ROMAX 6
6
Yum Kheu Phimap Im Kheu Cao Khrit
1Phan mawh nan ex sang ah ka mawx? Ex kawn ca sang ot ka daux phimap, sonsang kieh nie lheu ting bwanson lie? 2Ang doh mawh nan. Ex pa hoik yum ka phimap, ex kawn baox chix im ka daux phimap yuh ka mawx? 3Phan ang mawx nan, ang pex tawng grawng can ex pa hoik cubcom rawm ka daux Yesux Khrit, hoik cubcom ka daux pa yum Nawh lie? 4Mawh kheu nan hoik sipaung ex tau mai Nawh Cao kheu krax cubcom ka daux pa yum Nawh, awm hoik deeh kieh Cao Khrit kaoh im khaing krax yum kheu min sibrawm Keeing Cao, ex kawx sang pon ti hu ka daux ju pa khraox heue.#Kaw 2:12 5Grawh grawng nawh, phan ex hoik kleuk tau mai Nawh Cao, ka daux pa yum awm pa yum Nawh, ex kawx tak sang deeh kaoh im awm pa hoik deeh kaoh im Nawh Cao, 6kheu hoik tawng ex grawng pui prim ex hoik yum tau mai Nawh Cao piang khaox lhak, sonsang yieh sibrawm tokaux phimap laux, son ang ex sang baox mawh siliex ka phimap. 7Grawh grawng nawh, kaw pa hoik yum hoik pon ti rahsee mai luan khaing phimap heue. 8Viang mawh nan, phan ex hoik yum tau mai Cao Khrit, ex yum rhawm khawm grawng sang im ex tau mai Nawh Cao heue. 9Kheu hoik tawng ex grawng Cao Khrit hoik deeh kaoh im khaing krax yum mai tak ang lai baox deeh yum khaix. Krax yum ang lai baox pon kwang pon giex kaing piang Nawh heue. 10Grawh grawng nawh krax yum pa hoik yum Nawh Cao an, Nawh hoik yum ka phimap tix bawg khaing, viang mawh nan ju pa im Nawh Cao, Nawh im ka Siyiex heue. 11Awm an viang pex kawx, sawn tokaux pex mawh pa hoik yum ka phimap, viang mawh nan pa hoik im ka Siyiex ka daux Yesux Khrit heue. 12Mawh kheu nan paw kieh phimap kwang giex kaing ka daux tokaux pa chix yum pex, ti kieh cu nghiet hawt alo nex nham tokaux. 13Viang kraung pakpeung tokaux pex kawx, paw tawx ti kieh mawh kraung naing pa ang rahsee, ka phimap, viang mawh nan tawx tokaux pex ka Siyiex, awm pui pa hoik kaoh im khaing krax yum mai kieh kraung pakpeung tokaux pex mawh kraung naing pa rahsee ka Siyiex heue. 14Grawh grawng nawh phimap tak ang pon kwang giex kaing piang pex, kheu ang pex ot ka greem lox lai beenli, viang mawh nan ot ka greem bwanson heue.
Luan Khaing Siliex Phimap
15Yuh ka mawx? Kheu ang ex ot greem lox lai beenli, viang mawh nan kheu ot greem bwanson, ex tak sang yuh phimap lie? Ang doh mawh nan. 16Ang pex tawng grawh grawng, pex sang tawx tokaux tix, ti mawh siliex mai cu nghiet ka pa yuh ka mawx ang ah, pex mawh siliex ka pa cu nghiet pex kah lie? Viang mawh ka phimap tom hoek krax yum ang ah, phan ang mawh nan ka krax cu nghiet tom hoek krax rahsee ang ah heue. 17Viang mawh nan yaogyaw bwanson Siyiex, mawh kheu viang pex hoik sax mawh siliex phimap kawx, pa hoik viex khawm rhawm tix cu nghiet ka been sidiex gau pa hoik rieb pex ti teei. 18Mawh kheu hoik kieh pex luan khaing phimap, pex hoik lih mawh siliex ka pa rahsee heue. 19Pa ah aux nan, aux ah hawt been pui kheu iak riang rao nex nham pex heue. Grawh grawng nawh awm pa hoik tawx pex kraung pakpeung pex, ti mawh siliex ka pa ang singax singeh mai ka phimap, sonsang lih mawh phimap sinyek sinyek, awm an yam in tawx kraung pakpeung pex, ti mawh siliex ka pa rahsee, sonsang mawh pa singax heue. 20Grawh grawng nawh yam mawh pex siliex phimap, pex hoik mawh pui ploi ka pa dex mai pa rahsee heue. 21Pex hoik koe plix pa yuh ka mawx ka bawg yam an, ka daux ceu pa kaig tua pex kah yam in? Grawh grawng nawh dee sidah ceu an khankix mawh krax yum heue. 22Viang mawh nan, yam in, kheu hoik luan pex khaing phimap mai hoik lih mawh siliex Siyiex mai plix pa sang pon pex mawh pa singax singeh mai dee sidah mawh ju leeing ju heue. 23Grawh grawng nawh ngawh riang phimap mawh krax yum, viang mawh nan totaix bwanson pa tawx Siyiex mawh ju leeing ju ka daux Simiang ex Yesux Khrit heue.
Currently Selected:
ROMAX 6: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
