Amakorwa ga Abhatumwa 15

Ekiikaro eguru ya abheekirirya bhanú bhataringi Abhayahudi

1Abhantu nyabhurebhe bhakarwa mukyaro kya Yudea, bhakahiringitira mumugi gwa Antiokia. Bhakaamba okwihigirya abheekirirya ega, “Nyoore mutaasaarwe, okuringʼaana na amaragiriryo ganú twatigirwa na Musa,#15:1 Musa. Maaha eringʼana rinu mu Moonjooro eguru ya Amangʼana Amakongʼu. mutaatuuribhwe.” 2Eringʼana riyo ryakora Pauro na Bharinabha bhahakaananʼye na abhantu bhayo, okuhikira bhakabha abharuru bhukongʼu. Kubhuteero, abheekirirya bhakaamura ega, Pauro na Bharinabha hamwi na abhandi gati yaabho bhariine okugya mumugi gwa Yerusaremu, okusabha obhutongeri kubhatumwa bha Yeesu, na abhakangati bha erikanisa. 3Kwa ego, abheekirirya bha Antiokia bhayo, bhakabharaga. Kimwi, Pauro na abharikyaye, bhakahita mubhyaro bhya Foinike, na Samaria, bhakabha bharakeerya abheekirirya bha eyo, kya ego bhanú bhataringi Abhayahudi bhonse, bhaamwihunjurira Waryubha. Amangʼana gayo, gakabhajomera bhukongʼu abheekirirya abharikyabho bhonsego.

4Pauro na abharikyaye bhayo, hanú bhaahika mumugi gwa Yerusaremu, bhakagenihibhwa bhujomu na abhatumwa bha Yeesu, abhakangati bha erikanisa hamwi na abhantu abhandi bha erikanisa. Kimwi, Pauro na abharikyaye, bhakaamba okubhatondera gonsego ganú Waryubha yaakora okuhitira kubheeki. 5Nho, gati ya abheekirirya bha Yeesu bha mumuganda gwa Abhafarisaayo,#15:5 Abhafarisaayo. Maaha eringʼana rinu mu Moonjooro eguru ya Amangʼana Amakongʼu. bhakeemirira, bhakagamba ega, “Abhantu bhanú bhataringi Abhayahudi, bhonse bhareenderwa bhasaarwe, na bhakeeribhwe ega, bhabhenga bharagwata amaragiriryo gonsego ga Musa.”

6Mbe, abhatumwa bha Yeesu na abhakangati bha erikanisa bhayo, bhakakora ekiikaro, naho bheekomye bhujomu eringʼana riyo. 7Hanú ryahwa eribhaga eritambi, bhakyahakaananʼya, Petero akeemirira, akabhakeerya ega, “Bheenyu abhahiiri bhaani kuimani, mumanyiri ega, Waryubha yaansora oni gati yeenyu okurwa kubhwambiro, naho kwa omunwa gwani, abhantu bhanú bhataringi Abhayahudi bheegwe Amangʼana gaaye Amajomu, okuhikira bhamwikirirye. 8Waryubha ngʼo amanyiri gonsego ganú garingi mumitima gya abhantu. Yoorokya ega, bhanú bhataringi Abhayahudi bhonse, abheekiriirye, kwa okubhahaana Omutima Omurabhu, kya ego yaatuhaana bheetu. 9Waryubha ataatuura-ho ekisorooro gati yeetu na bheeki, kwa okubha bhonse yaabharaama emitima gyabho, kwa enjira ya okumwikirirya Yeesu. 10Mbe! N-kwaki muramusakya Waryubha, kwa okubhagegya abheekirirya bhayo omujigo omurito kya ejeeki, enu bheetu abheene guratutama? Kora na bhajaaji weetu, bhonse gwabhatama! 11Bheetu tureekirirya ega, turatuuribhwa kwa eriruguto rya Omukuru weetu Yeesu omwenego. Na egoego abheene bhonse bharituuribhwa kwa eriruguto riyo.”

12Mbe, abhantu bhonsego bhanú bhaaringa kukiikaro hayo, bhakakira kiri. Bharinabha na Pauro, bhakabha bharabhakeerya kya ego Waryubha yaabhatumira okukora ebhimanyiiriryo na ebhiruguuryo, kubhantu bhanú bhataringi Abhayahudi. 13Hanú bhaamara okuhaira, Yakobho wonse, akagamba ega, “Abhahiiri bhaani kuimani, munyitegeerere. 14Simoni amariri okutukeerya kya ego Waryubha yaanyankira abhantu bhanú bhataringi Abhayahudi, naho okusora abhandi gati yaabho, bhonse bhabhe abhantu bhaaye. 15Amangʼana gayo, n-kya amangʼana ga Waryubha, ganú gaangʼoorwa na abharooti ega,

16‘Hanú amangʼana gayo garihwa, ndihunjuka,

nhagaaje bhuhya enyumba ya Daudi, inú yaahaanyuka.

Ndihagaaja enyumba iyo, na okuiimirirya kweki.

17Ego, abhantu bhanú bhataringi Abhayahudi bhonsego bharintuna,

bhonsego bhanú naabhirikira, bhabhe abhantu bhaani.

18Omukuru Waryubha, yaakeerya abhantu eringʼana rinu okurwa akare.’#15:16-18 Maaha mukitabho kya Amosi 9:11-12.”

