प्रेरितो कै काम 14
14
पौलुस औरौ बरनबास का इकुनियुम शहर दा विरोध
1इकुनियुम शहर दो ऐशै हौं कै पौलुस औरौ बरनबास यहूदी लोगौ कै सभा-घोरो दै साथ-साथ हौटै, औरौ ऐशणी बातौ कौरी कै यहूदियों औरौ बैगानै यहूदी लोगौ मुंजीदै बौहितै लोगै बिशवाश कौरा। 2पौरौ बिशवाश ना कौरणौवाल़ै यहूदी लोगै बैगानै यहूदी लोगौ कै मन बिशवाशी भाईयों कै खिलाफ दै भड़कौऊवे, औरौ बैर पौयदा कौर दिया।
3औरौ पौलुस औरौ बरनबास बौहितै दूसौ तौड़ी तिथै रौवै, औरौ प्रभु कै भोरोशे पांदी बिना डौरे बातौ कौरौ थिए : औरौ पौरमेशवरे तिनुलैई निशान औरौ बौड़ै काम कौरे तिनुऐ साबित कौरौ कै पौरमेशवर कै अनुग्रह कै बारै मुंजी तिनका सौंदेश साचा थिया। 4पौरौ नोगरो कै लोगौ दै फूट पौड़ै गौए थै; इथलैई कैतरै तौ यहूदी नेता कै ढौबौ औरौ कैतरै चोणेयौंदे चैलै कै ढौबौ हौए गौवै।
5जोबै बैगानै यहूदी औरौ यहूदी लोग तिनकै बैज्जती औरौ तिनु पांदी पथराव कौरणौ कारिए आपणै सरदारो समैंत तिनु पांदी दोऊड़ै। 6तौ सै इयौं बातौ कै जाणै गौवै औरौ लुकाउनिया प्रदेश कै लुस्त्रा औरौ दिरबे नोगरो दै, औरौ नेड़िक-बेड़िक कै प्रदेशो दै दौड़ै गौवै। 7औरौ तिथै सुसमाचार शुणादै लागै।
लुस्त्रा शहर दा ऐकी लोंगड़े को ठीक हौणौ
8लुस्त्रा शहर दा ऐक आदमी बौठै रौआ थिया, जैसकै लात कमजोर थिए। सै जन्म शा ही लोंगड़ा थिया, औरौ कौलोंई ना हांडै रैई थी। 9तैणै पौलुस खै बातौ कौरदै बैई शौणै लौआ थिया, औरौ पौलुसे तैसकै ढौबौ ध्यान धोरेयौ दैखौ कै ऐसीखै ठीक हौणौ का बिशवाश औसौ। 10औरौ जोर शै बौल़ौ, “आपणै लातो कै साहारै खौड़ा हौ।” तोबै सै उछल़ैयो हांडदा फिरदा लागा।
11लोगै पौलुस का ऐजा काम दैखैयो लुकाउनिया प्रदेश कै भाषा दो जोर शै बौल़ौ, “देवता आदमी कै रुपो दा हौयौ अमारै धोरे ओतरेयो आए रौआ।” 12औरौ बरनबास खै यूनानी देवता ज्यूस को नांव दियु औरौ पौलुस खै हिर्मेस को नांव दियु, जिथुकै सै मुख्य सौंदेश दैणौवाल़ा थिया। 13औरौ ज्यूस कै तैसी मन्दिर कै पूजारी जू तिनकै नोगर कै सामणै थिया, बौल्ल़ोद औरौ फूलो कै हार दैवल़ी पांदी लायौ लोगौ कै साथै बलिदान कौरणा चांव थिया।
14पौरौ चोणेयौंदे चैलै बरनबास औरौ पौलुसे जोबै ऐजौ शुणौ, तोबै सै बौहितै दुखी हुवे औरौ आपणै खोटणो फाडे़ औरौ भीड़ौ मुंजी बौढ़ गौवै औरौ जोर शै बौलदै लागै। 15“ओए रै लोगौ, तुऐं का कौरौ? आमुए बै तौ तुऔं साए दुख-सुख भुगतणो वाल़ै आदमी औसौ, औरौ तुऔं सुसमाचार शुणौऊं, कै तुऐं इनु बैकार कै चीज़ौ शै जौई हौयौ जियुंदै पौरमेशवर कै ढौबौ आंव, जैणै स्वर्ग औरौ धोरती औरौ समुन्द्र औरौ जू किछै तिंदु औसौ बाणै राए। 16तैणै बीतैयौंदे सौमय दै सौब देशो कै आपणै-आपणै बाटो पुंडे हांडणौ दियै।
