1 तीमुथियुस 5
5
विश्वासिया सिंउ बर्ताव
1ऐपु किना बडी उम्रिरै मैहणु झिड़खाय करि तेसेरी बेजती मेईं काता; तेसैरा आदर कर जिहीं तु अपड़ै बाबेरा आदर काता जां सै मैहणु जै ताउ किना हल्कै अत्तै, तैन्हांं सिंउ अपड़ै हल्कै भाई समझि करि बर्ताव कर;
2तु बुढिया जनेनियां केरा आदर कर, जिहीं अपड़ि मयिरा आदर काता जां अपड़ि हल्की उम्रि बाई जनेनियां अपड़ि भींणी सैयि पवित्र समझि करि तेन्हैरा आदर कांना चेहिंथा। 3तैन्हांं विधवाईया केरै प्रति आदर लुहा, जैन्हां किनि तेन्हैरी जरूरती पूरी कांनार जां तेन्हैरी देखभाल कांनार कौ ना। 4पण अगर विधवाय किनि अपड़ै छोकरू-छोकरी या धियोत्रु-पोत्रु भुईया, ता पेहिलै सै अपड़ै परिवारेरै प्रति अपड़ि जिम्मेवारी पूरी कांनी शिख्रिया, जिहीं एकि मसीह विश्वासी कांनु चेहिंथु। जां दादै-दादिरी देख-भाल करि-करि किछ करिया, केईनी कि परमेश्वरा ऐहै अच्छु लगतु। 5सै विधवा जेसैरी देख-भाल कांनार कौ ना भूंता, सै परमेश्वरा पन आशा रखती जां मजतिरै तेईनी रात-धियाड़ी परमेश्वरा सिंउ विनती जां प्रार्थना कांना मझ लगौरी रींहथी। 6सै विधवाय जै अपड़ा सारा टैंम भोग-विलासा मझ गुजारती, शरीरा मझ ता जींति अत्ति पण आत्माय मझ मोरी अत्ति। 7तुवे ऐठणीरै बारै मझ विश्वासियनि चेतावनी देया, ताकि कौ बि तैन्हांं पन आरोप ना ला सकिया।
8पण अगर कोई अपड़ै रिश्तैदारा केरी, खास कर अपड़ै परिवारैरी देख-भाल ना करिया ता सै विश्वास छडि बेठौरा जां अविश्वासी किना बि बुरा हाल आ।
9विधवाय जनेनियां केरी लिष्टी मझ तेन्हैरूवे नाँ लिखियूंणु चेहिंथु, जेसैरी उम्र शट्ठा साला किना प्रन भुईया जां अपड़ै लाड़ै सिंउ वफादार रिय्होरी भुईया। 10जां भलै कंमा मझ तेसैरू नाँ भुईया, मतलब तेनी अपड़ै छोकरूवा केरा पालन-पोषण अच्छी तरह सिंउ क्यौरा भुईया। मेहमाना केरी सेवा क्यौरी भुईया, तेनी एकि दासी सैयि होरनियां केरी सेवा क्यौरी भुईया, दीन-दुखिया केरी सेवा क्यौरी भुईया जां तैन्हैं हर एकि भलै कंमेरै तेईनी अपांणा त्यागी दितौरा भुईया।
11पण जुवान विधवायरू नाँ लिष्टी मझ मेईं लिखतै, केईनी कि जेख्णी तेन्हेरी शरीरिक ईच्छाय मसीहरी सेवा कांनेरै वायदै किना जादी मजबूत भौ गांहथी ता सै दुबारे ब्याह कांना चांहथी। 12दुबारे ब्याह करि-करि सैकेई अपड़ै-आपा दोषी बणांती, केईनी कि तैन्हैं दुबारे ब्याह ना कांनेरा अपड़ा पेहिला वायदा पूरा ना केया। 13जां ऐठणीरै अलावा घर-घर घुमणु तेन्हैरी आदत बंणी गांहथी, जां आलसी रींहणु शिख्री गांहथी। जां सै सिर्फ आलसी-ऐ ना रींहथी, पण बक-बक काति जां होरनियां केरै कंमा मझ दखल दींति जां ऐतेई गलै बोलती, जै तैन्हांं ना बोलणी चेहिंथी। 