रोमियों 10
10
इस्राएल देश कै सुसमाचार कै जौरुरत
1ओए रै बिशवाशी भाईयों, मैरै मन कै इछा औरौ पौरमेशवर शै मैरै प्रार्थना औसौ कै इस्राएल कै लोगौ खै पौरमेशवर बौचांव। 2जिथुकै हांव तिनुकै गवाही दियु, कै तिनुखै पौरमेशवर कै खातिर जोश रौंव, पौरौ पौरमेशवर कै सेवा कैशै कौरणै चैंई, इथकै बारै मुंजी तिनकै सौमझ सोही ना आथी। 3जिथुकै सैजै लोग पौरमेशवर कै धार्मिकता कै साबित कौरदै बैई, आपणै तरीकै शै धरमी बोणणौ कै कौचिश कौरौ, औरौ ना आपी कै पौरमेशवर कै धार्मिकता कै अधीन कौरौ। 4जिथुकै मसीह कै आणौ शै मूसा कै कानून का मकसद पूरा हौए गौआ इथकारिए जू कुणिए मसीह पांदी बिशवाश कौरौ पौरमेशवर तैसी धरमी साबित कौरौ।
उध्दार सौबी कारिए औसौ
5जिथुकै पवित्र शास्त्र दै मूसा कै कानून धार्मिकता कै बारै मुंजी बौल़ौ: “जू आदमी मूसा कै कानून का पालन कौरौ, सै मूसा कै कानून लैई जियुंदी रौंदा।”
6पौरौ जू धार्मिकता बिशवाश शै औसौ, तिथकै बारै मुंजी पवित्र शास्त्र ऐजौ बौल़ौ, “आपी कै ऐजौ ना बौल़ौ कै कुण अमारै उध्दार कै खातिर स्वर्ग तौड़ी ऊबा जाला, मसीह खै धैनै धोरती पांदी लाणौ कारिए?” 7आपणै मन दो ऐजौ ना बौल़ौ कै मसीह कै मौत शै जिंदा कौरणौ कारिए कुण मौरेयौंदे कै दुनिया दा पताल़ो तौड़ी जाला?
8इयौं बातौ का मतलब ऐजा औसौ कै,
“आपणै मुँह लैई मानै पा औरौ आपणै मन लैई अपनांव,” कै जू सौंदेश बौतांव कै आमु पौरमेशवर पांदी भोरोशा कौरणा चैंई, औरौ ऐजाई आमै प्रचार कौरु।
9इथकारिए जै तुऐं आपणै मुँह लैई लोगौ कै सामणै यीशु मसीह कै प्रभु जाणैयौ अपनांव, औरौ आपणै मन दा ऐजा बिशवाश कौरौ कै पौरमेशवरे मसीह कै मौरेयौंदे मुंजीदा जियुंदी कौरा, तौ पौरमेशवर तैरा उध्दार कौरदा।
10आमै आपणै मन शै बिशवाश कौरु, औरौ इथकारिए आमु पौरमेशवर कै साथै धरमी साबित होऊं। औरौ अमारै मुँह कै अंगीकार अमारै बिशवाश कै दिखांव जिथलैई आमै बौचाए जोऊं।
11जिथुकै पौरमेशवर कै बातौ बौताणौवाल़ै यशायाह नांव कै आदमीए मसीह कै बारै मुंजी पवित्र शास्त्र दो लैखै राए, “जू कुणिए तैसी पांदी बिशवाश कौरला सै बैज्जत ना हौंदा।” 12यहूदी औरौ बैगानै यहूदी लोगौ मुंजी किछै भैद ना आथी, इथकारिए कै पौरमेशवर सौबी का प्रभु औसौ औरौ सै आपणै सौबी लोगौ खै बौचांव, जू तैसीकै मौदद कारिए पुकारौ। 13जिथुकै पवित्र शास्त्र दो ऐजौ लैखै राए: “प्रभु तिनु सौबी लोगौ कै बौचांदा जू तैसकै नांव कै पुकारौ।”
इस्राएल देश कै लोगै सुसमाचार कै ना औपनेई
14पौरौ बिशवाश कौरणौ शै लोग पौरमेशवर शै मौदद मांगै सौकौ, औरौ प्रभु पांदी बिशवाश कौरणौ कारिए लोगौ खै तैसका वचन शुणणा चैंई, औरौ जिनु लोगै प्रभु कै बारै मुंजी ना शौणै रैई, तौ बिशवाशी लोगौ कै चैंई कै सै यीशु मसीह कै बारै मुंजी तिनुकै बौतांव। 15औरौ इदै आगै कै सुसमाचार शुणाणौ वाल़ै जायौ तिनु बौताए सौकौ, सुसमाचार शुणाणौ वाल़ै खै भैजणै जौरुरी औसौ, इथकारिए पवित्र शास्त्र बौल़ौ, “तिनकै पांव किशैक सुन्दर औसौ, जू आछी बातौ का सुसमाचार शुणांव!”
16पौरौ सौबीए तैसी सुसमाचार पांदी बिशवाश ना कौरी। पौरमेशवर कै बातौ बौताणौवाल़ै यशायाहै बौल़ौ, “ओए रै प्रभु, कोसीए बै अमारै सौंदेश पांदी बिशवाश ना कौरी।” 17इथकारिए बिशवाश तोबै आंव जोबै कुणजाई सौंदेश शुणौए औरौ ऐजा सौंदेश मसीह कै बारै मुंजी वचन औसौ।
18पौरौ हांव बुलू, कै यहूदी लोगै निशोंक हौयौ मसीह कै बारै मुंजी सौंदेश शौणै राए, जिथुकै पवित्र शास्त्र दु लैखै राखौ,
“सुसमाचार शुणाणौ वाल़ै कै सौंदेश सारै दुनिया पांदी,
औरौ तिनकै वचन दुनिया कै हर जौगैह दै पोऊंचे गौवै।”
19तोबै बै हांव बुलू, कै ऐजौ साचौ औसौ कै इस्राएल देश कै लोगौ खै मसीह कै बारै मुंजी सौंदेश सौमझ ओऊवा। आगै तौ प्रभुए पौरमेशवर कै बातौ बौताणौवाल़ै मूसा कै दवारा बौल़ै राए,
“हांव ऐक ऐशणै देश कै दवारा जू ऐक देश ही ना आथी, तुऔं दा ज़लन पौयदा कौरदा,
हांव तुऔं ऐक ऐशणै देश कै दवारा गुस्सा दिलांदा, जिंदै सौमझ ही ना आथी।”
20पौरमेशवर कै बातौ बौताणौवाल़ै यशायाहै बौड़ै हिम्मत कै साथै बौल़ौ कै प्रभु बौल़ौ,
“जू मुखै नी जौंओ थिए, तिनुऐ मुखै पाए दिया,
औरौ जू मुखै पूछौ बै ना थिए, तिनु पांदी हांव प्रगट हौए गौआ।”
21पौरौ इस्राएल देश कै लोगौ कै बारै मुंजी पौरमेशवरे, पौरमेशवर कै बातौ बौताणौवाल़ै कै दवारा बौल़ौ, “हांव दूस भोरै ऐक आज्ञा ना मानणोवाल़ै औरौ झोगड़ा कौरणौवाल़ै लोगौ खै आपणै धोरे बौईदणो कारिए इंतजार कौरदा रौआ।”
Currently Selected:
रोमियों 10: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
