2 कुरिन्थियों 4
4
खुशखबरिरा प्रचार
1ऐठणीरै तेईनी असु पन ऐतेई दया भुई, कि परमेश्वरैरा सन्देश प्रचार कांनेरी असुनि सेवकाय मेयि, ऐठणीरै तेईनी असै निराश ना भूंतै। 2पण असै शर्मनाक जां घटिया कंम जै छपि कर भूंतै, सैक्यै छडि दितोरै अत्तै। असै ना ता छल-कपट कातै, ना ऐ परमेश्वरैरा जै वचन आ, तेसैरा अलग-अलग मतलब शुणांतै। असै परमेश्वरै सांमणै सिर्फ सच-ऐ शुणांतै। हर कोई गवाहि दी सकता, कि ऐ सही आ।
3जैस खुशखबरिरा प्रचार असै कातै अत्तै, ऐ तैन्हांं मैहणुवां समझ ना ऐईंती जै गलत कंम कातै रींहथै; केईनी कि सैक्यै मुकणेरी बत्तै चलोरै भूंतै। 4इस संसारैरा भगवान, जै शैतान आ, तेनी तैन्हांं अविश्वासी मैहणुवां केरी बुद्धी मलीन करि दितोरी आ; ताकि मसीह तैस खुशखबरिरा जै सन्देश आ, तैस ना समझि सकिया; केईनी कि खुशखबरिरी महिमाय ला असु पता लगी गांहथा, कि सचमझ परमेश्वर केतिया आ। 5असै खुद अपड़ा प्रचार ना कातै, पण असै ता ऐ प्रचार कातै, कि यीशु मसीह-ऐ प्रभु आ जां असै यीशुरी वजहि ला तेसेरै सेवक अत्तै। 6ऐठणीरै तेईनी परमेश्वरै बौलु, “अन्धारू मझां प्रगड़ु चमकिया” जां परमेश्वरै ज्योति सैयि असेड़ै दिला मझ समझ दित्ती, ताकि असै परमेश्वरेरी सै महिमा तका सकिया, जै यीशु मसीह मझ प्रकट भूंती।
मिट्टिरा भांडा मझ धन
7अबै असैड़ा दिला मझ ऐ प्रगड़ु चमकतु आ; जां असै मिट्टिरा तैन्हांं नाजुक भांडा सैयि अत्तै, जैन्हां मझ ऐ खजाना भरौरा। ऐ योउती सामर्थ, जेसैरा कोई अन्दाजा ना, ऐ असेड़ि ना, पण परमेश्वरेरी सामर्थ आ। 8असुनि बड़ी सारी परेशानी पियोरी भूंती; पण असै कदि निराश भौ-करि हार ना मनतै। 9असु पन अत्याचार भूंता, पण असै अपांणा छडावरा ना भूंता, असु गिरांणेरी कोशिश भूंती, पण असै नाश ना भूंतै। 10असै हर टैंम अपड़ै शरीरा मझ तैन्हांं दुखा मैहसूस कातै, जै दुख यीशु मसीह सहन केईथियै, जेख्णी सैक्या क्रूसा पन माथिया; ताकि जै कम असै कातै, तैन्हैं ला मैहणुवां बि पता लगिया, कि यीशु मसीहरा जीवन केतिया थ्या।
11केईनी कि यीशुरी वजहि ला असु जीते-जी हमेशा मारी छडणैरा खतरा रींहथा, ताकि यीशुरा जीवन असेड़ै नाश भूंणै बाऐ शरीरा मझ साफ तौर पन लाधी ऐईछिया। 12ता ऐसेरा मतलब ऐ आ, कि असै लगातार मोउतिरा सांमना कातै अत्तै; पण ऐठणीरा नतीजा ऐ आ, कि तुहांनि अनन्त जीवन मेऔरा।
13पवित्र शास्त्रा मझ लिखोरू आ, “मीं विश्वास क्यौरा थ्या ऐठणीरे तेईनी मीं बोलु।” असु मझ विश्वासेरी सेहै आत्मा आ जां असै बि विश्वास कातै ऐठणीरे तेईनी असै बि बोलतै। 14केईनी कि असु पता, कि जेनि प्रभु यीशु मसीह मौरा मझ जींता केया, तेसै परमेश्वरा असै बि यीशु सिंउ रींहणेरै तेईनी जींतै कांने जां तुहां मैहणुवां सिंउ असै बि अपड़ै सांमणै खड़ै कांने। 15ऐठणीरै तेईनी आंउ बोलता, कि ऐ जै सभ-किछ भूं, तुवाड़ी मजत कांनेरै तेईनी आ, ताकि होरा जादा मैहणुवंनी पता लगी गांहणा, कि परमेश्वर क्यौता दयालु आ जां बड़ा सारा मैहणुवां परमेश्वरैरा आदर जां तारीफ कांनी।
दुबारे जींतियुंणा पन पूरा भरौसा
16ऐठणीरै तेईनी असै निराश ना भूंतै; असैड़ा भेईरियां शरीर कमजौर भूंता, तांबि असैड़ा आत्मा दिन-प्रतिदिन नवाँ भूंता। 17असेड़ि इस टैंमेरी मुश्किलै जादी नति जां ऐ जादा देर ना रींहणी; केईनी कि ऐन्हैं ला अनन्त महिमा भूंणी, जै तैन्हांं सभनियां चीजा किना जादी भूंणी, जेसेरी असै कल्पना ना करि सकतै। 18केईनी कि असै अपड़ा ध्यान तैन्हांं चीजा पन ना ला, जै लाधी ऐईंती; पण तेत पन ला, जै लाधी ना ऐईंती। जै किछ लाधी ऐईंतु, सै थोड़ी देर तेईनी आ; पण जै लाधी ना ऐईंतु, सै अनन्त काल तेईनी बंणी रींहथु।
Currently Selected:
2 कुरिन्थियों 4: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
