प्रेरितों के काम 11
11
पतरसेरू यरूशलेम वापस ऐईंणु
1खास चैलै जां यहूदिया प्रदेशेरै विश्वासी भाई जां भीणियां ऐ पता लगा कि होरनियां जातिया केरै मैहणुवें बि परमेश्वरैरा वचन मनि ल्या। 2जां जेख्णी पतरस यरूशलेम शहरा मझ या ता जै खतना क्यौरै विश्वासी थ्यै सैक्यै तेसैरी निंदा कांना लगै। 3कि “तु होरनियां जातिया केरै मैहणुवां केरै घरा मझ ग्या जां तैन्हांं सेईतै रोटी बि खई।” 4तां पतरसै सैकेई गलै जै कुरनेलिउसैरै घरा मझ भोरी थी, सै शुरू किना बारी-बारी समझाई जां बौलु;
5जेख्णी मीं याफा नगरा मझ प्रार्थना कातै टैंमा इकध्याना भौ करि अक दर्शन तका, कि अक बड़ी बडी चादरी जेतेई चीज चोउवो कूंणा किना असमांणा हैट धरती पन मूं किनि उतारियूंति थी। 6जेख्णी मीं सै तकाउ ता तेत मझ चोउवा पैयिड़ै बाऐ पशु, जंगली पशु, पृथ्वी पन रैंगने बाऐ जीव-जन्तु जां असमांणेरै पंछी थ्यै। 7तां मीं अक हक शुणि, जेनि बौलु, “हे पतरस उठ, ऐन्हां मार जां खा लै।” 8पण मीं बौलु, “ना प्रभु, कदि ना, केईनी कि मीं कदि कोई अपवित्र जां अशुद्ध चीज ना खाउरी।” 9फिरी दुबारे मीं सुरगा किना सैहै आवाज शुणि कि, जै किछ परमेश्वरै शुद्ध करि दित्तु, तेसनी अशुद्ध मेईं बोलै। 10त्रा बारी ऐहियें हक लगी; तैड़ां किना बाद इकदम सै चादर असमांणनी उछुई गैई। 11तेसै टैंमा कैसरिया नगरा किना जै कुरनेलियुसै मूं किनि भेईजोरै थ्यै त्रा मैहणु तैस घरा सांमणै पुजि ग्यै जेठि असै रुकोरै थ्यै। 12तां पवित्र आत्माय मूंनी आदेश दित्ता कि तु बेझिझक भौ करि तैन्हांं सिंउ गा जां ऐ छी भाई बि मूं सेईतै चलै; फिरी असै तैस मैहणुरै घरा मझ ग्यै। 13तेनी असुनि शुणाउ, कि मीं अपड़ै घरा मझ अक स्वर्गदूत खड़ा तका, जेनि मूं सेईतै बौलु कि, कोसक्यै मैहणु याफा नगरा मझ भेईज जां शमौन जैसनि पतरस बि बोलतै, तैस शदा लै।
14तैस ताउनि ऐतेई गलै शुणेणी, जेनि ला परमेश्वरा तु जां तिंडै घरांनेरै सारै मैहणु तेसेरै जरियै बचाणै। 15जेख्णी मीं बोलणु शुरू कियु, ता पवित्र आत्मा जिहीं पिन्तेकुसेरै त्यौव्हारेरै टैंमा असु पन उतरौरा थ्या, तिहियें कुरनेलियुस जां तेसेरै घरानेरै मैहणुवां मझ बि उतरा। 16तां मूं प्रभु यीशुरी सै गल याद यैई जै तेनी बोलोरी थी, यूहन्ने ता पांणी ला बपतिस्मा दित्ता, पण तुहांनि पवित्र आत्मायरा बपतिस्मा मेईंणा। 17ऐठणीरै तेईनी जेख्णी परमेश्वरै असुनि बि सैहै वरदान दित्ता जेख्णी असुवें प्रभु यीशु मसीह पन विश्वास केया; ता आंउ जांणता कि आंउ परमेश्वरा ना रौकि सकता। 18ऐ शुणि करि सै यहूदी विश्वासी शांत भौ ग्यै, तैन्हैं ऐहीं बोलि करि परमेश्वरेरी महिमा की, “तां ता परमेश्वरै होरनियां जातियनि बि ऐ वरदान दित्ता कि सै बि अनन्त जीवनेरै तेईनी अपड़ै पापा किना मंन फेरिया जां यीशु मसीह पन विश्वास करिया।”
