रोमियों 9
9
पौरमेशवर कै चोणेयौंदे लोग
1-3ऐबै किछै बै आमु पौरमेशवर कै प्यार शै जौई ना कौरे सौकौ, तौ इस्राएली लोग, पौरमेशवर शै दूर किथु औसौ? मैरै दिल दा तिनु कारिए बैजाए दुख औसौ, औरौ हमैशा मैरै दिल दी तिनु कारिए पीड़ो औसौ। सौथीखै, आपणै ही लोगौ कै उध्दार कै खातिर, हांव आपी पांदी आरोप लाणौ औरौ मसीह शै जौई हौणौ कारिए तैयार औसौ। मोऐं मसीह कै गवाह मानैयौ साचौ बौल़ै लो। पवित्र आत्मा औरौ विवेक बै गवाहै दैंव कै सौबै बातौ झूठी ना आथी। 4सै पौरमेशवर कै लोग औसौ; पौरमेशवरे तिनु आपणै नानड़िया बाणै औरौ तिनु कारिए आपणै महिमा कै प्रकट कौरे; तिनकै साथै आपणै कौरार बानै औरौ तिनु मूसा कै कानून दियै; ताकि सै साची तरीकै शै पौरमेशवर कै आराधना कौरौ; तिनुकै पौरमेशवर कै प्रतिज्ञाएँ भैटी रौई। 5अब्राहम, इसहाक औरौ याकूब तिनकै पुराणिया औसौ, जू यीशु मसीह कै पुराणिया बै थिए। पौरमेशवर, जू सौबी पांदी राज कौरौ, तैसकै तारीफ हमैशा हौंदै रौंव। आमीन।
इस्राएल कै मना कौरणा औरौ पौरमेशवर का मकसद
6पौरौ ऐजौ नी, कै पौरमेशवर आपणै वादा राखणौ दा नाकाम रौए रौआ, पौरौ इथकारिए कै सौब इस्राएल देश कै वंश सौथी कै इस्राएली ना आथी; 7अब्राहम कै वंश दै जन्म लोणो शै ही सौबै लोग पौरमेशवर कै संतान ना बौणौ, जिथुकै पौरमेशवरे अब्राहम कै बौल़ौ, “जू इसहाक कै वंश दै जन्म लोंव, सैजैई तैरै वंशज मानै जांदै।”
8यानी जू वंश कुदरत कै हिसाब शै जन्म लोंव सैजै पौरमेशवर कै संतान ना आथी, सिरफ वादै कै संतान ही अब्राहम कै संतान मानै जांदै। 9जिथुकै प्रतिज्ञा का वचन ऐजा औसौ, “आगली साल हांव ऐसी सौमय औटेयौ आन्दा औरौ तोबै सारा कै ऐक बैटा पौयदा हौला।”
10औरौ सिरफ ऐजौई नी, पौरौ रिबका कै पेटो पौरैशा अमारै पुराणिया इसहाक लैई होल़किणु हौ, तौलौ तियौंकै पेटो दै जुड़वा नानड़िया थिए। 11-12तिनकै पौयदा हौणौ शै आगैई तिनुऐ ना तौ आछौ औरौ ना बुरु कौरे रैई थी पौरौ पौरमेशवरे रिबका कै आगैई बौल़ै राए थियु कै तैरा बौड़ा बैटा नानड़ै कै सेवा कौरदा। प्रभुए ऐजौ दिखाणौ कारिए बौल़ौ कै सै आपणी पसंद खुद बाणौ औरौ ऐजौ कोसी बै काम की बौजैह शै ना थी जू तिनुऐ कौरौ। 13ऐजौ ठीक तैशैखैई औसौ जैशै पवित्र शास्त्र दो लैखै राए, “मोऐं याकूब आरी प्यार कौरा, पौरौ एसाव कै प्यार ना कौरी।”
इस्राएल देश कै मना कौरणा औरौ पौरमेशवर का न्याय
14तौ आमै इनु बातौ कै बारै मुंजी का बुलू? का पौरमेशवर अन्यायी औसौ जौल़ौ सै चांव तिनु चुणो? ना! बिल्कुल नी! 15जिथुकै पौरमेशवर मूसा कै बौल़ौ, “हांव जैसी कोसी पांदी दया कौरणै चोऊं, तैसी पांदी दया कौरदा, औरौ जैसी कोसी पांदी कृपा कौरणै चोऊं तैसी पांदी कृपा कौरदा।” 16इथकारिए पौरमेशवर सैजा आदमी चुणदा, जैसी पांदी सै दया दिखाणौ का फोयसला लोंव; पौरमेशवर कै पसंद इयौं बातौ कै भरोशै ना रौंव कै लोग का चांव या का कौरणौ कै कौचिश कौरौ।
17जिथुकै पवित्र शास्त्र दो प्रभुए मिस्र देश कै राजा फिरौन कै बौल़ौ, “मोऐं ताखै राजा चोणे राए, कै तांव दी आपणै अनौखी शौकतै दिखोऊ, औरौ मैरै नांव का प्रचार इयौं दुनिया कै सौबी लोगौ पांदी हौंव।” 18तौ बै, सै जैसी पांदी चांव, तैसी पांदी दया कौरौ; औरौ जैसी चांव तैसी हठीला बाणै दैंव।
19तोबै किछै लोग मुखै बौलदै जै ऐशै औसौ, तौ पौरमेशवर कैशै बौल़ै सौकौ कै आमै गौलत औसौ? जिथुकै पौरमेशवर जू चांव सैजौ कौरणौ शै कुणिए ना रौकै सौकौ। 20ओए रै भाईयों आमै आदमै, कुण औसौ, जू पौरमेशवर शै सवाल कौरु? का चीज़ आपणै बाणणौवाल़ै कैईंदु पूछै सौकौ, “तुऐं मुखै ऐशणै किथु बाणै राए?” 21का कुम्हार खै माटी पांदी औधिकार ना आथी, कै सै ऐकी माटी कै ढेरी पौरैशै, ऐक बासण आछै काम कारिए औरौ औकौ बासण ढौबदै कामौ कारिए बाणौ?
