1 कुरिन्थियों 14
14
होरी-होरी भाषाय जां भविष्यवाणी
1योकिया सिंउ प्रेम कांनेरी हर टैंम कोशिश करा। जां ईमानदारी सिंउ आत्मिक वरदाना केरी बि ईच्छा करा, खास-कर भविष्यवाणी कांनेरै वरदानेरी। 2केईनी कि जै होरी भाषाय मझ गलै काता, सै मैहणुवां सिंउ ना, पण परमेश्वरा सिंउ गलै काता, ऐठणीरै तेईनी कि तेसैरी गलै कौ न समझता, केईनी कि सै पवित्र आत्मायरी शक्ति ला भैदेरी गलै बोलता। 3पण जै भविष्यवाणी काता, सै विश्वासा मझ मजबूत भूंणेरै तेईनी मजत काता, जां तेन्हैरै दिलानि तसल्ली जां आराम दींता। 4जै होरनियां भाषाईया मझ गलै काता, सै सिर्फ अपड़ै विश्वासा मजबूत काता, पण जै भविष्यवाणी काता, सै कलीसियेरा सारा विश्वासिया केरा विश्वास मजबूत काता। 5आंउ चांहथा, कि तुवे सारै होरिया भाषाईया मझ गलै करा, पण ज्यादातर ऐ चांहथा कि तुवे भविष्यवाणी करा; केईनी कि सै मैहणु जै होरी भाषाय मझ बोलता, सै ऐ ना शुणांता कि सै कलीसियै मझ विश्वासिया केरा विश्वास मजबूत कांनेरै तेईनी कितु बोलता, ता सै मैहणु जै भविष्यवाणी काता सै जादा जरूरी आ।
6ऐठणीरै तेईनी हे मिंडै विश्वासी भाईयो, अगर आंउ तुहां किनि अईछी करि होरिया भाषाईया मझ गलै करूं, ता मूं किना तुहांनि कितु फायदा भूंणा? अगर आंउ तुवाड़ै तेईनी सैक्या वचन दियुं जै परमेश्वरै मूनीं दितौरा, या सच्चा ज्ञान, या परमेश्वरैरा संदेश या परमेश्वरेरी शिक्षायरी गलै तुहां सिंउ बौलूं, ता मिंडु बोलणै ला तुहांनि फायदा भूंणा। 7तेनी हिसाबै, जेख्णी तुवे गीत लांणा पन जिहीं बांउसरी जां बींन जां बाजै बजांतै, अगर तुवे धुन ठीक ना बजांतै, ता होरनियां किहीं समझणु कि ऐ बांउसरी आ कि बींन आ? 8युद्धा मझ अगर काहिरी आवाज साफ ना शुणींति, ता सैनिक युद्ध लड़नेरै तेईनी तियार ना भौ सकतै। 9जेख्णी तुवे भाषाय ला ऐतेई गलै बोलतै जै मैहणुवां समझ ना ऐईंती ता ऐ ब्यारी सिंउ गलै कांना सैयि आ, फिरी तुवे जै बोलतै तेसैरा कोई बि मतलब ना रींहथा। 10इस संसारा मझ बड़ी सारी अलग-अलग भाषाय अत्ति, जां हर भाषायरा मतलब आ। 11पण अगर असै तैस भाषाय ना समझतै जै होरै मैहणु बोलतै, ता ऐहीं भूंणु जिहीं सै असेड़ै तेईनी विदेशी अत्तै जां असै तेन्हैरै तेईनी विदेशी भूंणै। 12ऐठणीरै तेईनी तुवे बि जेख्णी आत्मिक वरदांन मेईंणैरी ईच्छा रखतै, जै पवित्र आत्मा तुहांनि दींता, ता तैन्हांं वरदाना इस्तेमाल कांनेरै तेईनी ऐतेई कोशिश कातै रिय्हा कि तैन्हांं वरदाना केरी वजहि सिंउ कलीसियेरी मंडली पूरै तरीकै सिंउ विश्वासा मझ मजबूत भौ गहिया।
