प्रेरितों के काम 12
12
हेरोदेसेरी हिंसा
1तैस टैंमा हेरोदेस राजै कुछ कलीसियानि दुख दींणैरै तेईनी कुछ विश्वासी मैहणु जैल्ही मझ सुटि दित्तै। 2जां तेनी खास चैला यूहन्नेरा भाई याकूबा तलवारी ला मारी छडणैरी आज्ञा दित्ती। 3जां जेख्णी तेनी तकाउ कि यहूदी मैहणु ऐहीं-चारै कांने ला खुश भुवै, ता तेनी पतरस बि गिरफ्तार करि ल्या। तैस टैंमा यहूदिया केरै अखमीरी रोटिरा त्यौव्हार थ्या। 4जां राजै हेरोदेसै पतरस पकड़वा करि जैल्ही मझ सुटि दित्ता, जां तेनी चोउवा-चोउवा सिपाहिया केरै चोउवा दला केरै पेहरै मझ रखा, हेरोदेस पतरसैरा फसहेरै त्यौव्हारा किना बाद मैहणुवां केरै सांमणै अणनेरै टैमैंरा इन्तजार काता थ्या ताकि सै तैस परीक्षाय मझ बारी सकिया।
पतरसैरा जैल्ही किना छुटकारा
5जैल्ही मझ बड़िया धियाड़िया किना पतरस पेहरै मझ थ्या, पण कलीसियेरै मैहणु पतरसेरै तेईनी परमेश्वरा किना सच्चै मंना किना प्रार्थना कातै थ्यै। 6जैस धियाड़ी राजा हेरोदेस पतरसा मैहणुवां केरै सांमणै फैसला कांनेरै तेईनी हाजिर कांने वा थ्या, तां तेसै राती पतरसेरै दोईयो हत्थ हथकड़ियै ला बंन्हौरै, दुवां सिपाहिया केरै बिच झुलोरा थ्या; जां चोकिदार दुवारा पनि बेशि करि जैल्हिरा पेहरा थ्यै दींतै। 7तां इकदम प्रभुरा अक स्वर्गदूत पतरसा किनि नीड़ अईछी करि खड़िया जां तैस जैल्ही मझ जेठि पतरस थ्या प्रगड़ु चमकु, जां तेनी पतरसेरी पसलि पन हत्थै ला थप-थप करि सै बियौल्हा, जां बौलु, उठ झट कर, तां पतरसेरी हथकड़ी खुलि करि भुईयां पै गैई 8तां स्वर्गदूतै तैस सेईतै बौलु, अपड़ै लिकड़ै जां अपड़ै बूट ला लै, तेनी तिहियें कियु, फिरी स्वर्गदूतै तैस सिंउ बौलु, अपड़ा भेईरियां चौआ ला जां मूं पिचोरै आ।
9पतरस तैस पीछै-पीछै भेईर या; पण तैस ना थ्या पता कि जै किछ स्वर्गदूत काता, सै सच-मझ भूंतु आ, पण ऐहीं संमझु कि आंउ सुपना तकांता। 10जेख्णी सै पेहिलै चोकीदारा केरै पेहरै किना फिरी दुवां पेहरेदारा किना निकोहि करि तैस लोहेरै फाटका किनि पुज्जै, जैस फाटकेरी बत्त नगरा धेरै आ सै लोहैरा फाटक तेन्हांनि अपड़ै आप खुलि ग्या, जां सै निकोहि करि ऐकिऐ गेही बत्तै ग्यै, तां अजागै स्वर्गदूत तैस छडि करि चलि ग्या। 11तां पतरसनि सुध-बुध यैई जां बौलणां लगा, अबै आंउ सच बुझि ग्या कि प्रभु अपड़ा स्वर्गदूत भेईजि करि आंउ राजा हेरोदेसेरै अधिकारा किना छडा दित्ता।, जां यहूदी अगुवो केरी मूं परीक्षाय मझ बांनैरी सारी आशा त्रौड़ी दित्ती।
