2 कुरिन्थियों 2
2
1ऐठणीरै तेईनी मीं मंना मझ सौचि लियु, कि आंउ तुहां दुखी कांनानि दुबारे तुहां किनि ना ऐईछूं। 2केईनी कि अगर आंउ तुहांनि दुख दींता, ता मूंनी खुशी दींणार केणु भूंणा? तुवे-ऐ मैहणु ता मूंनी खुशी दींणार अत्तै, जैन्हांनि मीं दुख दितौरा थ्या। 3जां मीं ऐ गलै तुहांनि ऐठणीरै तेईनी लिखि, कि जेख्णी आंउ तुहां किनि ऐईछूं, ता जैन्हां किना मूंनी खुशी मेईंणी चेहिंथी थी, ता तैन्हांं किना दुख ना मेईया; केईनी कि तुहां सभनियां पन मूं ऐस गलैरा भरौसा, कि मिंडै खुश भूंणै ला तुवे बि खुश भूंणै। 4केईनी कि मीं तुहांनि ऐ चिट्ठी बड़ा दुखा जां परेशानियां मझ लैरी दी-दी करि लिखोरी आ; पण ऐ तुहांनि ऐठणीरै तेईनी ना लिखु कि तुहां ऐन्हां गला केरा दुख लगिया; पण ऐ ऐठणीरै तेईनी लिखु कि तुहां पता लगी गहिया कि आंउ तुहां सिंउ क्यौता प्रेम काता।
अपराधिनी माफी
5जां अगर कुनिक्यै उदास क्यौरा, जेनि मैहणु ऐकेई परेशानि पेईदा की तेनी मूं किना जादा तुहां सभनियांंनि दुख दितौरा, (आंउ तेसेरै पाप बधैई-चढ़ाई करि ना बोलणा चांहथा।) 6ऐतियै मैहणुनी तुहां मझां बड़ै विश्वासियै जै सजा दित्ती, सैकेई बड़ी आ। 7ऐठणीरै तेईनी ऐत किना अच्छु ऐ आ, कि तेसैरा अपराध माफ करा जां तेसनी तसल्ली देया। अगर तुवे तेसनी माफ ना कातै ता, क्या पता सैक्या यौउता दुखी भौ करि निराश भौ गहिया जां हार मनि लिया। 8ऐठणीरै तेईनी आंउ तुहां सिंउ विनती काता, कि तेसनी तसल्ली देया, कि तुवे ऐम्हीं बि तैस सिंउ प्रेम कातै। 9केईनी कि मीं ऐ तुहांनि ऐठणीरै तेईनी बि लिखोरू थियु, कि तुहां परखी लियु, कि जै आंउ तुहांनि शुणांता, तेठणीरा पालन कांनेरै तेईनी तियार अत्तै कि नत्तै। 10पण जैसनि तुवे माफ कातै, तेसनी आंउ बि माफ काता। जेख्णी मूं माफ कांनेरी जरूरत भूंती ता, आंउ तुवाड़ी भलाईरै तेईनी मसीहरै हक सिंउ माफ करीं दींता। 11ताकि शैतान असेड़ै हालाता केरा कोई बि फायदा ना लिया; केईनी कि असै तेसेरै बुरै मकसदा जांणतै।
मकिदुनिया प्रदेशनी गांहणु
12जेख्णी आंउ त्रोआस नगरा मझ मसीहरी खुशखबरी शुणाणेरै तेईनी या, ता तैड़ी परमेश्वरै मूंनी खुशखबरी प्रचार कांनेरै तेईनी बधिया मौका दित्ता। 13पण जेख्णी तीतुस तुहां किना कोई सूचना लै करि ना या, ता मूं तेसेरी चिन्ता भूंणा लगी; ऐठणीरै तेईनी आंउ त्रोआस शहरेरा विश्वासिया किना इजाजत लै करि तीतुसा तौपणनी मकिदुनिया प्रदेशनी चलि या।
मसीह मझ जितणैरा त्यौव्हार
14परमेश्वरैरा धन्यवाद भुईया, जै मसीह सिंउ असेड़ै रिशतेरै कारण, सैक्या हमेशा असु सिंउ चलता जां असु कदि निराश ना भूंणा दींता; जां असै जैड़ि बि गांहथै; परमेश्वर असु किना यीशु मसीहरी खुशखबरिरा प्रचार करांता, ताकि सभ मैहणु परमेश्वरा जांणि सकिया। 15केईनी कि असै मसीह मझ परमेश्वरेरै तेईनी जाओरू धूपा सैयि अत्तै; जां जै असै मसीहरा प्रचार केया, सै खुशखबरी तैन्हांं मैहणुवां केरै तेईनी तैस धूपेरी खुशबू सैयि आ; जै खुशबू उद्धार भूंणारा जां नाश भूंणारा दोईयो केरै तेईनी आ। 16पण तैन्हांं मैहणुवां केरै तेईनी जै मुकणेरी बत्तै पन अत्तै, सैक्यै मोउतिरी ऐतेई मुस्की मझ अत्तै, जै तैन्हांं नरका धेरै लै गांहथी; पण तैन्हांं मैहणुवां केरै तेईनी जै जीवनेरी बत्तै (जेदि मैहणुरा उद्धार भूंता) गांहथै, ता तैन्हांं केरै तेईनी ऐ ऐतेई खुशबू आ, जै नवें जीवना धेरै, जै स्वर्गा मझ आ, तेदि लै गांहथी। हकीकत मझ परमेश्वरेरी मजति बगैर ऐ खशुबू कौ बि मैहणुवां मझ ना फैलाय सकता। 17केईनी कि असै तैन्हांं मैहणुवां सैयि नत्तै, जै पेईंसा केरै तेईनी परमेश्वरैरा वचन प्रचार कातै; पण असै परमेश्वरेरै वचनेरा प्रचार सच्चाई जां मसीहरै हकै ला कातै; केईनी कि असु पता आ; कि परमेश्वर असुवां तकांता।
Currently Selected:
2 कुरिन्थियों 2: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