13ऐनि हिसाबै जै होरी भाषा बोलिया, ता सै प्रार्थना करिया, कि तेनी जै बौलु तेसैरा मतलब ऐपु समझाय सकिया। 14अगर आंउ होरिया भाषाईया मझ प्रार्थना काता, ता मिंडी आत्मा प्रार्थना काति आ, पण मिंडी सौचि मझ ऐठणीरा कोई फायदा ना, केईनी कि ऐस आंउ समझि ना सकता। 15ऐठणीरी वजहि सिंउ आंउ पवित्र आत्मायरी अगुवाय मझ प्रार्थना कांना चाहंथा; पण आंउ ऐक्यु बि चाहंथा कि होरै मैहणु ऐ समझिया कि आंउ कितु काता। जां जेख्णी आंउ गीत लांता, ता आंउ चाहंथा कि मिंडा गांणा लांणा पवित्र आत्मायरी और सिंउ भुईया, पण ऐ बि जरूरी आ कि जै आंउ गांणा लांता, सै होरनियां बि समझ ऐईछिया। 16मनि लिया कि अक सिधा-साधा मैहणु तुवाड़ी अराधनाय मझ आ, जेख्णी तुवे अपड़ि आत्माय किना परमेश्वरेरी स्तुति कातै अत्तै। अगर सै तुवाड़ी गलै ना समझता, ता जेख्णी तुहां धन्यवाद करि बेशणु, ता तैस किहीं पता चलणा कि आमीन केख्णी बोलणु जेसेरै बारै मझ तुहैं बौलु? 17परमेश्वरेरै तेईनी तुवाड़ा धन्यवाद ता अदभुत भौ सकता, पण ऐ होरनियांनि विश्वासा मझ मजबूत कांनेरै तेईनी मजत ना काता। 18आंउ अपड़ै परमेश्वरैरा धन्यवाद काता, कि आंउ तुहां सभनियांं मझां ज्यादा होरनियां भाषाय मझ बोलता। 19पण कलीसियै मझ होरनियां भाषाय मझ तैन्हांंनि हजार गलै, जै तेन्हैरी समझ मझ ना ऐईंणी, तैन्हांं बोलणा किना; आंउ बुद्धी सिंउ पंज-ऐ गलै बोलूं, जै तेन्हेरी समझि ऐईछी गहिया जां शिख्राय सकिया।
20विश्वासी भाईयो, ऐन्हां गला समझणा मझ बच्चा सैयि मेईं बणा जेख्णी बुराईरी गल ऐईंती, ता एकि बच्चेरै समान बेकसूर रिय्हा, पण ऐतिया मांमला मझ स्यांणै बंणा। 21पवित्र शास्त्रा मझ लिखोरू आ,
“मूं अलग भाषा बोलणै वा विदेशिया केरै जरियै अपड़ा मैहणुवां सिंउ गलै कांनी,
तां बि सै मिंडी ना शुणेलै।”
22ऐठणीरै तेईनी होरिया भाषाईया मझ गलै कांनी विश्वासिया केरै तेईनी ना पण अविश्वासिया केरै तेईनी चिन्हैरा रूप आ, पण भविष्यवाणी कांनी अविश्वासिया केरै तेईनी ना पण मसीहरै विश्वासिया केरै तेईनी चिन्ह आ। 23ता अगर कलीसिया एकि जगाय किट्ठी भुईया, जां सारै होरी भाषाय मझ बोलिया, जां जै ऐन्हां भाषाईया ना समझतै या अविश्वासी मैहणु कलीसियै मझ ऐईछी गहिया ता तैन्हांं जरूर सौचणु कि तु पागल आ। 24पण अगर तुवे सारै परमेश्वरैरा संदेश प्रचार कातै अत्तै, जां अविश्वासी या जै मैहणु ऐन्हां चीजा ना समझतै, सै तुवाड़ी कलीसियै मझ ऐईंतै, ता तैन्हांं ऐहसास भूंणा कि सै पापी अत्तै जां जै तुवे बोलतै अत्तै तेठणिरी वजहि सिंउ तैन्हांं अपड़ै तौर तरीकै बदलणैरी कोशिश कांनी। 25सैक्या जै शुणता तेसेरै जरियै तैस समझि गांहणु कि परमेश्वर तेसैरी बुरी सौचिरै बारै मझ कितु सौचता, जां तैस ऐहसास भूंणा कि सै पापी आ जां तैस पछतांणु। जां फिरी तैस जेणुवां केरै भारा बेशि करि परमेश्वरेरी अराधना कांनी।
विश्वासिया केरै तेईनी नियम