12जेख्णी तेनी सौचु कि परमेश्वरै सै बचा लियौरा तां सै मरियमेरै घरै ग्या जै यूहन्ना मरकुसेरी माँ थी। जां तैठि बड़ै विश्वासी मैहणु प्रार्थना कांनेरै तेईनी किठै भौ गियोरै थ्यै। 13जेख्णी तेनी भेईरियुं दुवारेरी खिड़कि खटखटाय, तां रूदे नाँईयेरी अक दासी शुणननि यैई। 14जां पतरसेरी आवाज पछियांणी करि सै बड़ी खुश भुई, तेनी भेईरियुं द्वार ना खौलु; पण दाउड़ी करि अंदर यैई, जां तैस दासी सिंउ बौलु पतरस दुवारा पन खड़ा। 15तैन्हैं तैस दासी सेईतै बौलु, “तु पागल आ।” पण जेख्णी सै अपड़ि गलै पन अटकी गैई तां तैन्हैं बौलु, ऐ पतरसैरा स्वर्गदूत भूंणा। 16पण पतरस दुवार खटकांता रिय्हा, जेख्णी तैन्हैं दुवार खौलु ता तैस तका करि हैरान भौ ग्यै। 17तां तेनी तेन्हांनि हत्थै ला इशारा केया कि चुप रिय्हा; जां तैन्हांं सिंउ बौलु कि प्रभु किहीं चारै आंउ जैल्ही मझां अणां जां बौलु कि याकूब जां भाईयानि ऐ गल बोलि दैई, जां तैड़ां किना निकोहि ग्या जां होरी जगायनी चलि ग्या।
18भियागै जैल्हिरै सिपहिया मझ बड़ी उप-द्रव मचि गैई कि पतरस कोई ग्या। 19जेख्णी राजै हेरोदेसै तैस तौपणैरा आदेश दित्ता जां पतरस ना मैआ, तां तेनी पेहरेदारा किना तेठणिरै बारै मझ स्वाल पुच्छै, जेख्णी तैन्हैं किछ जुबाव ना दित्ता ता तेनी बौलु कि ऐन्हां मारी छडा जां सै यहूदिया प्रदेश छडि करि कैसरिया नगरा गहि करि किछ टैंम तैठि रिय्हा।
हेरोदेसेरी मोउत
20हेरोदेस सूर जां सैदा शहरेरै मैहणुवां किना बड़ा गुस्सै भौरा थ्या, सै अक मंन भौकरी तैस किनि यै, जां राजेरै अफसरा बलास्तुस मना करि तैन्हैं राजी-नामा कांना चाहा, केईनी कि अनाज घट भूंणेरी वजहि सिंउ सै राजेरै इलाके पन निर्भर थ्यै। 21जैस धियाड़ि राजै हेरोदेसै तैन्हांं शहरा केरै मैहणुवां सिंउ मिलणेरै बारै मझ सौचु तैस धियाड़ि सै राज वस्त्र ला करि सिंघासना पन बेठा; जां तेन्हांनि भाषण दींणा लगा। 22जै मैहणु तैठि शुणतै थ्यै, “तैन्हैं चिंडै दी करि बौलु, कि ऐ मैहणु ना पण दैवता बोलता।” 23तेसै टैंमा प्रभुरा अक स्वर्गदूत या जां सै मारा, केईनी कि तेनी परमेश्वरेरी महिमा ना की जां तेसेरै शरीरा कीड़ै पैई ग्यै जां मरि ग्या। 24पण परमेश्वरैरा वचन फैलता ग्या जां विश्वासिया केरी गिणती बधती गैई। 25यहूदियै इलाके मझ यहूदी विश्वासिया केरी मजत कांनेरै तेईनी पेईंसै दींणा किना बाद, बरनबास जां शाऊल यरूशलेम किना अन्ताकिया शहरानि वापस चलि यै, यूहन्ना मरकुस तैन्हांं सेईतै थ्या।
Currently Selected:
प्रेरितों के काम 12: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
