Amakorwa ga Abhatumwa 16

Pauro aramugega Timoteo

1Pauro akahika mumigi gya Deribhe, na Rustira. Rustira eyo, yaaringa-yo omwikirirya umwi wa Yeesu. Omwikirirya uyo, yaabhirikirwanga Timoteo. Ngʼina waabho yaaringa Omuyahudi na yaaringa amwikiriirye Yeesu. Nawe, esewaabho yaaringa Omuyunani. 2Timoteo yaaringa aragungibhwa bhukongʼu gati ya abheekirirya abharikyaye bha Rustira na Ikonio eyo. 3Pauro akeenda ega, bhagendanʼyenga hamwi, kurugendo na Timoteo na Siira. Nawe, Abhayahudi bhonsego bha eyo, bhaaringa bhamanyiri ega, esewaabho m-Muyunani. Kwa ego, Pauro akaamura ega, Timoteo asaarwe, naho bhamwikirirye. 4Mbe, Pauro na abharikyaye bhayo, hanú bhaaringa bharahita mumigi girya, bhakabha bharabhahaana abheekirirya, amaragiriryo ganú gaamurwa na abhatumwa na abhakangati bha erikanisa rya mumugi gwa Yerusaremu, naho bhagagwate. 5Ego, niigo abheekirirya bha eyo, bhaagendererya okukongʼa kuimani. Na erisaabhu rya abheekirirya ryaaruhanga kira orusiku.

Obhurori bhwa Pauro eguru ya omuntu wa Makedonia

6Pauro na abharikyaye bhayo, bhaaringa bhakaaniibhwe na Omutima Omurabhu ega, bhatige okwihigirya eringʼana rya Waryubha mukyaro kya Asia. Kwa ego, bhakahita mubhyaro bhya Furigia na Garatia. 7Hanú bhaahika kurutunga rwa ekyaro kya Misia, bhakasakya okusoha mukyaro kya Bhitunia, nawe, Omutima wa Yeesu#16:7 Omutima wa Yeesu. Omutima wa Yeesu ngʼo Omutima wa Waryubha, kasi Omutima Omurabhu. ataabheekirirya. 8Kwa ego, bhakahita Misia, bhakagya mumugi gwa Turoa. 9Hanú bhaahika eyo, obhutiku Pauro akeebhukirwa na obhurori. Mubhurori bhuyo, yaarora omuntu umwi yeemiriiri mukyaro kya Makedonia, aramukomererya bhukongʼu ega, “Yambuka enyanja, uuje Makedonia enu, otubheere!” 10Mbe, Pauro hanú yaamara okurora obhurori bhuyo, rumwigo, tukeeseemya#16:10 Tukeeseemya. Omugambi wa amangʼana ganu, yaaringa hamwi na Pauro, Timoteo, na Siira, nkyo kirakora aragamba ega, tukeeseemya. okugya Makedonia eyo, kwa okubha twarora ega, heene Waryubha atubhirikiiri turaarike Amangʼana Amajomu kubhantu bha eyo.

Ridia aramwikirirya Yeesu

11Mbe, tukarwa Turoa hayo kwa obhwato, tukagya kimwikimwi okuhikira kwiginga kinú kyabhirikirwanga, Samotirake. Hanú bhwakya, tukagya tukahika mumugi gwa Neapori. 12Okurwa eyo, tukagya okuhikira mumugi gwa Firipi,#16:12 Firipi. Omugi gwa Firipi, gwaringa omugi gunú guratungwa okuringʼaana na amaragiriryo ga Ekiruumi. Abhamenyi abhaaru bhaaringa Abharuumi. omugi omunene mukyaro kya Makedonia, na ngo omugi gunú Abharuumi bhaaringa bhamenyeri. Mbe, bheetu tukeekara mumugi guyo, kwa eginsiku nkego.

13Orusiku rwa Esabhato, tukagya kibhara wa omugi guyo, embarika wa oruuji, kwa okubha twakanyanga ega, tukaanyooreri ahasi ha okusabhira. Tukeekara, tukaamba okuhaira na abhakari bhanú bhaaringa bheekumeenʼye hayo. 14Gati ya bhanú bhaaringa bharatwitegeerera, yaaringa m-mukari umwi, wa mumugi gwa Tiatira, eriina ryaye yaabhirikirwanga Ridia. Ridia uyo, yaaringa omugurya wa emyenda emijomu gya erangi ya jambaraawe, na yaaringa Omuyunani unú aramwigwa Waryubha. Pauro hanú yaabhakeerya Amangʼana Amajomu eguru ya Yeesu, Omukuru Waryubha, akaseemya omutima gwa Ridia, okuhikira akeekirirya ameehigiryo ga Pauro. 15Hanú yeekirirya, akabhatiijwa, weeki hamwi na abhantu bha iika owaaye. Wonse akatukomererya bhukongʼu ega, “Nyoore muruuji ega, heene oni ndamwikirirya Omukuru Yeesu, mugenihe owaani mwikare.” Akatukomererya bhukongʼu ega, tugende owaaye.

Pauro na Siira bharingi mwigereja

16Orusiku rumwi, eribhaga twagyanga ahasi ha okusabhira harya, tukasikana na omugaya umwi wa ekihara. Omugaya uyo, yaaringa na ekihwi ekibhiibhi. Ekihwi kiyo, kyamuhaananga obhuturo bhwa okumanya amangʼana ganú garaaja okwibhuka embere. Okuhitira obhuraguri bhwaye bhuyo, abhakuru bhaaye bhaanyooranga egimbirya eginjaru. 17Omuhara uyo, akabha aramuseeta Pauro na bheetu, enu aratema ekituri ega, “Abhantu bhanu, m-bagaya bha Waryubha wa eguru ya bhyonsego. Bheeki bharabharaarikira kya ego muratura okutuuribhwa!” 18Omuhara uyo, yaagendererya okukora ego, eginsiku eginjaru. Nawe, Pauro akajima bhukongʼu. Akeekyukya enyuma na okukeerya ekihwi kirya ega, “Ndakukeerya kwa eriina rya Yeesu Kiristu orwe kumuhara unu!” Hayohayo, ekihwi kiyo kikamurwa-ko.