17तौ बै तैणै हमैशा आपणै मोजूद हौणौ का सबूत तिनु आछी चीज़ौ शै दिया जू सै कौरे सौकौ। जू कै गौयण शै पाणी औरौ मौसम कै हिसाब शै फसल दैयौ तुऔं कारिए खाणा औरौ तोंवारै मन कै खुशी लैई भौरदा रौआ। 18ऐजौ बौलेयौ बै तिनुऐ लोगौ खै बौड़ी मुशकिल शै रौकै कै तिनु कारिए बलिदान ना कौरौ।
19पौरौ कैतरै यहूदी लोगै अन्ताकिया शहर औरौ इकुनियुम शहरो शै आयौ लोगौ कै आपणै ढौबौ कौर दियै, औरौ पौलुस पांदी पथराव कौरा, औरौ मौरेयौंदा सौमझेयौ तैसी नोगर कै बायरै घोसिटैयौ लोय गौवै। 20पौरौ जोबै चैलै तैसकै चोऊ ढौबौ आयौ खौड़ै होवे, तौ सै बिज़यो नोगर दा हौटा औरौ दूजै दूसै बरनबास कै साथै दिरबे नोगर कै हौटै गौआ।
सीरिया कै अन्ताकिया शहर कै पाछु आणौ
21तिथकै बाद पौलुस औरौ बरनबास तैसी नोगर कै लोगौ खै सुसमाचार शुणायौ, औरौ बौहितै चैलै बाणैयो, इथकै बाद, सै आपणै बाटो बाटी पाछु जांदै लागै। सै औटेयौ लुस्त्रा शहर कै हौटै। तोबै सै तिथैदै इकुनियुम शहर खै हौटै, औरौ तोबै सै पिसिदिया प्रदेश कै अन्ताकिया शहर खै हौटै।” 22औरौ हरेक नोगर दै चैलो कै मन खै मजबूत कौरदै रौवै औरौ ऐजै उपदैश दैंव थिए कै बिशवाश दै बौणैयौंदे रौव; औरौ ऐजौ बौल़ौ थिए, “कै आमु बौड़ै कौल़ेश शै हौयौ पौरमेशवर कै राज्य दो जाणौ पौड़दौ।”
23औरौ तिनुऐ हरेक कलीसिया दै सौबी समूह कारिए अगुवे ठौहरा दियै औरौ उपवास कै साथै प्रार्थना कौरेयौ तिनु प्रभु यीशु कै सौंपै दिए जैसी पांदी तिनुऐ बिशवाश कौरे राए थिया। 24औरौ पिसिदिया प्रदेश शै हौयौ सै पंफूलिया प्रदेश दै पौऊंचै; 25औरौ सै पंफूलिया जिले कै पिरगा शहर दै पौरमेशवर का वचन शुणायौ अत्तलिया शहर दै ओऊवे।
26औरौ तिथैशै जहाज पांदी अन्ताकिया शहर कै पाछु हौटै गौवै, जिथदै तिनु पौरमेशवर कै अनुग्रह दै सौंपैयौ तैसी काम कारिए भैजै राए थिए जिथु सै ऐबै पूरु कौरेयौ पाछु आए रौवै थिए। 27अन्ताकिया शहर पोंचैयो, तिनुऐ कलीसिया कौठै कौरे औरौ बौतौऊ, कै पौरमेशवरे अमारै साथी हौयौ कैशणै बौड़ै-बौड़ै काम कौरे! औरौ कैशैखै पौरमेशवरे बैगानै यहूदी लोगौ खै यीशु मसीह पांदी बिशवाश कौरणौ कै लायक बाणै। 28तिथै पौलुस औरौ बरनबास चैलो कै साथी बौहितै दूसौ तौड़ी रौवै।
Currently Selected:
प्रेरितो कै काम 14: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
