Pusuana 17
17
Suangpi pan Tui
(Mi Simna 20:1-13)
1Israel mi bup in Sin sennealngam nusia in Topa thupiak bangin mun khat pan mun khat ah kikhiin uh hi. Rephidim ah ngiaphual saat a, ahizong tua munah neak tu tui om ngawl hi. #Mi 20:2-13 2Amate in Moses tungah, “Neak tu tui hong pia ta'n,” ci in phun uh hi.
Moses in, “Banghangin hong phunsan nu ziam? Banghangin Topa ze et nu ziam?” ci hi.
3Ahizong a mihingte dangko mama ahikom Moses tungah phuul veve uh hi. Amate in, “Banghang Egypt pan hong paipui ni ziam? Kote ka tate le ka ngannote dangko in hong thisak nuam ni ziam?” ci uh hi.
4Moses in nasia takin Topa tungah thungen in, “Hi mihingte bang law tu khi ziam? Suang taw hong deang dektak zo uh hi,” ci hi.
5 Topa in Moses tungah, “Israel lampuite pawlkhat samin a, mipite mai ah paikhol vun. Nile ngun na saatna ciangkhut keng in. 6Na mai Sinai Mual suangpi tungah ka ding tu hi. Suangpi saat in, tua hile mihingte neak tu tui hong pusuak tu hi,” ci hi. Israel lampuite mai ah tuabangin Moses in vawt hi.
7Tua mun sia Massah le Meribah ci hi, banghang ziam cile Israel te in phun in Topa ze et a, “Topa eite taw om ziam, hong ompui ngawl ziam?” ci in, a dokna mun ahi hi.
Amalek mite taw Kido
8Amalek mite hong pai in Rephidim ah Israel te sim uh hi. 9Moses in Joshua tungah, “Zing ciang Amalek mite a do tu in mi pawlkhat teal in. Kei sia mual dawnah ka ding tu a, Pathian ii keng a hong sawl ciangkhut ka toai tu hi,” ci hi. 10Moses thupiak bangin Joshua in Amalek mite do tu in a kuan hunsung in Moses, Aaron le Hur te mual dawnah kaato uh hi. 11Moses ii a khut a lap hunsung theampo Israel te in ngalzo a, ahizong a khut a khiaksuk ciang Amalek mite in zo tu in kipan uh hi. 12Moses ii khut a toi ciang Aaron le Hur in a to natu in suangtum khat laaksak in amate a lang le a lang ah dingin nitum dong a khutte lapsak uh hi. 13Hi bangin Joshua in Amalek mite zo siat hi.
14Tuaciang Topa in Moses tungah, “Hi ngalzawna thu teng a kiphaw natu in tepteena lai at in. Amalek mite ka mot natu thu Joshua tungah son in” ci hi. #Thkna 25:17-19; 1 Sa 15:2-9 15Moses in biaknatau khat sa a, a min phuakin, “Topa sia ka Zawna Dial hi “Jehovah Nissi” ci hi. 16Ama in, “Topa zawna dial saangkhai vun! Topa in Amalek mite a tawntungin do suak tu hi!” ci hi.
Currently Selected:
Pusuana 17: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