14ऐठणीरै तेईनी आंउ ऐ सलाह दींणा चांहथा कि जुवान विधवाय ब्याह करि लिया जां बच्चै जमियां जां कोसक्यै बिरोधिनी मौका मेईं दिया कि तैस बदनाम करिया। 15केईनी कि किछ जुवान विधवाय पेहिलै परमेश्वरा किना दूर भौ गियोरी अत्ति जां परमेश्वरा छडि करि शैताना पिचोरै चलणु शुरू करि दितोरू आ। 16अगर कोसक्यै विश्वासी जनेनिरै परिवारा मझ विधवाय अत्ति, ता तैस अपड़ै परिवारा मझ विधवाईया केरी देख-भाल कांनेरै तेईनी कलीसियैनि ना चेहिंथु बोलणु। कलीसिया तैन्हांं विधवाईया केरी मजत करि सकती, जेन्हैरी मजत कांनार कौ बि ना।
वचन शिख्रांणै बाऐ अगुवेरा आदर
17कौ बि अगुवा जै अपड़ा कंम सही ढ़ग सिंउ काता ता सैक्या सही आदर जां सही मजदूरी लींणेरै योग्य समझियुंणा चेहिंथा; खास तौर पन खास चैलै जै परमेश्वरैरा वचन शिख्रांणा मझ जां प्रचार कांना मझ तकड़ी मैहनत कातै। 18केईनी कि पवित्र शास्त्रा मझ ऐ लिखोरू आ कि; “अउवी पन दाँदा गैतै टैमां दाँदेरू मुहां पन छिक्कै मेईं बंन्थै, केईनी कि अनाजा सै फंडता बि।” जां होरी जगाय पवित्र शास्त्र ऐ बि बोलता कि “मजदूर अपड़ि मजदूरिरा हकदार आ।” 19कलीसियेरै कोस बि अगुवेरै खिलाफ लाउरै पापैरा आरोप त्यो-तेईनी मेईं शुणै, ज्यो-तेईनी दो या त्रा जंणै एकि-ऐ गलैरा तैस पन आरोप ना लईया। 20जै मैहणु पाप कातै, तेन्हांनि सभनियांं केरै सांमणै झिड़खै दै, ताकि होरै विश्वासी बि पाप कांना किना डरिया। 21आंउ परमेश्वरा जां यीशु मसीह जां चुणोरै स्वर्गदूता हाजिर समझि करि ताउनि आज्ञा दींता कि तु कोस बि तराहिरा भेदभाव ना करिया। बिना पक्षपात कांने बगैर ऐन्हां गला मनियां कर, जां कोस बि कंमा मझ भेद-भाव मेईं करै। 22कोसक्यै पनि इकदम हत्थ रखि करि तैस एकि अगुवेरै रूपा मझ नियुक्त मेईं करै ज्यो-तेईनी सै अपड़ै-आपानि मसीहरै रूपा मझ विश्वास योग्य साबित ना करिया, अगर तु ऐहीं काता ता तु बि तेसेरै पापा केरा जिम्मैवार भूंणा; अपड़ै आपा पवित्र बंणा रख।
23तुवे अबै सिर्फ पांणियै मेईं पींतै, पण अपड़ै पैटा मझ घड़ि-घड़ि दुखेरी वजहि ला थोड़ा-थोड़ा अंगूरा केरा रस बि पियां करा।
24आंउ ताउनि कोसनि बि जल्दबाजी मझ चुणननी ना बोता, केईनी कि किछ मैहणु खुलै-आम पाप कातै। यौ-तेईनी कि न्याय भूंणा किना पेहिलै सै विश्वासिया केरै सांमणै सही मझ दोषी अत्तै, पण किछ मैहणुवां केरै क्यौरै पाप बाद मझ लाधी ऐईंतै 25तिहियें जेख्णी मैहणु अच्छै कंम कातै, ता होरै विश्वासी बि तैस अच्छी तराहि सिंउ तकांतै; पण अगर सै तैन्हांं अक बारी जुगतीं ना तका लींतै, तां बि सै जादी देर तेईनी छपि बि ना सकतै।
Currently Selected:
1 तीमुथियुस 5: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
