Pusuana 16
16
Manna le Vamimte
1Israel mi buppi Elim pan ding kik a, Egypt pan a pusua zawk a tha niina, ni sawm le ni nga ni in Elim le Sinai kilaklaw Sin sennealngam theng uh hi. 2Tua sennealngam ah amate theampo in Moses le Aaron phunsan a, 3amate tungah, “Topa in Egypt ah hong that le uuk zaw ung. Tualai ah thildang a vaal lai, to in sa le an ka du za ka ne thei tu uh hi. Ahizong noma in hi lai sennealngam ah a pukthi tu in hong paipui nu hi,” ci uh hi.
4 Topa in Moses tungah, “Tu in note theampo atu van pan an, ngua bangin kong zusak tu hi. Mihingte ni sim pusuak nanak in tua ni a khamkhop tu tawm tu hi. Tuabangin, kong sonnate a zui ziam, ka sit thei tu hi. #Jn 6:31 5Ni luk ni in, na top ngeiza ii a zaa nii kaikhawm tu in kinging vun,” ci hi.
6Tua ahiciang Moses le Aaron in Israel te theampo tungah, “Egypt pan hong pusuapuipa sia Topa a hina, tu nitakin he tu nu hi. 7Zingsang ciangin Topa ii ompuina khuavak taang velvol mu tu nu hi. Ama langpanin noma phutsatna thu hong za zo hi — hi hi, ama langpan nu hi, banghang ziam cile kote in ama hong sawlna teng a seam suak ka hi bek uh hi,” ci hi. 8Tua zawkciang Moses in, “Noma phutsatna teng ama in hong za zo ahikom, nitakin na neak tu uh sa le zingsangin anluum na deiza po hong pia tu sia Topa ahi hi. Ko nong phutsat uh ciang Topa a phunsan hi nginge nu hi,” ci hi.
9Moses in Aaron tungah, “Topa in amate phutsatna za zo ahikom taangpi bup hong pai in Topa mai ah a din natu in son ta'n,” ci hi. 10Aaron in taangpi bup tungah thu a son ciang amate sennealngam sang nga in, thakhat thu in meei sung pan Topa ii khuavak taang velvol hong taang hi. 11Topa in Moses tungah, 12“Israel te hong phutsatna ka za zo hi. Khuangial ciang a neak tu sa a nga natu, zingsang ciang anluum a deiza a nga natu son in. Tuasia ciang Keima sia Topa, amate ii Pathian ka hina thu he tu uh hi,” ci hi.
13Nitak ciangin ngiaphual a dim tu vamim honpui khat hong leangin, zingsang in ngiaphual kiimkot ah daaitui kia hi. 14Daaitui a ko ciang senneal tungah a khalno bang veu om hi. Tua in nip a, vuuk taw kibang hi. 15Israel te in tuasia a mu ciang he ngawl ahikom khat le khat kidongh in “Hisia bangziam?” ci uh hi.
Moses in amate tungah, “Hisia in Topa ii note neak tu in hong piak an ahi hi. #1 Cor 10:3 16Topa in noma kisap za tek, innkuan sungah mihing sim litre 2 tek na top tu in thu hong pia zo hi,” ci hi.
17Israel te in tuabang vawt a, pawlkhat in a tamzaw tawmin, pawlkhat in a tawmzaw tawm uh hi. 18Amate in a tee uh ciang tam a tawmte tam leih ngawlin, tawm zaw a tawmte tawm leih tuan ngawl hi. Amate ii kisap za lian tek tawm uh hi. #2 Cor 8:15 19Moses in amate tungah, “Kuama in zing ciang atu bangma koikhol ngawl tu nu hi,” ci hi. 20Ahizong pawlkhat in Moses thu ngai ngawlin pawlkhat koikhol uh hi. A zing ciang tuasia thanh dimin muat nam a, amate tungah Moses thin uuk hi. 21Zing simin a kisap za tek tawm a, ni hong sat ciang lei ah a nusiatte tuitham hi.
22Ni luk ni in an a zaa nii in a tamzaw tawmin, mihing khat ciang litre 4 tek tawm uh hi. Taangpi lampuite theampo hong pai in tua thu Moses tungah son uh hi, 23Moses in amate tungah, “Topa in zing ciang sia ama tungah a ki aap tawlngakna ni thiangtho ni khat hi, ci in thu hong pia hi. Tuni in na em nop teng le na huan nop teng em in huan tavun. A taanglai teng peuma zing ciang atu in koituam vun,” ci hi. #Pu 20:8-11 24Moses ii thupiak bangin a om lai teng zing ciang dongin keam a; lal ngawl, a sungah thanh tu ngawl hi. 25Moses in, “Hite tuni in ne vun, banghang ziam cile tuni sia Sabbath hi a, Topa tungah a ki aap tawlngakna ni khat hi in, ngiaphual pua sangah an bangma mu ngawl tu nu hi. 26Ni luk sung an na tawm nanak tu uh a, ahizong ni sali ni, tawlngak ni in bangma om ngawl tu hi,” ci hi.
27Ni sali ni in mihing pawlkhatte in an a tawm tu in pusuak a, ahizong bangma mu ngawl uh hi. 28Tuaciang Topa in Moses tungah, “Banghun dong ka thupiakte note in hong nial lai tu nu ziam? 29Tawlngak ni hong pia pa sia keima Topa ka hina phawk tavun a, tua ahi hu in ni nii sung na khom tu uh an, ni luk ni in kong pia tawntung tu hi. Ni sali ni in a kuama po a omna munah om tu a, inn pan pusuak ngawl tu hi,” ci hi. 30Tua ahiciang mite in ni sali ni in naseam ngawl uh hi.
31Israel mite in tua an sia manna ci uh hi. Tua manna sia ancii kaang no khat taw kibangin, khuaitui taw kivawt moh bangin lim hi. #Mi 11:7-8 32Moses in, “Ama ii Egypt pan eite hong paipui ciangin sennealngam ah eite neak tu hong piak an sia ih suan ih paalte in a mu thei natu in manna pawlkhat amate atu na keam tuam tu uh hi, ci in Topa in thu hong pia hi,” ci hi. 33Moses in Aaron tungah, “Beal khat la in, tua ii sungah manna litre 2 dim koi in a, ih suan ih paalte atu in Topa ompuina ah koi ta'n,” ci hi. #Heb 9:4 34Topa in Moses tungah a thupiak bangin tuasia a kikepcing natu in Aaron in Thuciamna Thingkuang mai ah koi hi. 35Israel te in a teenna mun Canaan ngam a thet mateng kum sawmli sung manna an ne uh hi. #Jos 5:12 36(Tua hun lai, na ko teena in a zak sia litre 20 taw kikim hi.)
Currently Selected:
Pusuana 16: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
