इब्रानियों 8
8
स्वर्गीय महायाजक
1अबै जै गलै असै बोलतै अत्तै, तैन्हांं मझां सभनियांं किना बडी गल ऐ आ, असु किनि सच-मझ ऐतिया महायाजक आ, जै स्वर्गा मझ महामहिम परमेश्वरेरै सिंघासना किनि देहिणै पासै बेठौरा। 2सैक्या स्वर्गा मझ सच्चै मिलाप वायै तम्बु मझ महा पवित्र जगाय मझ सेवा काता, जै मैहणुवें ला ना, पण प्रभुरै द्वारा बंणाईयोरा। 3केईनी कि हर अक महायाजक भैंट चाढ़नेरै तेईनी जां पापा केरी माफिरै तेईनी नियुक्त करियूंता, ऐठणीरै कारण जरूरी आ, कि असेड़ै महायाजका यीशु किनि बि किछ चाढ़नेरै तेईनी भुईया। 4जां अगर मसीह पृथ्वी पन भूंता, ता कदि याजक ना थ्या भूंणा, केईनी कि मूसेरी व्यवस्थाईरै अनुसार भैंट चाढ़नेरै तेईनी पेहिलै किना याजक मौजूद आ। 5सैक्यै याजकेरै रूपा मझ जै कंम कातै, सै वास्तव मझ स्वर्गा मझ जै किछ आ सिर्फ तेठणिरी अक नकल जां छाउंठा। ऐ सैहै आ जै मूसै सेईतै थ्या। केईनी कि जेख्णी मूसा मिलाप वायै तम्बु बंणाणेरै तेईनी तियार भूंता थ्या, तेख्णी परमेश्वरै तेसनी ऐ चेतावनी दित्ती, कि “तका जै नमूना ताउनि पहाड़ा पन लुहाआ, तेसै सैयि सभ-किछ बंणाय।” 6पण जै याजकेरी सेवायरा कम असेड़ै महायाजका मसीह यीशुनि मैआ, सै तैस कंमा किना बड़ा बडा कंम आ जै होरनियां याजकानि दितौरा थ्या। केईनी कि सैक्या सैहै आ, जै बधिया वायदा केरै आधारा पन, परमेश्वरेरै सांमणै असेड़ै तेईनी एकि महान कसमिरा मेल-मिलाप काता।
नवाँ वायदा
7केईनी कि अगर पेहिला वायदा सही भूंता भुईं ता, होरै वायदेरी जरूरत ना थी भूंणी। 8पण परमेश्वर मैहणुवां पन दोष ला करि बोलता।
“प्रभु बोलता, तका सैकेई धियाड़ी ऐईंती अत्ति,
कि मूं इस्राएलेरा मैहणुवां सिंउ जां यहूदेरा मैहणुवां सिंउ अक नवाँ वायदा कांना।
9ऐ वायदा तेतिया ना भूंणा, जेतिया मीं तैन्हांं केरै पूर्वजा सिंउ तैस टैंमा क्यौरा थ्या,
जेख्णी मीं तैन्हांं केरा हत्थ पकड़ी करि सैक्यै मिस्र देशा किना भेईर कढि अंणै;
पण प्रभु बोलता, तैन्हैं मिंडै वायदै पन विश्वास ना केया,
ऐठणीरै तेईनी मीं तैन्हांं किना मुँह मौड़ि लियु।
10फिरी प्रभु बोलता,
कि जै वायदा मूं ऐईंणै बाई धियाड़िया मझ इस्राएलेरा मैहणुवां सिंउ कांना,
सै ऐ आ, कि मूं तैन्हांंनि अपड़ि व्यवस्थायरै बारै मझ सौचणा दींणु
जां तैन्हां सै व्यवस्था अपड़ा मंना मझ रखणी,
जां मूं सै तैन्हांं केरै दिला मझ लिखि दींणी,
जां तैन्हांं परमेश्वरेरै रूपा मझ मिंडी अराधना कांनी।
11जां हरेक अपड़ा दैश वासियानि जां रिश्तैदारानि ऐ शिक्षा ना दींणी, कि
तु प्रभु परियांण; केईनी कि हल्का मैहणुवां किना लै-करि बडा मैहणुवां तेईनी तैन्हांं सभनियां मनि लींणु, कि
आंउ तैन्हांं केरा परमेश्वर आ।
12मूं तैन्हांं केरै पाप माफ कांने,
जां तैन्हांं केरै पाप फिरी याद ना कांने।”
13परमेश्वरै ऐसनि अक नंवा समझौता बोला,
ऐठणीरै तेईनी तेनी पेहिला समझौता पुरांणा करि दित्ता
जां जै किछ बि पुरांणु आ, जां जै रगड़ियोरू-घशियोरू आ, सै नष्ट भूंणेरै तेईनी तियार आ।
Currently Selected:
इब्रानियों 8: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
