YAOGYAW 105
105
Krax Pa Yaw Siyiex Tang Isarelax
(1Been 16:7-22)
1Yaogyaw ka bwanson Siyiex heue. Rawg bwan ka ceu kaux Nawh mai plak jhi kaing ceu pa hoik yuh Nawh ka pui khankix heue. 2Rhax lai ka Nawh heue, rhax lai yaogyaw ka Nawh heue. Krai grawng kaing ceu pa daox am, pa yuh Nawh khankix. 3Mai yaw rangdi ka daux ceu kaux pa singax singeh Nawh. Kieh rhawm can pui pa sawg ka Siyiex, gaux rhawm heue. 4Sawg ka sibrawm Siyiex heue. Sawg ka plakngai Nawh jheung jheung heue. 5Doh keud ka grawng ceu pa daox am pa hoik yuh Nawh mai ceu pa daox, lox tawm beenli pa hoik lih khaing jheeh Nawh khankix heue. 6Doeh ru siliex Nawh Abraham mai kawn praix Yakop, pa hoik laug Nawh ti teei khankix eue, 7Nawh Cao mawh Siyiex ex mai Nawh prawng ca ka piang haktiex khawmuik heue. 8Nawh Cao doh keud ka sijax mukheu Nawh mai gumlox tawm beenli, pa hoik krai Nawh ti deuh tom sidah ju pui tix rheng ju heue. 9Sijax mukheu pa hoik yuh Nawh ti deuh mai Abraham#Jah 12:7, 17:8 mai pa hoik tiextu Nawh ka Icak.#Jah 26:3 10Sijax mukheu pa hoik yuh Nawh, sonsang mawh pa kaux cong ka Yakop mai sijax mukheu an, tak sang mawh pa kaux cong leeing ju son pui Isarelax heue. 11Aux tak teei haktiex meung Khanan, pa mawh sin, pa tak sang pon pex, tawx ka maix heue.#Jah 28:13 12Ka daux ceu pui ex, phan simin ti yaox ang awt nie tux, yam mawh kix nyo sinie ka daux meung an heue. 13Yam lailing kix tix veng hoik tix veng mai tix meung hoik tix meung, 14Siyiex ang kieh pui mawx tuktiak tukte ka kix, Siyiex sivied ti gau ka simiang ka son kix heue. 15Paw lai chuh ka can pui pa hoik kraix Aux rawm bee mai paw lai deuh phimap ka cao jhai Aux khankix.#Jah 20:3-7 16Siyiex kieh sibhawm praix hoek ka daux meung an mai teei ti tik ka ceu pa ih khawmuik.#Jah 41:53-57 17Nawh Cao ploi pui hu tix kaux sivoe kix, pa mawh Yosiep pa yaox ti kham geu pa coh sonsang mawh siliex pui heue.#Jah 37:28, 45:5 18Kix sau gang ka caong nawh mai tuktiaktukte ka nawh mai kieh nawh kha rhawm heue. 19Ka sivoe ang lox nawh nyang grum naog, Siyiex cheuk cheu ti yaox nawh heue.#Jah 39:20—40:23 20Simiang pa giex kaing pui khankix, ploi pui hu taoh nawh lih mai tawx krax nyawm rhawm heue.#Jah 41:14 21Nawh deuh Yosiep mawh simiang pa giex kaing nyiex haw nawh mai kieh nawh priex kraung khrai sinngao nawh khawmuik heue.#Jah 41:39-41 22Nawh tawx akhwang, sonsang phyawk mai sonsang sidiex gau ka simiang greem nawh khankix, awm pa simie nawh ti yuh heue. 23Isarelax hoek ka daux meung Ejiptux#Jah 46:6 mai Yakop hu bang haktiex ceu pui Hamax#Jah 47:11 heue. 24Siyiex kieh pui Nawh pre, haoh hun mai ting riang ting rao khaing pui pa koeng khankix heue. 25Nawh Cao tieh loh rhawm kix mai kieh kix koeng mai boh rhawm rhi ka pui Nawh khankix heue.#Lih 1:7-14 26Khaix an Nawh Cao laug ti teei mai ploi siliex Nawh Mose mai Arun heue.#Lih 3:1—4:17 27Maix kieh jhi sakse Nawh Cao khankix, ka daux meung Ejiptux mai yuh mhai ceu pa daox am, Nawh khankix, ka daux haktiex ceu pui Hamax heue. 28Nawh Cao ploi pa faik, kieh faik#Lih 10:21-23 heue. Kix ang pon tiebtie ka gumlox Nawh Cao. 29Nawh Cao kieh rawm mawh nham mai kax khankix yum heue.#Lih 7:17-21 30Kieh khet naog ka haktiex kix, khawm daux nyiex haw dee ot simiang heue.#Lih 8:1-6 31Nawh Cao tawx lox, kieh prawp mai maing#Lih 8:20-24 lih, naog ka haktiex kix heue.#Lih 8:16-17 32Nawh Cao kieh mu pre lih, tang lhiex mai kieh rao ngu lih ka haktiex kix heue. 33Nawh Cao kieh lah ka piang nhu plix siiet mai khaox ruh mai raig ti tik ka khaox pa koe ka daux meung kix#Lih 9:22-25 heue. 34Nawh Cao tawx lox ka sido mai sido Pa haoh hun tom ang lai uik simin lih hoek ka daux meung kix heue. 35Ih taux lhax, rib riem mai plix nghox plix koi pa koe ka daux meung kix heue.#Lih 10:12-15 36Siyiex kieh kawn Ai kix yum khawmuik, pa moh mai pa deuh kix rhawm tix kah heue.#Lih 12:29 37Khaix an, Nawh Cao viex pui Isarelax lih hu khawm brax kwa mai viex mau khri lih hu heue. 38Pui meung Ejiptux, koe krax gaux rhawm yam lih hu pui Isarelax heue.#Lih 12:33-36 39Grawh grawng nawh, kix kied lhat graung ka kix heue. Nawh Cao kheem veei paiawm ka piang kix mai tawx pa riang ngu yam ponsawm ka kix heue.#Lih 13:21-22 40Yam rawg mhaing kix, Nawh Cao tawx keed hoek ka kix mai tawx blah raoma#Lih 16:2-15 sonsang fah rhawm kix heue. 41Nawh Cao paoh ka rang mai rawm lih mai lih hu ka dee kroh tiex, awm rawm klawng heue.#Lih 17:1-7; Si 20:2-13 42Grawh grawng nawh, Nawh Cao doh keud ka sijax mukheu pa singax singeh tau mai siliex Nawh Abraham heue. 43Nawh Cao kieh pui Nawh khankix lih mai pui pa hoik laug Nawh khankix, ah lox gaux rhawm mai lih hu heue. 44Nawh Cao teei ti tawx haktiex pui tang ceu ka kix#Yaw 11:16-23 mai kix pon ti ih ka kaing pa yuh pui tang ceu khankix heue. 45Kieh kix hawt yuh lox tawm beenli Nawh khankix mai hawt ti twah klaung lox tawm beenli Nawh heue. Haleluya!
Currently Selected:
YAOGYAW 105: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
