प्रेरितो कै काम 13
13
बरनबास औरौ शाऊल कै भैजणै
1अन्ताकिया शहर कै कलीसिया दै कैई पौरमेशवर कै बातौ बौताणौवाल़ै औरौ उपदैशक थिए; जैशै बरनबास औरौ शमौन तैसकौ औकौ नांव नीगर थियु; जिथका मतलब औसौ काल़ा आदमी औरौ लुकियुस कुरेनी औरौ चौथाई देश कै राजा हेरोदेस का दूधभाई मनोहम औरौ शाऊल। 2जोबै तिनुऐ उपवास कै साथै प्रभु की आराधना कौरे लोए थै, तौ पवित्र आत्माए बौल़ौ, “मुं कारिए बरनबास औरौ शाऊल कै मैरै सेवा कौरणौ कारिए जौई कौरौ जिथकारिए मोऐं तिनु बौयदै राए।” 3तोबै तिनुऐ उपवास औरौ प्रार्थना कौरेयौ औरौ तिनु पांदी हाथ राखैयौ तिनु पौरमेशवर का काम कौरणौ कारिए भैजै।
पौलुस की आगलै प्रचार यात्रा
4इथकारिए शाऊल औरौ बरनबास पवित्र आत्मा कै भैजैयौंदे अन्ताकिया शहर शै सिलूकिया शहर कै बंदरगाह तौड़ी हौटै; औरौ तिथैदै जहाजो पांदी बौठेयौ साइप्रस टापू पांदी सलमीस बंदरगाह कै हौटै। 5औरौ सलमीस दै पौंचेयौ, पौरमेशवर का वचन यहूदी लोगौ कै यहूदी सभा-घोरो दा शुणौऊवा; यहून्ना जैसीखै मरकुस बै बौल़ौ तिनकी मौदद कौरणौ कारिए तिनकै साथै थिया।
6इथकै बाद तिनुऐ पूरै टापू दै ऐकी नगर शै ओकी नगर कै यात्रा कौरे औरौ आखरी दै सै पाफुस शहर पौऊंचै। तिथै तिनु बार-यीशु नांव का ऐक जादूगर भैटा, जू यहूदी औरौ झूठा पौरमेशवर कै बातौ बौताणौवाल़ा थिया। 7सै राज्यपाल सिरगियुस पौलुस कै साथी थिया, जू बुध्दिमान आदमी थिया, तैसी राज्यपाले बरनबास औरौ शाऊल कै आपणै धोरे बौएदैयौ पौरमेशवर का वचन शुणाणा चोऊवा। 8(बार-यीशु कै नांव का मतलब एलीमास औसौ) पौरौ एलीमास जादूगरे, तिनका सामणा कौरेयौ राज्यपाल खै यीशु पांदी बिशवाश कौरणौ शै रोकणा चोऊवा।
9तोबै शाऊले जैसकौ नांव पौलुस बै औसौ, पवित्र आत्मा शै भौरेयों एलीमास जादूगर कै ढौबौ टकटकी लायौ दैखौ औरौ बौल़ौ 10“ओए रै सौबै कपट औरौ सौबै चतुराई शै भौरेयौंदे शैतान कै सन्तान, सारै धार्मिकता कै बौयरी, का तू प्रभु कै सीधै बाटौ खै बांगै कौरणा ना छोड़दा?
