1 कुरिन्थियों 8
8
मूर्तिया पन चाढ़ोरी चीजै
1ऐ हौरा स्वाल आ, जै कुरिन्थ शहरा मझियां विश्वासिया मूं किना मूर्तिया पन चाढ़ोरी रोटिया केरै बारै मझ पुछौरा। असै सारै ऐस बारै मझ किछ जांणतै अत्तै। पण ज्ञान मैहणु घमण्डी बंणा दींता, जबकि प्रेम असु होरनियां केरी मजत कांनार बंणा दींता। 2अगर कोई समझता, कि आंउ किछ जांणता, ता तैस हालै-तेईनी ऐ ना पता कि किहीं-चारै जांणनु चेहिंथु। 3पण अगर कोई परमेश्वरा सिंउ प्रेम रखता, ता सैक्या प्रेम तां-ऐ रखता, कि परमेश्वर तैस मैहणु जांणता।
4तां फिरी आंउ मूर्तिया पन चाढ़ोरी रोटी खांणेरै मामलै मझ जुबाव दींणा चांहथा। असु पता, कि सिर्फ अकै जीवित परमेश्वर आ जां ऐस संसारा मझ मूर्ती बेजान अत्ति। 5-6पण तांबि असमांणा मझ जां धरती पन केहिया मैहणुवंनी परमेश्वर बोलतै। पण असेड़ै तेईनी अकै परमेश्वर आ जां सैक्या असैड़ा पिता आ। तेनी सभ-किछ बंणाउरू आ जां असै तेसैरी वजहि ला जीवित अत्तै। इहीं बि असैड़ा अकै प्रभु आ जां सैक्या प्रभु यीशु मसीह आ। तेनिऐ ला सभ-किछ बंणु जां तेनिऐ ला असै जीवित अत्तै। 7पण असेड़ै किछ विश्वासी हालै-तेईनी ना जांणतै, कि मूर्तिया किनि कोई शक्ति ना, केईनी कि सैक्यै पेहिलै तैन्हांं मूर्तिया केरी पूजा कातै थ्यै। अबै जेख्णी सैक्यै मूर्तिया पन चाढ़ोरी रोटी खांतै, ता सैक्यै सौचतै कि ऐम्हीं बि सैक्यै तैन्हांं मूर्तिया केरी पूजाय मझ शामिल अत्तै। जां सैक्यै ऐहीं सौचि करि परेशान भूंतै कि अगर सैक्यै मूर्तिया पन चाढ़ोरी रोटी खांतै ता सैक्यै पाप करि बेठोरै अत्तै।
8पण रोटी असुवां परमेश्वरा किनि ना पुजांती। रोटी ना खांणेरै तेईनी नमां कांने ला असै परमेश्वरा घट खुश कातै जां रोटी खांणै ला असै परमेश्वरेरी नजरी मझ अच्छै ना बंणतै।। 9पण सतर्क बेशा, ऐहीं ना भुईया, कि ऐ तुवाड़ी आजादी किहींक्यै विश्वासा मझ कमजौर मैहणुवां केरै तेईनी पापैरा कारण बंणी गहिया। 10केईनी कि तुहां पता, कि ऐकेई मूर्ती हकीकत मझ परमेश्वर नत्ती, ऐठणीरै तेईनी तुवे मूर्तिया केरै मंदरा मझ रोटी खा सकतै। पण जै कौ विश्वासा मझ कमजौर आ, अगर सै तुहां तैड़ी रोटी खांतै तका लींता, ता तेसनी बि मूर्तिया पन चढ़ाउरू मीट खांणनी हिम्मत मेईंती। चाहे सै जांणता किना भुईया, कि अगर सै ऐहीं काता ता सै पाप आ।
11ऐहीं-चारै कांने ला तुहां पता, कि ज्ञानेरी वजहि सिंउ जैस भाईरा विश्वास कमजौर आ, तैस मसीह मझ विश्वास कांना बंद करि दींणा, जेसेरै तेईनी मसीह मुआ। 12अगर असेड़ै ऐहीं कांने ला असेड़ै विश्वासी भाई दोषी मैहसूस कातै, ता असु तेन्हैरै खिलाफ बि जां मसीहरै खिलाफ बि पाप केया। 13ऐठणीरै तेईनी अगर मूर्तिया पन चाढ़ोरी रोटी खांणै ला होरै विश्वासिरा विश्वास कमजौर भूंता, ता मूं सैकेई रोटी कदि ना खांणी; ताकि आंउ होरनियां विश्वासिया केरा विश्वासा मझ कमजौर भूंणैरा कारण ना बंणू।
Currently Selected:
1 कुरिन्थियों 8: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
