1 तीमुथियुस 6
6
मसीह दासा केरा बर्ताव
1जेत्थरै बि विश्वासी जै दास अत्तै, तैन्हांं हर तराहि सिंउ अपड़ै-अपड़ै मालिका केरा आदर कांना चेहिंथा, ताकि होरै मैहणु परमेश्वरैरा जां असेड़िया शिक्षाईया केरी निंदा ना करिया। 2जां जेन्हैरै मालिक विश्वासी अत्तै, सैक्यै अपड़ै मालिका केरा आदर करिया, केईनी कि अबै ता सै तैन्हांं सैयि विश्वासी अत्तै; सै अबै तेन्हैरी सेवा हौरा बि जादा मंन ला करि करिया, केईनी कि ऐत किना फायदा लींणार विश्वासी भाई भींण अत्तै; तेन्हांनि ऐकेई ऐ गलै कांनी शिख्रा जां मैहणुवंनी बि तैन्हांं कांनेरै तेईनी बोल।
झूठी शिक्षा जां पेईंसा केरा लालच
3अगर कोई झूठी शिक्षा दींता जां असेड़ै प्रभु यीशु मसीहरी खुशखबरी जां परमेश्वरेरी भक्तिरी शिक्षाय किना सहमत ना भूंता, 4सै घमण्डी आ जां किछ बि ना समझता, ऐतिया मैहणु बहस जां बेकार गला पन झगड़ा कांना चांहथा। जेसैरा नतीजा जलन, झगड़ा जां होरनियां केरी बुराई जां गलत शक, 5जां योकिया सिंउ कदि ना मुकणै बाऐ झगड़ै अत्तै। तेन्हैरा दिमाक खराब भौ गियौरा जां तैन्हांं अबै समझ ना लगती कि सच्चाई कितु आ। सै समझतै कि परमेश्वरेरी सेवा कांनी अमीर भूंणैरा तरीका। 6पण असेड़ै तेईनी ऐ खरू आ कि असै सैहै करिया जेनि ला परमेश्वर खुश भूंता। जां तेस मझ खुश बेशा जै सै असुनि दींता। 7केईनी कि जेख्णी असै इस संसारा मझ येईथ्यै ता असै संसारा मझ किछ बि लै करि ना थ्यै यौउरै जां ना किछ इस संसारा मझ मरि करि नीं सकतै। 8अगर असु किनि खांणनी रोटी जां लांणैनी लिकड़ै अत्तै, ता असु ऐन्हां मझ खुश रींहणु चेहिंथु। 9पण जै अमीर भूंणा चांहथै अत्तै, सैक्यै हर प्रकारेरी बुराई कांनेरै तेईनी आसानी सिंउ धोखै मझ अईछी करि फसी गांहथै जां एकि जानवरा सैयि फंदै मझ फसी गांहथै। सैक्यै तैन्हांं कंमा कांना चांहथै जै तेन्हैरै तेईनी मूर्खै बाऐ जां खतरनाक अत्तै, जां ऐकेई ईच्छाय तैन्हांं मुकणेरी बत्तै लै गांहथी जां नाश करि दींति। 10केईनी कि पेईंसा केरा विश्वास जां लालच सभनियांं बुराईया केरी जड़ आ। किछ मैहणुवें बलै-बलै मसीहरी शिक्षाईया पन विश्वास कांना बंद करि दिता, केईनी कि सै पेईंसा बड़ा चहींथ्यै, जां तैन्हैं अपांणा केहिया दुखा मझ सुटा। सै बुरी तराहि सिंउ दुखी अत्तै, एकि ऐतियै मैहणु सैयि जेनि अपांणा हथियारै ला छिन-भिन करि लियौरा।
तीमुथियुस सिंउ विनती