11ऐबै दैख प्रभु ताखै सौजा दैणौवाल़ा औसौ, औरौ तू किछै दूस तौड़ी आन्धा रौंदा, औरौ सुरज कै ना दैखदा।” तोबै तौलोंई धुंधल़ो औरौ इनारौ तैसी पांदी छाए गौ, औरौ सै उंढा-पुंडा जोंदा लागा, ताकि कुणिए तैसका हाथ पाकड़ेयो तैसकै मौदद कौरौ। 12तोबै राज्यपाले जू किछै हौए रो थियु, दैखैयो औरौ प्रभु कै उपदैश सै हैरान हौयौ तैणै प्रभु यीशु पांदी बिशवाश कौरा।
पिसिदिया जिले कै अन्ताकिया शहर दा पौलुस का उपदैश
13पौलुस औरौ तैसकै साथीए पाफुस शहर शै समुन्द्री यात्रा शुरु कौरे औरौ सै पंफूलिया प्रदेश कै पिरगा शहर दै पौंचै गौवै, औरौ यहून्ना जैसीखै मरकुस बै बौल़ौ तिनु छोड़ेयौ यरूशलेम शहर कै हौटै गौआ। 14औरौ पिरगा शहर शै औगौड़ियौ बोढ़यो गलतिया प्रदेश कै पिसिदिया जिले कै नेड़िक अन्ताकिया शहर दै पौऊंचै। औरौ विशांव कै दूसै यहूदी सभा-घोरो दै जायौ बौठ गौवै। 15मूसा कै कानून औरौ पौरमेशवर कै बातौ बौताणौवाल़ै कै किताबो शै पोढ़णो कै बाद यहूदी सभा-घोरो कै ठोगड़े तिनकै धोरे ब्यौरा भैजा, “ओए रै भाईयों, जै लोगौ कै उपदैश कारिए तोंवारै मनो दै कुणजै बात औसौ तौ बौल़ौ।”
16तोबै पौलुस खौड़ै हौयौ हाथौ लैई चुपी रौणौ का इशारा कौरेयौ सौमझौऊवे की मेसो रौंव, “ओए रै इस्राएल देश औरौ पौरमेशवर सै डोरणौवाल़ै, बैगानै यहूदी शुणौ 17इनु इस्राएल देश कै लोगौ कै पौरमेशवरे अमारै पुराणियो खै चोणे राए, औरौ जोबै ऐजै लोग मिस्र देश दै प्रदेशी हौयौ रौंव थिए, तौ तिनकी बढ़ोतरी कौरे, औरौ बौड़ी शौकतै शै तिनुखै निकाल़ैयो लियोऊवे। 18औरौ सै लमसम चाल़ीश सालो तौड़ी रेगिस्थान दै तिनुकै बरदाश कौरदा रौआ, जोबै की तिनुऐ बार-बार तैसकी आज्ञा ना मानी।
19औरौ कनान देश दी सात जाति का नाश कौरेयौ तिनका देश लमसम साढ़े चार सौ सालो दी इनुखै विरासत दैय दी। 20अमारै पुराणियाए तिनकै पुराणिया कै मिस्र देश दै पौंऊचणौ तौड़ी लमसम चार सौ पचाश साल बाद कनान पांदी औधिकार कौरणा शुरु कौरा; पौरमेशवर कै बातौ बौताणौवाल़ै शमूएल तौड़ी इस्राएल कै लोगौ पांदी राज कौरणौ कारिए पिता पौरमेशवरे नेता चोणे दियै।
21जोबै शमूएल इबी तौड़ी तिनका नेता ही थिया, इथकै बाद तिनुऐ ऐक राजा मांगा; तोबै पौरमेशवरे बिन्यामीन कै गोत्रो मुंजीदा ऐक आदमी यानी कीश कै बैटै शाऊल खै तिनु पांदी राजा बाणा। तैणै चाल़ीश सालो तौड़ी इस्राएल कै लोगौ पांदी शासन कौरा।
22तोबै पौरमेशवरे शाऊल खै पद शै हटायो तैसकै ठाँव पांदी दाऊद खै राजा बाणा; जैसकै बारै मुंजी तैणै गवाही दी, ‘मुखै ऐक आदमी, यिशै का बैटा दाऊद, मैरै मन कै हिसाब शै भैट गौआ। सैजाई मैरै सौबै इछा पोरे कौरदा।’
