Pusuana 27
27
Biaknatau
(Pusuana 38:1-7)
1“Acacia thing taw biaknatau khat vawt in. Tua in king li nei tu a, a sauna metre 2.2, a zaina metre 2.2, a saanna metre 1.3 hi tu hi. 2A king li dawn teng doksak in. Tua a dok teng biaknatau taw sakhat suak tu in, taau taw kituam siat tu hi. 3Sathau baang vut koi natu in bealpeute le kawkeaute, kuangte, thikkoaite le meikam luana daalpheakte vawt in. Hi nazakte theampo taau taw kivawt tu hi. 4Taau taw saaksai khat vawt in, a king li ah toai natu taaukual li koi in. 5Tua taau saaksai sia biaknatau ii a lang dong a bat natu in biaknatau bitha nuai ah koi in. 6A zawn natu Acacia thingpumte vawt in, taau taw tuam in. 7Biaknatau a kizawn ciang a panghte nii ah a om a kualte sungah thingpumte thun in. 8Mual tungah ngealna kong laksa bangin biaknatau sia thingpheak taw vawt in a, a sung vangsak in.
Topa ii Ompuina Puanbuk Doituam
(Pusuana 38:9-20)
9“Kong ompuina Puanbuk tu sia puanneal puankhaite taw doituam khat uum in. Thangsang pangh puankhaite sia metre 44 sau tu hi. 10Tua puan sia taau tawdap khat tek a nei taau khuam kul tungah na khak tu uh a, tua khuamte tungah ngunn taw a kivawt puankhainate le a zawlte om tu hi. 11Doituam ii saksang pangh zongh ah tuabang ma in vawt in. 12Nitumna sangah metre 22 a sau puankhaite, khuam sawm le a dap sawmte taw om tu hi. 13Nisuana sang, kongbiang omna ah a doituam zongh metre 22 zai tu hi. 14-15Kongbiang ii a pangh veve ah puankhaite metre 6.6 veu, khuam thum le a tawdap thumte taw om tu hi. 16A tumna kongbiang san ah vancii, a sandup, le a san samul taw a kitak thiamngelte taw a kizeam metre 9 a sau puanneal puankhai khat om tu hi. Tua in tawdap li taw a kiphut khuam li tungah kikhak tu hi. 17A kiimkot uumna khuam teng ngunnzawlte taw kizom a, vanh khainate ngunn taw a kivawt hi in a tawdapte taau taw a kivawt hi tu hi. 18A doituam sia metre 44 sau, metre 22 a zai le metre 2.2 a saang hi tu hi. Puankhaite puanneal taw kivawt tu a, a taw teng taau taw kivawt tu hi. 19Puanbuk atu a kizangh vanh theampo le puanbuk atu le a doituam tu in, a kizangh khetphin theampo taau taw kivawt tu hi.
Meivak Kepcingna
(Thiampite 24:1-4)
20“Nitak simin meiinn a kidet thei natu in olive thau phabelte nang kung hong puak natu in Israel mite thupia in. 21Kong ompuina Puanbuk sung, Thuciamna Thingkuang mai, puankhai pua sangah Aaron le a tapate in meiinn koi tu uh hi. Tua mun keima omna ah nitak pan zingsang dong mei de tu uh hi. Hi thupiak sia Israel te le a suan a paalte in a tawntung a zui tu uh ahi hi.
Currently Selected:
Pusuana 27: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
