YAOGYAW 19
19
Min Plakngai Siyiex
1Raoma plak jhi min plakngai Siyiex mai plak jhi grawng pa hoik yuh Nawh Cao ka taix tix khawmuik heue. 2Hoik krai tix ngaix hoik tix ngaix, hoik gau tix sawm hoik tix sawm. 3Ang lai sikah, ang lai koe lox, ang mhong lox tidtix. 4Maox tiag kix hoik tah hu ka piang haktiex kudauh kudee mai lox kix hoik tah praix tom sidah haktiex heue. Ka piang an Nawh deuh nyiex gox son singaix heue. 5Singaix an, awm pui pa yuh kapaox pa lih khaing daux lawg nyiex nawh mai gaux rhawm gaux rhi to hu hawt krax awm pui pa ting riang heue. 6Nawh lih hu lailing dee sidah raoma, tix dah hoik tix dah mai ang pon ti mox tix ceu kawx, kheu sidaing hax heue.
Gumlox Beenli Siyiex
7Beenli Siyiex mawh pa grum naog mai chix cox rhawm rhi ju ex heue. Mhai sakse pa kham Siyiex mawh pa mawh meh mai chix kieh pui pa ang koe pingnya deeh koe pingnya heue. 8Beenli Siyiex mawh pa rahsee, chix kieh rhawm rhi koe krax gaux rhawm lox tawm beenli Siyiex mawh pa singax singeh mai chix kieh ngai ex riang heue. 9Rhawm pa lhat graung ka Siyiex, mawh pa singax singeh jheung jheung mai krax pa prawng ca Siyiex mawh pa kaux sijax mai pa rahsee khawmuik heue. 10Gumlox Siyiex mawh pa lheu mhawm khaing khri, lheu mhawm khaing khri pa hoik thi tom nie mai nie lheu tie khaing rawm kaing hia pa khaw ka rhawm rhi pui heue. 11Mawh kheu ceu in, awm pa hoik tawx Maix satix ka pa mawh siliex Maix, Maix deeh tawx ka kix, pui pa pon hawt ti yuh khankix, tak pon bwanson pa ting heue. 12Pui mawx pa chix tawng ka dee phit lud tokaux tix? kieh aux luan khaing phimap pa koe dee glip liak. 13tiebtie ka siliex Maix, son ang lai yuh phimap pa ting liak, paw lai kieh phimap khankix ting ka piang aux liak, phan yuh nan, aux hoik grum naog mai luan khaing pa lud pa ting heue. 14Kieh lox pa lih khaing daux jheeh aux mai krax pa keud pa sawn aux mawh pa khaw rhawm rhi ka plak sivoe ngai Maix liak. Siyiex eue, Maix mawh rang ting aux mai mawh Cao pa taoh aux heue.
Currently Selected:
YAOGYAW 19: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