23तैसकै वंश मुंजीदा पौरमेशवरे आपणै वादै कै हिसाब शै इस्राएल देश कै धोरे ऐक उध्दार कौरणौवाल़ा, यानी यीशु कै भैजा। 24जैसकै आणौ शै औगौड़ियौ यूहन्नाए सौबी इस्राएल देश कै लोगौ खै ऐजा प्रचार कौरा कै आपणै पापौ खै मानैयौ पाप कौरणा छोड़े दैव औरौ पौरमेशवर कै ढौबौ फिरैयौ बपतिस्मा लोणो कै जौरुरत औसौ। 25औरौ जोबै यूहन्ना आपणै सेवा पोरे कौरणौ पांदी थिया, तौ तैणै बौल़ौ, तुऐं मुखै का सौमझौ? हांव मसीह ना आथी! पौरौ दैखौ, मैरै बाद ऐक आणौवाल़ा औसौ, सै मुं दा बै जादा महान औसौ, हांव इथ लायक बै ना आथी कै तैसकै जूते कै तशमै खोले सौकु।”
26“ओए रै भाईयों, तुऐं जू अब्राहम कै सन्तान औसौ; औरौ तुऐं जू पौरमेशवर सै डोरणौवाल़ै बैगानै यहूदी औसौ, पौरमेशवरे तोंवारै धोरे उध्दार का सौंदेश भैज राए जू लोगौ खै बौचांव 27यरूशलेम शहर कै लोगै औरौ तिनकै नेताए यीशु मसीह कै ना पौछेयाणी औरौ तिनुऐ पौरमेशवर की बातौ बौताणौवाल़ै कै तिनु वचनो खै ना सौमझी, जिनु सै हर विशांव कै दूसै पोढ़ो थिए। इथकारिए तिनुऐ तैसी दोषी ठैहरोऊवा औरौ ऐशैखैई पौरमेशवर कै बातौ बौताणौवाल़ै कै वचनो खै पूरै कौरे।
28तिनुऐ मारणौ कै लायक कुणजाई दोष तैसदा ना पाई, तोबै बै राज्यपाल पिलातुस शै बिन्ती कौरे, कै सै मारै दिया जांव। 29औरौ जोबै तिनुऐ सैजौ सौबै कौरौ जू पवित्र शास्त्र तैसकै बारै मुंजी बौल़ौ, तिनुऐ तैसी ऐकी क्रूसो पांदी किलो लायौ मारै दिया औरौ क्रूसो पांदी दा उतारेयो कब्रो दा राखा।
30पौरौ पौरमेशवरे तैसी मौरेयौंदे मुंजीदा जियुंदी कौरा, 31औरौ सै तिनु जू तैसकै साथी गलील जिले शै यरूशलेम शहर दै आए रौवै थिए, बौहितै दूसौ तौड़ी आपणै चैलै खै दैखिंदा रौआ; लोगौ कै सामणै ऐबै जिनुवै तैसी दैखा सैजैई तैसकै गवाह औसौ।
32औरौ आमुए तुऔं तैसी कौरार कै बारै मुंजी जू पौरमेशवरे अमारै पुराणिया शै कौरे राए थै, ऐजा सुसमाचार शुणौऊं, 33कै पौरमेशवरे यीशु खै मौत शै जियुंदी कौरेयौ, सैजी कौरार अमारै सन्तान कारिए पोरे कौरे; जैशै भजन संहिता दो बै लैख राए, पौरमेशवरे मसीह कै बारै मुंजी बौतौऊ,
‘तू मैरा बैटा औसौ; ऐलो दा उबा हांव तैरा पिता बौणै गौआ।’
34औरौ तैसकै इयौं बातौ लैई मौरेयौंदे मुंजीदै जियुंदी हौणौ कै बारै मुंजी बै, कै सै कौलोंई नी शौड़ौ, पौरमेशवरे ऐजौ बौल राए, ‘हांव दाऊद पांदी कै पवित्र औरौ अटल आशीष तुऔं पांदी कौरदा।’ 35दाऊद ऐजै बात औकै भजन संहिता दै बौल़ौ,
‘तू आपणै पवित्र जन कै शौड़णो ना दैंदा।’
36जिथुकै राजा दाऊद तौ पौरमेशवर कै इछा कै हिसाब शै आपणै सौमय दै सेवा कौरेयौ मौरे गौआ, औरौ आपणै पुराणिया आरी मिलै गौआ, औरौ शोड़े बै गौआ। इथलैई आमै जाणै पोऊँ कै दाऊद राजाए आपणै बारै मुंजी ना बौल़ै रैई थी। 37पौरौ यीशु जैसीखै पौरमेशवरे मौरेयौंदे मुंजीदा जियुंदी कौरा, सै शोड़ी ना।