अन्ताकियेरी कलीसिया
19स्तिफनुसा मांना किना बाद तैन्हैं विश्वासी सताय जां किछ विश्वासी यरूशलेम शहर छडि करि होरी जगाईनी चलि ग्यै, जां सै हंठतै-हंठतै फीनीके प्रदेशा जां साइप्रस टापु जां सीरिया प्रदेशेरै अन्ताकिया शहरा मझ पुजि ग्यै; पण यहूदिया छडि करि कोसक्यै होरैनि परमेश्वरैरा वचन ना शुणाईंथ्यै। 20पण किछ तैन्हांं मझ साइप्रस किना जां किछ कुरेन किना थ्यै, जै अन्ताकिया शहरा मझ यै जां जेख्णी सै तैठि थ्यै ता तैन्हैं होरी जातियनि बि प्रभु यीशु मसीहरी खुशखबरी शुणाय। 21जां तैन्हांं पन प्रभुरी सामर्थ थी, जां होरनियां जातिया केरै बड़ै सारै मैहणुवें शुभ खुशखबरी पन विश्वास केया जां प्रभु यीशु मसीह पन विश्वास कांना शुरू केया।
22ऐक्या समाचार यरूशलेमेरी कलीसियै मझ बि पुज्जा ऐठणीरै तेईनी तैन्हैं बरनबास अन्ताकिया शहरानि भेईजा। 23तैठि पुजि करि जेख्णी बरनबासै परमेश्वरैरा अनुग्रह लधा ता सै खुश भौ ग्यै। तैन्हैं सभनियांंनि होंसला दित्ता कि सच्चै दिल सिंउ प्रभुरै तेईनी पूरी तराहि सिंउ ईमानदार बंणी रिय्हा। 24सै बरनबास भला मैहणु थ्या; जां पवित्र आत्माय जां विश्वासै ला पूरी तराहि सिंउ भरियोउरा थ्या; जां बड़ै मैहणु प्रभु मझ अईछी ग्यै।
25तां बरनबास अन्ताकिया शहरा छडि करि शाऊला तौपणेरै तेईनी तरसुस नगरानि चलि ग्या। 26जां जेख्णी बरनबास तैठि शाऊला सिंउ मिला ता सै शाऊला अन्ताकिया नगरा लै या। शाऊल जां बरनबास दोईयो पूरै एकि साला तेईनी तेठणीरा विश्वासिया सेईतै रिय्है; जां बड़ा-सारा मैहणुवंनी प्रभु यीशुरै बारै मझ उपदेश दींतै रिय्है। चैलानि सभनियांं पेहिलै अन्ताकिया मझ मसीही बोलथियु।
27तैन्हांं धियाड़िया किछ विश्वासी जै भविष्यवक्ता थ्यै, सै यरूशलेम शहरा किना अन्ताकिया नगरा मझ यै। 28तैन्हांं मझां अक भविष्यवक्ता जेसैरू नाँ अगबुस थियु, सै खड़ा उठा जां पवित्र आत्मायरी सामर्थी ला तेन्हांनि शुणांउ कि पूरी पृथ्वी पन बड़ा-बडा अकाल पूंणारा। ऐ अकाल सही मझ सम्राट क्लौदियुसेरै राज्यकालेरै टैंमा पेईथ्या। 29तां चैलै फैसला केया कि हर-एकि मैहणु अपड़ि कमाई मझां जैस किनि ज्योतु तियु आ तेनी हिसाबै सिंउ जै यहूदी प्रदेशा मझ विश्वासी भाई-भींण अत्तै तेन्हैरी मजत कांनेरै तेईनी किछ भेईजिया। 30जां तैन्हैं तिहियें कियु; जां तैन्हैं बरनबास जां शाऊलेरै हत्था खास चैलानि किछ पेईंसै भेईजै।
Currently Selected:
प्रेरितों के काम 11: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
