YAOGYAW 61
61
Lox Rawg Bwan Sonsang Priex
1Siyiex eue, nghiet ka lox pa kok yo aux mai deuh ti tawng ka lox pa rawg aux bwan liak. 2Aux kok yo ka Maix jah tom sidah haktiex, yam iak rhawm rhi aux, Maix viex aux hu ka rang ting pa nie lheu lhaong khaing aux liak. 3Maix mawh dee deuh aux rhawm mai mawh tab pa kaux sivoe ngai pui pa koeng ka aux khankix heue. 4Aux ot ka daux nyiex gox Maix jheung jheung mai aux deuh rhawm ka greem veei pruik Maix heue. 5Siyiex eue, Maix hoik mhong ka sijax mukheu pa hoik yuh aux mai Maix tawx sin ka pui pa lhat graung ka ceu kaux Maix khankix ka aux heue. 6Maix tak kieh simiang lang ju lang phan mai jhong khix, mee num nawh kieh kaux cong ku ju leeing ju liak. 7Nawh tak ngawm sivoe ngai Siyiex leeing ju heue. Maix kieh krax caux rhawm mai sijax mukheu Maix teem mai priex ka nawh liak. 8Mawh kheu in, aux tak rhax lai yaogyaw ka ceu kaux Maix jheung jheung mai ku singaix ku sawm awm pa hoik yuh aux lox sijax mukheu heue.
Currently Selected:
YAOGYAW 61: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