38इथकारिए, ओए रै भाईयों; तुऐं जाणै पाव कै यीशु कै दवारा पापौ कै माफी का सुसमाचार तुऔं दैय राए। 39औरौ जिनु बातौ शै तुऐं मूसा कै कानून कै दवारा निर्दोष ना ठौहरै सौकौ, तिनु सौबी बातौ दा हरेक बिशवाश कौरणौवाल़ा यीशु कै दवारा निर्दोष ठौहरौ।”
40इथकारिए चौकश रौव ऐशै नी हौं, कै जू पौरमेशवर कै बातौ बौताणौवाल़ै कै किताबो दौ लैख राए, तुऔं पांदी बै आए जांव: 41“ओए रै नेंदैया कौरणौवाल़ौ, दैखौ, औरौ हैरान हौं, औरौ मिट जाव;
जिथुकै हांव तोंवारै दूसौ दा ऐक काम कौरु;
ऐशणा काम, कै जै कुणिए तुऔं शै तैसखै चौर्चा कौरौ, तौ तुऐं कौलोंई बै बिशवाश ना कौरदै।”
अन्ताकिया शहर दै पौलुस औरौ बरनबास
42जोबै पौलुस औरौ बरनबास सभा-घोरो शै निकल़दै लागै रौवै थिए, तौ लोग तिनु शै बिन्ती कौरदै लागै कै आगलै विशांव कै दूसै आमु ऐजी बातौ हौजौ शुणाया। 43औरौ जोबै सभा-घोरो शै सौबवे हौटै गौवै तौ यहूदी नेता औरौ यहूदी मत दै आएयौंदे भोक्तो मुंजीदै भौरिशै पौलुस औरौ बरनबास कै पौछौड़ियौ हौए गौवै; औरौ तिनुऐ तिनुआरी बातौ कौरेयौ सौमझाए, कै पौरमेशवर कै अनुग्रह दै बौणैयौंदे रौव।
44आगलै विशांव कै दूसै नगर कै जादातर सौबै लोग पौरमेशवर का वचन शुणणौ कारिए कौठै हौए गौवै। 45पौरौ यहूदी नेता भीड़ खै दैखैयो ज़लन लैई भोरै गौवै, औरौ नेंदैया कौरेयौ पौलुस कै बातौ कै खिलाफ दै बौलदै लागै।
46तोबै पौलुस औरौ बरनबासे निडर हौयौ बौल़ौ, “जौरुरी थियु, कै पौरमेशवर का वचन औगौड़ियौ तुऔं शुणाया जांदा; पौरौ जोबै तुऐं तैसी नकारै दिया, औरौ आपी खै सौदा कै जिन्दगी कै लायक ना ठोहरांव, तौ ऐबै, आमु बैगानै यहूदी कै धोरे जांदै। 47जिथुकै प्रभुए आमु ऐजै आज्ञा दैय राए, ‘मोऐं तुऔं बैगानै यहूदी कारिए पेयाशो ठोहराए राए, ताकि तुऐं दुनिया कै हर जौगैह लोगौ खै उध्दारकर्ता कै बारै मुंजी बौतांव।’ ” 48ऐजौ शोणेयो बैगानै यहूदी खुश हुवे, औरौ पौरमेशवर कै वचन कै बौड़ाए कौरदै लागै, औरौ जैतरै सौदा कै जिन्दगी कारिए ठैहराए राए, तिनुऐ बिशवाश कौरा। 49तोबै प्रभु का वचन तैसी सारै देशो दा फौयल़दा लागा।
50पौरौ यहूदी नेताए भोक्त औरौ पौरमेशवर का डौर मानणोवाल़ी बैटमाणिशौ खै औरौ नगर कै खास लोगौ कै उकसोऊवे, औरौ पौलुस औरौ बरनबास कै खिलाफ तरकीब बाणैयौ तिनु आपणै इलाके शै बायरै निकाल़ै दियै। 51तोबै पौलुस औरौ बरनबास तिनकै सामणै आपणै लातो कै धूल झाड़ेयौ जिथका ऐजा मतलब औसौ कै पौरमेशवरे तिनु नकारै राए औरौ तिनु सौजा दैंदा औरौ सै इकुनियुम शहर कै हौटै गौवै। 52औरौ चैलै अन्ताकिया शहर दै खुशी शै औरौ पवित्र आत्मा शै भोरदै रौवै।
Currently Selected:
प्रेरितो कै काम 13: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