19Mbe, abhakuru bha omuhara uyo, hanú bhaarora ega, bhataana enjira eindi ya okunyoora egimbirya, bhakabhagwata Pauro na Siira bhakabhangʼuura okuhikira mwibharaja embere ya abhatungi bha omugi. 20Hanú bhaabhahikya kubhabhuturi bha ekiina, bhakabhajongera ega, “Abhasaaja bhanu, m-Bayahudi, bharareeta eriihe mumugi gwetu. 21Kweki bharatwihigirya amangʼana ga egimiira ginú kubheetu Abharuumi, tutakwenderwa okugiikirirya na okugigwata.”

22Rumwigo, omuganda gwa abhantu bhanú bhaaringa bheekumeenʼye hayo, bhakagya kwa enkoro okubharwanʼya Pauro na Siira. Abhabhuturi bha ekiina bharya bhakabharuusya emyenda gyabho kwa eginguru, bhakaamura ega, bhatemwe bhururu. 23Na hanú bhaamara okubhatema bhururu, bhakabhatuura mwigereja, kimwi bhakamukeerya omusirikare omukuru wa erigereja ega, abhaangararire bhujomu. 24Omukuru wa erigereja wonse, akaamurwa ega, abhatuure mukinyumba kya munsi na akabhabhoha amaguru gaabho mujeeki.

25Mbe, mubhutiku gati, Pauro na Siira bhakabha bharamusabha Waryubha na okumwimbira ameembo ga okumugungya. Abhabhohwa abharikyabho bheeki, bhaaringa bharabheetegeerera. 26Rumwigo, ekirigiti ekinene bhukongʼu kikeebhuka, kora obhurusa bhwa erigereja bhukasingisa. Hayohayo, ebhiseku bhya erigereja bhikasiikuka na eminyororo ginú gyaringa gibhoheri kira oumwi gikasibhuka. 27Omukuru wa erigereja urya, akabhambuka. Hanú yaarora ebhiseku bhya erigereja bhisiikwirwe, akasomora empanga yaaye, akeenda okwiyita, kwa okubha yaakanyanga ega, abhabhohwa bhonsego bhatorokeri. 28Nawe, Pauro akakora ekituri kwa eriisi erinene ega, “Oteeyita! Bhonsego turingi munu!” 29Hayo, omukuru wa erigereja uyo, akatuma egikorobhoi gireetwe. Hanú gyareetwa, akasoha mwigereja muyo, akatema ebhiru embere ya Pauro na Siira enu ararigita.

30Kimwi akabhahira kibhara, akabhabhuurya ega, “Abhakuru bhaani, ndeenderwa nkore egaki naho ntuuribhwe?” 31Bhakamukyukya ega, “Omwikirirye Omukuru Yeesu, uuwe na abhantu bhanú bharingi iika owaaho, nho murituuribhwa.” 32Mbe, Pauro na Siira bhakamwihigirya eringʼana eguru ya Omukuru Yeesu, weeki hamwi na abhantu bhonsego bhanú bhaaringa iika owaaye. 33Eribhaga riryarirya obhutiku, omukuru wa erigereja uyo, akabhagega akabhoogya ebhironda bhyabho. Kimwi akabhatiijwa weeki na abhantu bhaaye bhonsego. 34Hanú yaamara, akabhahira iika owaaye, akabhakorera ebhyakurya. Akajomerwa bhukongʼu hamwi na abhahiiri bhaaye bhayo bhonsego, kwa okubha amwikiriirye Waryubha.

35Hanú bhwakya, abhabhuturi bha ekiina bharya, bhakabhatuma abhakuru bha abhasirikare kumukuru wa erigereja, bhamukeerye ega, “Bhasibhure abhantu bharya obhahaatire bhagye gyabho.” 36Omukuru wa erigereja uyo, hanú yaakeeribhwa ego, akamukeerya Pauro ega, “Abhabhuturi bha ekiina bhantumiiri abhantu ega, mbasiikurire. Bhoono muhuruke kibhara, mugende na omurembe.”

37Mbe, Pauro akakeerya abhakuru bha abhasirikare bharya ega, “Ndeegwa abhabhuturi bha ekiina bhayo bhatutemeri bhururu bhukongʼu embere ya abhantu bira okutubhuturira ekiina, na bheetu m-Baruumi! Bhakatutuura mwigereja. Bhoono, bhareenda okuturuusya munu bhugunyi? Tiigo! Bhaaje abheene bhaturuusye mwigereja munu.” 38Abhakuru bha abhasirikare bhayo, bhakahunjuka bhakakeerya abhabhuturi bha ekiina bharya amangʼana gayo. Mbe, hanú bheegwa ega, Pauro na Siira m-Baruumi, bhakoobhoha bhukongʼu. 39Kwa ego, bhakagya okubheesasaama, bhakabharuusya mwigereja, kimwi bhakabhasabha bharwe mumugi gurya.

40Pauro na Siira, hanú bhaarwa mwigereja, bhakagya owa Ridia, bhakeekumanʼya hayo na abheekirirya abharikyabho, bhakabhateremya, nho bhakeemuka.

Currently Selected:

Amakorwa ga Abhatumwa 16: Kabwa

Highlight

Copy

Compare