1 कुरिन्थियों 9
9
खास चैला केरै कंम जां अधिकार
1जै किछ आंउ कांना चांहथा, तैस कांनेरै तेईनी आंउ आजाद आ। आंउ अक खास चैला, मीं असैड़ा प्रभु यीशु मसीह तकाउरा। तुवे प्रभुरै तेईनी, जै मीं सेवा क्यौरी आ, तेठणीरा नतीजा अतै। 2अगर होरै मैहणु ऐ स्वीकार ना कातै, कि आंउ प्रभु यीशु मसीहरा खास चैला; पण तुहां विश्वासी भाईया ऐ मनि लींणु चेहिंथु कि आंउ सैहै आ, जै तुहां किनि खुशखबरी लै करि यौउरा थ्या। प्रभु यीशु मसीह मझ ऐक्या तुवाड़ा विश्वास ऐ स्पष्ट काता कि आंउ हकीकत मझ खास चैला।
3जैन्हां मैहणुवां केरै मंना मझ ऐ शक आ, कि आंउ खास चैला, कि ना; तेन्हैरै तेईनी ऐहै मिंडा बधिया जुबाव आ। 4मूंनी जां बरनबासनी खास चैला भूंणै ला ऐ हक आ, कि असुनि अपड़ि ऐस सेवायरै कंम कांनेरै तेईनी आर्थिक मजत मेईया। 5केईनी कि होरै खास चैलै जां प्रभुरा भाई याकूब जां कैफा, यहूदा जां पतरस अपड़ि लाड़िया सेईतै लै गांहथै, जेख्णी सैक्यै यात्रा कातै। ता मूं किनि बि ऐ हक आ, कि कोसक्यै विश्वासी लाड़ी सिंउ ब्याह करि-करि सेईतै लै चलूँ। 6क्या मूं जां बरनबासनी बि होरनियां खास चैला सैयि आर्थिक मजत लींणी जां क्या अपड़ि मजत कांनेरै तेईनी कंम कांनेरी जरूरत ना?
7कोई बि सैनिक जै सैनाय मझ कंम काता, तेसनी तनखा दींणार हौरा भूंता। केणु आ जै अंगूरा केरा बगीचा ला करि तैन्हांं ना खांता? जै पशुवा पाअता, सैक्या तेन्हैरू दुध बि पींता। 8आंउ मैहणुवां केरै रीति-रिवाज तका करि ना बोलता, पण मूसेरी व्यवस्थाय मझ बि ऐहै गल आ बोलोरी।
9मूसेरा कानून बि ऐहै गल काता, व्यवस्थाय मझ ऐ लिखियोरू आ कि “जै दाँद कंम कमूंता, तेसैरू मुँह ना बंन्हणु चेहिंथु जै किणकेरी अउवी मझां पलाला अलग कांनेरै तेईनी जुकता।” क्या तुहां लगतु कि परमेश्वरा सिर्फ दाँदा केरै बारै मझ चिंता आ? बिल्कुल ना। 10या खास करि असेड़ै तेईनी बोलता। हाँ! असेड़ै तेईनी ऐ लिखोरू आ; केईनी कि रटणांर बि उम्मीद ला करि-ऐ पट्टि रटता। ऐठणीरै तेईनी ऐहै सही आ, कि फसलिरा हैसा लींणैरी उम्मीद सिंउ रटणांर हल चलाईया जां बी दबणार दबिया बि। 11असुवें तुहां मझ आत्मिक बी बाउरू आ; ऐठणीरै तेईनी आत्मिक फसलिरी उम्मीद कांनी कोई बड़ी-बडी गल ना।
12केईनी कि तुहैं होरनियां मैहणुवंनी आर्थिक मजत दितोरी आ, जैन्हैं तुवाड़ै बिच प्रचार केया। ता हकीकत मझ बरनबासैरा जां मिंडा ऐ लींणैरा हौरा बि जादा हक आ केईनी कि असै खास चैलै तुहां केरै तेईनी थ्यै। हलाँकि असु मझां कुनि बि ऐस गलैरै तेईनी जब्रयांणा ना केया, कि तुवे असुनि तैन्हांं चीजा देया, जै असु तुहां किना चेहिंथी थी। ऐस छडि करि असै किछ बि सहन कांनेरै तेईनी तियार थ्यै, ताकि असै मसीहरै बारै मझ खुशखबरी पन विश्वास कांना किना कोसक्यै रोकिया ना। 13तुहां पता ता, कि मंदरा मझ कंम कांनारा मैहणुवंनी मंदरा किना अपड़ि रोटी मेईंती। जै मैहणु वेदी किनि मंदरा बलि दींतै, तेन्हांनि तैस बलिरा हैसा बि मेईंता। 14ऐहीं चारै प्रभु बि आज्ञा दितोरी आ, कि जै मैहणु खुशखबरिरा प्रचार कातै, तेन्हांनि आर्थिक मजत तैन्हांं मैहणुवां किना मेईंणी चेहिंथी, जै खुशखबरी शुणतै।
