रोमियो 15
15
होरनियां केरा भरा चुकणा
1असै जै विश्वासा मझ पक्कै अत्तै पता कि ऐन्हैं गलै ला कोई फर्क ना पूंता, पण असै सिर्फ अपांणा खुश कांनेरै तेईनी ऐहीं ना करि सकतै। असु तैन्हांं मैहणुवां केरी शंकाय जां अशंकाय पनि विचार कांना चेहिंथा जै ऐन्हां गला गलत मनतै। 2असु मझियां सभनियां ऐहीं कांनु चेहिंथु, जै साथी विश्वासिरै दिला खुश करिया जां होरनियां केरा विश्वास मजबूत कांनेरै तेईनी मजत करिया। 3केईनी कि यीशु मसीह अपांणा खुश ना केया, पण जिहीं कि पवित्र शास्त्रा मझ लिखोरू आ, “तिंडि निंदा कांनारै मिंडी निंदा क्यौरी आ।” 4हर अक गल जै पवित्र शास्त्रा मझ पेहिलै किना लिखोरी आ, सैकेई असेड़ि शिक्षाईरै तेईनी लिखियोरी आ, कि जै सब्र जां जोश असुनि पवित्र शास्त्रा किना मेईंता, असै तैस किना आशा रखि सकिया कि परमेश्वरै जै वायदा क्यौरा थ्या, तैस कांना। 5आंउ प्रार्थना काता, कि सब्र जां जोश वा परमेश्वर तुहांनि यीशु मसीहरै पिचोरै चलतै योकिया सिंउ शांति सिंउ बेशणा मझ मजत करिया। 6ताकि तुवे सभ योकिया सिंउ मिलिकरी एकि आवाजि मझ असेड़ै प्रभु यीशु मसीहरै पिता परमेश्वरेरी स्तुति करिया।
सारा केरै तेईनी खुशखबरी
7ऐठणीरै तेईनी योकिया ग्रहण करा जिहीं यीशु मसीह तुवे ग्रहण क्यौरै अत्तै; ताकि मैहणु परमेश्वरेरी तारीफ करिया। 8ऐठणीरै तेईनी आंउ तुहां मैहणुवंनी शुणांता, कि जै वायदा परमेश्वरै असेड़ै पूर्वजा सिंउ क्यौरा थ्या, तैस वायदै सच कांनेरै तेईनी यीशु मसीह खतना क्यौरा मैहणुवां केरा सेवक बंणा; जेनि ला सैक्या लुहाई सकिया कि परमेश्वर विश्वास योग्य आ। 9ताकि होरनियां जातिया केरै मैहणु बि परमेश्वरानि तेसैरी दयाईरै तेईनी महिमा दी सकिया; ऐ ठीक तिहियें आ, जिहीं पवित्र शास्त्रा मझ लिखोरू आ, “ऐठणीरै तेईनी मूं होरनियां जातिया मझ तिंडा धन्यवाद कांना जां तिंडै नाँईयेरै भजन लांणै।” 10फिरी कोसक्यै जगाय पवित्र शास्त्रा मझ ऐ बि लिखोरू आ कि, “होरनियां जातिया केरै सभ मैहणुवो, परमेश्वरेरै चुणौरा मैहणुवां सिंउ आनन्द मना।” 11फिरी पवित्र शास्त्र ऐ बि बोलता, कि “होरनियां जातिया केरै मैहणुवो जां हे अलग-अलग राज्यरै मैहणुवो; तेसैरी स्तुति करा।” 12जां फिरी भविष्यवक्तै यशायाह पवित्र शास्त्रा मझ लिखोरू आ, कि “यिशैरा अक वंशज प्रकट भूंणा जां तैस होरनियां जातिया पन राज कांनु। तैस पन होरनियां जातिया केरै मैहणुवां आशा रखणी, कि तैस सैक्यै बचांणै।” 13आंउ प्रार्थना काता कि परमेश्वर जै आशा दींणार आ, तुहांनि विश्वास कांना मझ पूरी तरह सिंउ खुशी जां शांति सिंउ भरिया, जिहीं कि तैस मझ तुवाड़ा विश्वास आ, ताकि पवित्र आत्मायरी सामर्थ सिंउ तुवे आशाय सिंउ भरी गहिया।
हिम्मत सिंउ लिखणैरा कारण
14मिंडै विश्वासी भाईयो, मूं तुहां पन पूरा भरौसा, कि तुवे ऐपुवै भलाई ला भरियोरै अत्तै जां तुवे पूरी तरह सिंउ जांणतै कि तुहां कितु कांनु चेहिंथु, कि तुवे योकिया शिख्राय सकिया। 15पण तुहांनि फिरी याद करांणेरै तेईनी मीं किछ चीजा केरै बारै मझ बड़ी हिम्मत करि-करि लिखोरू आ। ऐ तेनी अनुग्रह ला भूं, जै परमेश्वरै मूंनी दितौरा। 16ताकि आंउ होरनियां जातिया केरै तेईनी यीशु मसीहरा सेवक बंणी करि एकि याजकेरा कंम तिहियें काता, जिहीं आंउ खुशखबरी शुणांणैरा कंम काता। ताकि होरनियां जातिया परमेश्वरानि चढ़ावेरै रूपा मझ दी सकूँ, जेनि ला सैक्या खुश आ जां जै पवित्र आत्माय ला पवित्र क्यौरै अत्तै। 17ऐठणीरै तेईनी आंउ यीशु मसीहरी वजहि ला परमेश्वरेरी सेवा कांना पन गर्व करि सकता। 18केईनी कि मसीह मिंडै जरियै जै क्यौरू आ, तैस आंउ बोलणेरै तेईनी हिम्मत रखता जां आंउ होरनियां जातिया केरा मैहणुवां परमेश्वरा पिचोरै चलाणेरै तेईनी काबिल आ। जेख्णी तैन्हैं मिंडी गलै शुणि जां मिंडै कंम तकाय, ता तैन्हैं यीशु मसीह पन भरौसा केया। 19जां पवित्र आत्माय ला मूंनी दितोरी सामर्थी ला, आंउ अदभुत कंम जां चमत्कार काता। ऐठणीरै तेईनी जेठि बि आंउ यरूशलेम शहरा किना इल्लुरिकुम प्रदेशा तेईनी गियौरा, तैड़ी मीं सभनियां मैहणुवंनी मसीहरी खुशखबरी शुणाउरी आ।