22-23पौरमेशवर कै औधिकार औसौ कै जिनु लोगौ कै पौरमेशवरे बाणै राए तिनकै साथै सै किछै बै कौरे सौकौ। पौरमेशवर आपणा गुस्सा दिखाणा चांव थिया औरौ सौबी कै साथै आपणी शौकतै प्रगट कौरणै चांव थिया जू नाश हौणौ कै हकदार औसौ। इथकै बजाय, तैणै ऐशै कौरौ जिथुकै सै दिखाणौ चांव थिया कै सै कैतरा महान औसौ जोबै तैणै तिनु लोगौ पांदी दया कौरे जिनु तैणै आपणी महिमा दै शामिल हौणौ कै चोणे राए। 24चाहै यहूदी लोग हौंव या बैगानै यहूदी लोग हौंव, आमु सैजै चोणेयौंदे लोग औसौ जिनु पौरमेशवरे चोणे राए।
25बैगानै यहूदी लोगौ कै बारै मुंजी, पौरमेशवरे, पौरमेशवर कै बातौ बौताणौवाल़ै होशे नांव कै आदमी कै किताबो दो लैखै राए,
“जू मैरै लोग ना थी, तिनु हांव आपणै लोग बौलदा,
औरौ जू प्यारे ना थी, तिनु प्यारे बौलदा;
26औरौ जैसी ठाँव दा पौरमेशवरे बौल़ौ, तुऐं मैरै लोग ना आथी,
तैसी ही ठाँव दा जियुंदै पौरमेशवर तिनु आपणै संतान बौलदा।”
27पौरमेशवर कै बातौ बौताणौवाल़ै यशायाह नांव कै आदमीए इस्राएल कै बारै मुंजी बौल़ौ, “इस्राएल देश कै लोगौ कै गिनती समुन्द्र कै रेत कै जैशणै औसौ, तौ बै तिनुमुंजी दै ठिकै ही बौचदै।” 28जिथुकै “प्रभु तावल़ा ही दुनिया कै सौबी लोगौ का न्याय मोजबूती शै कौरदा।” 29जैशैखै पौरमेशवर कै बातौ बौताणौवाल़ै यशायाहै नांव कै आदमीए आगैई बौल़ै राए थियु,
“जै सौबिदा शौकतीशाली प्रभु आमु वंशज हौणौ कै रजामंदी ना दैय राखदा,
तौ आमै सदोम औरौ अमोरा शहरो कै जैशणै बौणै जांदै, जिनु पौरमेशवरे पूरी तरह शै नाश कौरे दिए।”
इस्राएल देश की नाकामयाबी की बौजैह
30तौ आमै इनु बातौ कै बारै मुंजी का बुलू? बैगानै यहूदी लोग आपी खै पौरमेशवर कै साथै सोही राखणौ कै कौचिश ना कौरौ थिए, पौरौ पौरमेशवरे तिनु खुद कै साथै सोही राखै जिथुकै तिनुऐ तैसी पांदी भोरोशा कौरे राए थिया। पौरमेशवरे तिनु बिशवाश कै दवारा धरमी साबित कौरे; 31पौरौ इस्राएल देश कै लोग, मूसा कै कानून मानैयौ पौरमेशवर कै साथै धरमी साबित हौणा चांव, पौरौ सै धरमी बौणणौ मुंजी सफल ना होई।
32ऐजौ कैशैकै हौए सौकौ? इथकारिए कै सै बिशवाश शै नी, पौरौ भले कामौ लैई पौरमेशवर कै साथै धरमी साबित हौवे। तिनुऐ मसीह कै ठुकरोऊवा जैसकै तुलना तैसी पाथरो कै साथै कौरे राए जू लोगौ कै ठोकर खियांव। 33जैशैखै पवित्र शास्त्र दो लैखै राए,
“दैखौ, मोऐं यरूशलेम शहर दा ठोकर लागणौ वाल़ा पाथर, औरौ लोगौ खै रिड़ाणौ वाल़ी चट्टान राखै लौए,
औरौ जू तैसी पांदी बिशवाश कौरला, सै बैज्जत ना हौंदा।”
Currently Selected:
रोमियों 9: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
