh zo hi. Topa ka Pathian tungah sangaw biakna pia tu in ni thum sung sennealngam ah hong paisak ta'n. Tuabang ka hi bua uh le ama in natna taw ahibuale ngal taw in kote hong thatlum tu hi,” ci in zo kik uh hi.
4Kumpipa in Moses le Aaron tungah, “Mipite in a nasep a nusiat natu in na vaihawm uh sia bang na cinopna uh ziam? Naseam tu in hi salte kuansak kik vun! 5Egypt te sangin no tam phazaw zo nu hi. Tu in a nasep tawlngasak nuam nu ziam!” ci hi.
6Tua ni ma in kumpipa in sal a uk Egypt te tung le Israel naseam ukte tungah thupia a: 7“Uksuang vawt natu in mihingte tungah taangphaw na piak uh tawlnga vun. Amate paisak in zongtawmsak vun. 8Ahizong uksuang nidang a den za ma, khat zongh kiam ngawlin deangsak vun. Amate in a sep khom tu nasep nei ngawl ahikom a Pathian tungah sangaw biakna pia tu in ka paisak natu hong ngen tan viuveu hi! 9Hi mite nasep haksa zaw seamsakin, komlasak vun, tua hile leilot thusonte ngai man ngawl tu hi,” ci hi.
10Sal ukte le Israel naseam ukte pai in Israel te tungah, “Kumpipa in taangphaw ka pia nawn buatu hi. 11Noma pai in na mutheina mun pawpo ah zongtawm tavun, ahihang uksuang na den ngeiza uh ma vawt tu nu hi hong ci hi,” ci uh hi. 12Tua ahiciang mite sia Egypt ngamsung theampo ah taangphaw zongin kuan uh hi. 13Sal ukte in taangphaw a kipiak lai a, uksuang a den ngeiza ma ni sim uksuang a den natu in sawl ngawp hi. 14Egypt mi sal ukte in nasepna uk tu in a koi Israel naseam ukte saat hi. Amate in “Nidang a uksuang na vawt za uh banghang vawt zo ngawl nu ziam?” ci hamtang uh hi.
15Tuasia ciang naseam ukte kumpipa kungah pai in, “Kumpipa awng, banghangin kote tungah hi bang hong vawt thong ni ziam? 16Taangphaw hong kipia ngawl hi, ahizong uksuang deang tu ma hong kisawl veve hi! Tu in ko hong kisaat hi. A khial sia na mite hi,” ci in a lungkim ngawlna teng son uh hi.
17Kumpipa in, “Note datham in na seam nuam ngawl nu hi, tua hangin Topa tungah sangaw biakna pia in pai tu hong ngen nu hi. 18Tu in na nasepna zuan kik tavun! Taangphaw hong kipia ngawl tu a, ahizong uksuang na den ngeiza ma deang veve tu nu hi,” ci in zo hi. 19Nidangin na den ngeiza ma ni simin na deang tu uh hi ci thu, naseam ukte in a heak ciang thinngim uh hi.
20Amate hong pusua ciang, amate a ngak Moses le Aaron taw kimu uh hi. 21Amate in Moses le Aaron tungah, “Na nasepnate uh Topa in hong mu zo hi, kumpipa le a uliante in kote hong ensansak na hi uh kom, daan hong pia tu hi. Kote hong thalup natu in a paulap tu khat a pia na hi uh hi,” ci uh hi.
Moses in Topa tung Lungkim ngawl
22Tuasia ciang Topa sangah Moses kiheak in, “Topa awng, na mite banghangin vawtsia ni ziam? Banghang hi sungah kei hong paisak ni ziam? 23Nangma atu thu son tu in kumpipa kung ka pai pan kipan amate vawtsia hi. Tua hi a, nangma in amate hu natu bangma na seam bua hi!” ci hi.
Currently Selected:
Pusuana 5: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