20पण मिंडै मंना मझ हमेशा ऐ ईच्छा रिय्होरी आ, कि खुशखबरिरा प्रचार तैन्हांं जगाईया भुईया, जेठि हालै-तेईनी यीशु मसीहरै बारै मझ शुणियोरू ना; ऐहीं ना भुईया कि जिहीं आंउ परमेश्वरेरै तेईनी कंम काता; शायद आंउ तैस कंमा परमेश्वरेरै तेईनी जारी ना रखि सकता, जै कुनिक्यै होरै पेहिलै किना शुरू करि दितौरा थ्या, जिहीं कि केणुक्या मैहणु होरेरी खणोरी खाई मझ घर बंणाता। 21पण आंउ तैस गलै पूरी कांना चांहथा, जै पवित्र शास्त्रा मझ लिखोरी आ, “जैन्हांनि तेसेरै बारै मझ कदि ना शुणाउरू, तैन्हांं तकांणु; जां जैन्हैं तेसेरै बारै मझ कदि ना शुणौरू, तैन्हांं समझणुं।”
रोम देशानि गांहणेरै तेईनी पौलुसेरी योजना
22मिंडा ऐ फर्ज मूं तुहां किनि ऐईंणेरै तेईनी घड़ि-घड़ि रौकता रींहथा। 23पण मीं अबै तैन्हांं प्रदेशा मझ जैन्हैं मैहणुवें यीशु मसीहरै बारै मझ ना शुणौरू, तैन्हांंनि बि खुशखबरी शुणांणैरा कंम पूरा करि छडौरा जां आंउ तुहां सिंउ मिलणेरी ईच्छा काता रिय्हा। 24ऐठणीरै तेईनी जेख्णी स्पेन देशानि गांहणु ता, मिंडी ऐ ईच्छा कि तैस दौरान आंउ तुहां सिंउ मिलूं जां आंउ तुहां सिंउ तुवाड़ी संगती मझ आंनन्दित भौ गंहूँ। आंउ चांहथा कि तुवे स्पेन देशानि गांहणेरै तेईनी मिंडी मजत करि सकिया। 25अबै आंउ परमेश्वरेरै मैहणुवंनी किट्ठैरौरा दान दींणैरै तेईनी यरूशलेम शहरानि गांहथा। 26केईनी कि मकिदुनिया जां अखाया प्रदेशेरी कलीसियेरै मैहणुवें ऐ दान किट्ठा कांना अच्छी गल समझि, कि जै यरूशलेम शहरा मझ परमेश्वरेरै मैहणु अत्तै जां जै गरीब अत्तै, तैन्हांंनि किछ दान दिया। 27तैन्हैं ऐ खुशी सिंउ कियु। सैक्यै यरूशलेम शहरा मझ रींहणारा मैहणुवां केरै कर्जदार अत्तै, केईनी कि होरनियां जातिया यरूशलेम शहरा मझ रींहणारा विश्वासिया किना आत्मिक आशीषि हासिल क्योरी अत्ति। ऐठणीरै तेईनी तैन्हांं लगतु आ कि ऐसेरै बदलै मझ कम-सै-कम सैक्यै तेन्हैरी आर्थिक मजत ता करि सकतै।
28ऐठणीरै तेईनी आंउ सभनियां पेहिलै यरूशलेम शहरानि गांहथा, ताकि तैन्हांंनि ऐ किठैरौरा दान दी सकूँ। तेत किना बाद फिरी मूं रोम देशा मझ अईछी करि तुहां सिंउ मिलणा किना बाद स्पेन देशानि चलि गांहणु। 29जां आंउ जांणता कि जेख्णी मूं तुहां किनि ऐईंणु जां यीशु मसीह किना मेऔरी आशीष तुहां सिंउ बंडणी। 30मिंडै विश्वासी भाईयो, प्रभु यीशु मसीह मझ असेड़ै विश्वासेरै कारण जां पवित्र आत्माय जै असुनि प्रेम दितौरा, तेसेरै कारण आंउ तुहां सिंउ विनती काता, कि तुवे मिंडै तेईनी परमेश्वरा सिंउ बड़ी ईमानदारी सिंउ प्रार्थना करा। 31कि मूं यहूदिया प्रदेशेरै अविश्वासिया किना बचाईया, ऐठणीरै तेईनी बि प्रार्थना करै कि तेठणीरै विश्वासी मिंडै ऐस दाना स्वीकार करि लिया, जै आंउ यरूशलेम शहरानि लै गांहथा। 32जां परमेश्वरेरी ईच्छाय सिंउ तुहां किनि आनन्द सिंउ अईछी करि तुहां किनि आराम करि सकूँ। 33आंउ प्रार्थना काता कि परमेश्वर, जै शांति दींता, तुहां सभनियां सिंउ रिय्हा। आमीन।
Currently Selected:
रोमियो 15: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