19Yakobho akagendererya okugamba ega, “N-kwa ekisigo kinu, oni ndarora ega, etakwenderwa tubhanyankye abhantu bhanú bhataringi Abhayahudi, bhanú bharamwihunjurira Waryubha. 20Nawe, tureenderwa tubhangʼoorere enyarubha ya okubhakeerya ega, bhatarya ebhyakurya bhya omugiro bhinú bhimwenseerwe ebhisusano na bhatigenga okukora obhusimbe. Kweki bhatige okurya enyama ya entugo inú ebhuutirwe na bhatige okurya amanyinga. 21Okurwa akare hayo, amaragiriryo ga Musa gaabha gareehigiribhwa kira omugi, na gaabha garasomwa mumasinagogi ga Abhayahudi kira orusiku rwa Esabhato.”

Enyarubha kubheekirirya bhanú bhataringi Abhayahudi

22Kimwi, abhatumwa bha Yeesu, abhakangati bha erikanisa hamwi na abheekirirya abhandi bhonsego bha mumugi gwa Yerusaremu hayo, bhakaamura okusora abhantu nyabhurebhe gati yaabho, na okubhatuma mumugi gwa Antiokia hamwi na Pauro na Bharinabha. Mbe, bhakabhasora Yuda unú eriina erindi yaabhirikirwanga Bharisabha, hamwi na Siira. Abhasaaja abhabhiri bhayo, bhaaringa abhakuru gati ya abheekirirya. 23Hanú bhaamara, bhakabhahaana enyarubha. Enyarubha iyo, yaagambanga ega,

“Bheetu abhatumwa hamwi na abhakangati bha erikanisa, bheetu abheekirirya abharikyenyu, turabhakeeranʼya bheenyu bhanú mutaringi Abhayahudi, bheenyu bha mumugi gwa Antiokia, na mubhyaro bhya Siria na Kirikia. 24Twigwiri ega, abharikyetu bhaaja eyo, okurwa enu, bhakabhanyankya kwa amangʼana gaabho, mukoobhoha. Nawe, bheetu tutaabhatuma. 25Kwa ego, twamwiri kwa hamwi, okubhasora abhantu nyabhurebhe na okubhatuma eyo, bhaaje hamwi na abhahanje bheetu, Bharinabha na Pauro. 26Abhabhiri bhayo, bhaaruusya obhuhoru bhwabho, kurusumo rwa okumukorera emirimu Omukuru weetu Yeesu Kiristu. 27Kwa ego, bhanú tutumiri kubheenyu, m-ba Yuda na Siira. Bheeki mbo bharaabhoonjoorere amangʼana ganú tubhangʼooreeri. 28Mbe, Omutima Omurabhu na bheetu, turuuji m-bujomu ega, tutige okubheetiikya omujigo ogundi omurito, okukira amangʼana amakuru ganu. 29Mutige okurya ebhyakurya bhinú bhimwenseerwe ebhisusano, mutige okurya amanyinga, kora mutige okurya enyama ya entugo inú ebhuutirwe, na mutige okukora obhusimbe. Nyoore muraatige gayo, nho muraabhe mukoreri bhwaheene. Turabhakeeranʼya.”

30Ego bhakaraga, bhakahiringita okugya mumugi gwa Antiokia. Hanú bhaahika, bhakakumanʼya abheekirirya bhonsego, bhakabhahaana enyarubha iyo. 31Bhonse hanú bhaamara okuisoma, bhakajomerwa bhukongʼu, kwa amangʼana gayo ga okubhateremya. 32Yuda na Siira bhaaringa abharooti, bhakabhakeerya abheekirirya abharikyabho amangʼana amaaru ga okubhateremya, na okunagya eimani yaabho. 33Hanú bhaamara okwikara Antiokia eyo, kwa eribhaga nyabhurebhe, abheekirirya bha muyo, bhakabheekiririrya bhahinde na omurembe, kubhanú bhaaringa bhabhatumiri. [34Nawe, Siira weeki akarora ega, m-bujomu asaage eyo.]#15:34 Amangʼana mumabhano ganu […] gataringi mumangʼoore agandi ga akare aga Ekiyunani. 35Pauro na Bharinabha bhonse, bhakasaaga Antiokia eyo. Bheeki, hamwi na abhantu abhandi abhaaru, bhakabha bhararaarika na bhareehigirya abhantu eringʼana eguru ya Omukuru Yeesu.

Pauro na Bharinabha bharaahukana

36Eginsiku nkego hanú gyahita, Pauro akamukeerya Bharinabha ega, “Tuhinde tubhataarire abhantu mumigi gyonsego ginú tweehigiryanga eringʼana eguru ya Omukuru Yeesu, naho tubhe tureekomya amagendereryo ga abheekirirya abharikyetu.” 37Kurugendo ruyo, Bharinabha yaaringa areenda ega, bhagye hamwi na Yoana unú eriina erindi yaabhirikirwanga Mariko. 38Nawe, Pauro yaarora ega, etaringi bhujomu bhagye hamwi na Mariko, kwa okubha yaaringa abhatigiri mukyaro kya Pamufiria, na yaaringa yaangiri okugendererya okukora emirimu hamwi nabho. 39Mbe, Pauro na Bharinabha bhakahakaananʼya bhukongʼu eguru ya okugya na Mariko uyo. Kwa ego, bhakaahukana. Bharinabha akamugega Mariko uyo, bhakagya hamwi kwa obhwato kwiginga rya Kipuro. 40Pauro wonse, akamugega Siira. Hanú abheekirirya bhaamara okubhasabhira eriruguto rya Omukuru Yeesu, akeemuka-ho. 41Akahitira mubhyaro bhya Siria na Kirikia, akabha arateremya abhantu bha amakanisa ga eyo.

Currently Selected:

Amakorwa ga Abhatumwa 15: Kabwa

Highlight

Copy

Compare