11पण हे तीमुथियुस, तु परमेश्वरेरी सेवा कांनार मैहणु आ, तांउ ऐन्हां सभनियांं गला कांना किना बचणु चेहिंथु; जै सही आ सिर्फ तैसै कांनेरी कोशिश कर। अक ऐतिया जीवन जी, जै परमेश्वरानि आदर दींणै वा भुईया। मसीह पन भरौसा रखि करि होरनियां मैहणुवां सिंउ प्रेम कर। कदि बि हार मेईं मनै जां होरनियां मैहणुवां केरै तेईनी नम्र बणै। 12युद्ध कांना मझ एकि अच्छै सिपाहि सैयि बंण, जै कदि हार ना मनता। ताउ बि तैस सैयि परमेश्वरा पन भरौसा जां तैसेरीये आज्ञाय मनणी ना छडणी चेहिंथी जां तैस अनन्त जीवना मजबूती सिंउ पकड़ी रख, जेठणीरै तेईनी तु शदाउरा जेख्णी बड़ा मैहणुवां केरै सांमणै तीं बड़ी मजबूती सिंउ बोलोरू थियु, कि तु मसीह पन भरौसा रखता। 13परमेश्वरा गवाह मनि करि जै सभनियांनि जीवन दींता जां यीशु मसीह बि गवाह मनि करि जेनि पुन्तियुस पिलातुस किनि अपड़ै बारै मझ सच बोलोरू थियु। आंउ ताउनि ऐ आज्ञा दींता, 14कि तु सै सभ-किछ जैस पूरी तरह सिंउ कांनेरै तेईनी परमेश्वरै ताउनि आज्ञा दितोरी आ, ताकि कौ बि प्रभु यीशु मसीह वापस ऐईंणा तेईनी ताउ पन किछ बि गलत कांनेरा आरोप ना ला सकिया। 15परमेश्वर जै एकमात्र राजा आ, जै तारीफिरै काबिल आ। सै राजा केरा राजा जां प्रभुआ केरा प्रभु आ; तेसै मसीह सही टैंमा पन प्रकट कांना। 16जां सिर्फ सै अकै आ जै हमेशा जींता जां सै योउतु चमकदार प्रगड़ु मझ बेशता कि कौ बि तैस नीड़ ना अईछी सकता जां ना सै कुनि मैहणु तकाउरा ना तैस कौ कदि तका सकता। तेसैरी माहिमा जां सामर्थ युगानुयुग भूंती रिय्हा। आमीन।
धनवाननि निर्देश
17इस संसारेरै अमीर मैहणुवंनी ऐ आदेश देया कि सैक्यै घमण्डी ना बंणिया जां अपड़ै धना पन आशा ना रखिया, जै कि जादा टैंम ना रींहणा, पण परमेश्वरा पन भरौसा रख, जै खुलै-दिलै सिंउ असुनि सै सभ चीजै दींता, जेसैरी असुवां जरूरत आ, ताकि असै तेठणीरा आनन्द लै सकिया। 18तेन्हांनि बड़ै सारै भलै कंम कांननी बोल जां होरनियां केरै तेईनी जै बि जरूरी आ, तैस खुलै-दिलै सिंउ बंडतै रिय्हा। 19ऐहीं करि-करि सैक्या अपड़ै भलै कंमा केरै तेईनी अक ऐतिया खजाना जोड़तै, जै ऐईंणै बाऐ टैंमा स्वर्गा मझ एकि डुघी नीहैं सैयि भूंणा जां तैन्हांं सच्चा जीवन प्राप्त कांना जै हमेशा तेईनी भूंणा।
20हे तीमुथियुस, तु ऐ तय कर कि जै परमेश्वरै ताउनि दितोरू आ, तु सैहै काता। अधर्मी, व्यर्थ जां तैन्हांं शिक्षाईया किना दूर बेश, जै परमेश्वरेरी सच्ची शिक्षायरा विरोध काति। जैसनि सै गलत तरीकै सिंउ ज्ञान बोलतै। 21किछ मैहणुवें ऐ ज्ञान ग्रहण करि लियौरा जां ऐहीं करि-करि सैक्यै अबै मसीहरी सच्चिया शिक्षाईया पन विश्वास ना कातै। आंउ प्रार्थना काता कि परमेश्वरैरा अनुग्रह तुहां सभनियां पन बंणी रिय्हा।
Currently Selected:
1 तीमुथियुस 6: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