15हलाँकि हकीकत मझ ऐ मिंडै तेईनी सही भूंणु, कि जैन्हां मैहणुवंनी मीं प्रचार क्यौरा, तैन्हांं किना मगूं, पण मीं अपड़ै कंमेरै तेईनी मजदूरी मगोरी ना जां आंउ तुवाड़ै तेईनी ऐ ना लिखता, कि तां तुवे मूंनी दिया। आंउ मरि गांहणु ठीक समझता, केईनी कि अगर मूंनी तुहां किना मजूरी मेईया, ता फिरी आंउ ऐहीं ना बोलि सकता, कि मीं मजूरी लींणै बगैर तुवाड़ै तेईनी कंम क्यौरा। 16अगर आंउ खुशखबरी शुणाउ, ता फिरी मूं किनि किछ ना, जेसेरै बारै मझ आंउ घमण्ड करि सकूँ; केईनी कि यीशु मसीह ता मूंनी ऐहीं कांनेरी आज्ञा दितोरी आ। अगर आंउ खुशखबरी ना शुणाउ ता मूं पन धिक्कार आ।
17अगर आंउ ऐ कंम अपड़ि मर्जी सिंउ काता, ता फिरी मूंनी ईनाम मेईंणा। पण अगर परमेश्वरै मूंनी ऐ जिम्मेवारी दितोरी आ, ता फिरी आंउ कोस बि ईनामिरी उम्मीद ना करि सकता। 18आंउ अपड़ि मर्जिरी ईनामिरी ईच्छा ना करि सकता। पण मिंडै तेईनी खुशिरी गल ऐ आ, कि बेशक मूं तैन्हांं किना आर्थिक मजत लींणैरा हक आ, पण तांबि बिना किछ लींणै बगैर आंउ मसीहरी खुशखबरी शुणाउं।
सभनियांं केरी सेवा
19ऐठणीरा मतलब ऐ आ, कि आंउ मैहणुवां केरी गल मनणैरै तेईनी मजबूर ना, कि सैक्यै मिंडी आर्थिक मजत कातै। तांबि आंउ सभनियां केरा दास बंणी गियौरा, आंउ तैन्हांं मसीह मझ अंणि सकूँ। 20मतलब जेख्णी आंउ तैन्हांं मैहणुवां सिंउ थ्या, जै यहूदी व्यवस्थाय पालन कातै, ता आंउ बि तैस व्यवस्थाय मनींथिया। हलाँकि व्यवस्थायरा पालन कांनेरी कोई जरूरत ना, मीं ऐहीं ऐठणीरै तेईनी कियु, ताकि आंउ तैन्हांं मैहणुवां मसीह मझ अंणि सकूँ, जै व्यवस्थाय मनणार अत्तै।
21तिहीं चारै जेख्णी गैर-यहूदिया सिंउ कंम काता, ता आंउ जै अक गैर-यहूदी जै व्यवस्थायरा पालन ना काता, तिहियें रींहथा, ताकि तैन्हांं जिति लियुं। पण मूं पता, कि आंउ परमेश्वरेरी व्यवस्थाय बगैर ना थ्या बेठौरा; केईनी कि आंउ मसीहरी व्यवस्थाईरै आधीन आ। 22जेख्णी आंउ तैन्हांं मैहणुवा सिंउ भूंता, जैन्हैरा विश्वास कमजौर आ, ता आंउ तैन्हांं सैयि बर्ताव काता, ताकि आंउ तेन्हांनि मसीह पीछै चलणा मझ मजत करि सकूँ। आंउ सभनियां मैहणुवां केरै तेईनी सभ-किछ बंणौरा, कि कुनि ना कुनि तरीकै ला किछ मैहणुवां केरा उद्धार भौ सकिया। 23जां आंउ सभ-किछ मसीहरै बारै मझ खुशखबरी प्रचार कांनेरै तेईनी बोलता, ताकि मूंनी खुशखबरिरै फायदै मझ हैसा मेयि सकिया।
मसीही दाउड़
24जिहीं कि दाउड़ी मझ ता सारै दाउड़तै, पण ईनाम अकै लैई गांहथा। तुवे तिहीं दाउड़ा कि तुवे जितिया। 25जै मैहणु दाउड़ी मझ हैसा लींणा चांहथै अत्तै, सैक्यै पेहिलै किना धीर सिंउ मैहनत कातै। सैक्यै ऐहीं ऐठणीरै तेईनी कातै, ताकि जिति सकिया जां तेन्हांनि आदर मेईया। सौचा सैक्यै ता तैस फुला केरी मालाईरै तेईनी त्योती मैहनत कातै, जै शुकि करि मुकि गांहथी, ता यीशु मसीह पन विश्वास कांनार ता तैस मुकटेरै तेईनी मैहनत कातै जै कदि ना शुकतु जां ना मुकतु। ऐठणीरै तेईनी असु अपड़ि ईच्छाईया केरै तेईनी तैन्हांं केरै वशा मझ ना भूंणु चेहिंथु। 26ऐठणीरै तेईनी आंउ अपड़ा विश्वासी जीवन एकि खास मकसदेरै तेईनी जींता। आंउ तैस मुक्कैबाज सैयि ना जै ऐहियें हवाय मझ मुक्क माता। 27आंउ अपड़ै शरीरा अपड़ै काबु मझ रखता, ताकि आंउ तेसैरी बुरी ईच्छाईया केरै अनुसार ना चलूँ। किहींक्यै ऐहीं ना भुईया कि आंउ जैस खुशखबरिरा प्रचार होरनियांनि काता, तेठणीरा मूंनी ईनाम ना मेईया।
Currently Selected:
1 कुरिन्थियों 9: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