26विश्वासी भाईयो, ऐ सारी गलै किहीं भूंणी चेहिंथी, ऐस शुणां, जेख्णी तुवे अराधना कांननी किठै भूंतै, ता कौ भजन शुणांता ता कौ शिख्रांता, कौ ऐपु पन बिरतोरिरै बारै मझ सच शुणांता, कौ होरिया भाषाईया मझ गलै शुणांता जां कौ तेसैरा अनुवाद काता, ऐन्हां सारा गला केरा मतलब विश्वासिया केरा विश्वास मजबूत कांनेरै तेईनी भूंणा चेहिंथा। 27अगर कौ होरी भाषाय मझ बोलणार आ, ता दो या जादै किना जादै त्रा मैहणु अक-अक करि बोलिया जां तैन्हांं भाषाईया केरा मतलब बोलणेरै तेईनी सही तरीकै मझ अक मैहणु भूंणा चेहिंथा। 28पण अगर अनुवाद कांने वा ना भुईया, ता होरी भाषाय मझ बोलणै वा कलीसियै मझ चुप रिय्हा, जां परमेश्वरा सिंउ चुप-चाप गलै करिया।
29भविष्यवक्ता मझां दो या त्रा जणै बोलिया, जां ऐ जरूरी आ कि सारै जणै शुणिया जां समझिया जां परखिया कि जै सै बोलता सै पवित्र शास्त्रेरै अनुसार सही आ या ना। 30पण अगर सभाय मझ बेठोरै कोसक्यै मैहणुनी परमेश्वरैरा संदेश मेईंता, ता जै बोलता, तैस रूकणु चेहिंथु जां होरै मैहणु बौलणां दींणु चेहिंथु। 31तुवे सारै भविष्यवाणी करि सकतै, पण एकि किना बाद अक, ताकि हर कोई शिख्रिया जां प्रोत्साहित भुईया। 32जां अक भविष्यवक्ता जै परमेश्वरेरै वचना बोलता, सै अपांणा काबु करि सकता, सै अपड़ि मर्जिरै अनुसार बोलणा या ना बोलणा मझ सक्षम आ। 33केईनी कि परमेश्वर गड़बड़ी वा ना पण शांति दींणै वा परमेश्वर आ, ऐ सैक्या नियम आ जै परमेश्वरैरा मैहणुवां केरी सभनियांं कलीसियै मझ पालन करियूंता। 34जनेनी कलीसियै मझ चुप रिय्हा, केईनी कि तेन्हांनि गलै कांनेरी आज्ञा ना, पण आधीन रींहणैरी आज्ञा आ: जिहीं व्यवस्थाय मझ बि लिखोरू आ। 35अगर सै किछ होरू शिख्रना चाहंथी, ता घरा मझ अपड़ै-अपड़ै लाड़ा किना पुछिया, केईनी कि जनेनियांनि कलीसियै मझ गलै कांनी लज्जैरी गल आ।
36ऐहीं केईनी आ कि तुहां मझां किछ पेहिलै शुणाउरा ऐन्हां कानूना केरा पालन ना कांना चाहंथै? क्या तुहां लगतु कि तुवे पेहिलै अत्तै जै परमेश्वरैरा वचन बंडणारै मैहणु अत्तै? या सिर्फ तुहांनि ऐ दितौरा थ्या। 37अगर कौ मैहणु अपड़ै आपा भविष्यवक्ता या ऐतिया मैहणु समझिया जैसनि पवित्र आत्माय वरदान दितौरा भुईया, ता ऐ समझि लिया, कि जै गलै आंउ तुहांनि लिखता सै प्रभुरी आज्ञाय अत्ति। 38पण अगर सै मिंडी ऐन्हां गला पन विश्वास ना करेलै ता तैन्हांं पन विश्वास ना कांना चेहिंथा।
39ऐठणीरै तेईनी विश्वासी भाईयो, भविष्यवाणिरै वरदाना केरी ईच्छा करियां करा, जां होरी भाषा बोलणा किना नमां मेईं करा। 40पण जै किछ तुवे विश्वासिया केरी मंडली मझ अराधनायरै दौराना कातै सै ठीक ढंगै सिंउ जां लगातार करा।
Currently Selected:
1 कुरिन्थियों 14: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
