YAOGYAW 104
104
Yaogyaw Ka Cao Pa Phan
1Ju aux eue, yaogyaw ka Siyiex heue. Siyiex aux eue, Maix mawh Cao pa kied ting lhaong heue. Maix hoik ceep ka min plakngai sibrawm pa ting lhaong heue. 2Maix teei pa riang Maix mai fua ka tokaux tix, awm pa teei ti ceep kraung, Maix teei ka raoma mai tawb ti deuh heue. 3Maix teei jaong num dee ot daux lawg plak piang mai yuh dee ot Maix ka daux rawm mai brug ling paiawm mai hu lailing ka pruik bhaung khankix. 4Maix kieh kawncau tokaux Maix khankix, awm bhaung mai kieh pui cau pui soi Maix khankix, awm raongu heue.#He 1:7 5Maix hoik kaw ti deuh jaong num haktiex mai ang chix gah greed mai kaux cong jheung jheung heue. 6Maix kieh rawm sigrit sigra kheem ka haktiex, awm tawb kraung ceep mai kieh rawm khankix, kheem ka piang gawng lua khankix heue. 7Yam sidiex gau Maix ka kix, kix lih to heue. Yam mhong kix lox sinum praix, kix nied ti to hu heue. 8Kix haok ka gawng khankix mai hoek ka dee cox Maix dee ot son kix heue. 9Maix hoik gwieh ti deuh mee haktiex, ang kieh kix pon ti tiang mai ang kieh kix kheem ka haktiex heue. 10Siyiex kieh rawm keut lih ka daux klawng ngawd mai ka piang gawng lua khankix heue. 11Kieh totiag piang haktiex khawmuik nyaux heue. La tiag khankix kawx, yaox tix nyaux tom sak heue. 12Sim raoma khankix, ot ka praok rawm an mai kix ah lox ka piang kak khaox khankix heue. 13Maix ot ka daux lawg plak piang mai tawx rawm ka gawng lua mai haktiex mai kix hoik nyawm rhawm ka bwanson pa yuh Maix heue. 14Maix kieh rib riem kuah sonsang ih totiag mai kieh nghox kuah son pa sang ih kawn pui, kieh pa ih lih khaing daux tiex heue. 15Kieh rawm plix siiet koe, pa kieh rhawm kawn pui gaux rhawm, kieh rawm bee pa mhawm koe, blang yuh plakngai pui mai kieh blah koe, pa cong yuh rhawm rhi kawn pui heue. 16Khaox piakvan pa sum Siyiex, ka piang gawng Lebanon khankix kawx, koe krax nyawm rhawm heue. 17Sim khankix, hoek ti yuh mheem ka khaox an khankix mai sim sigaig khankix, hoek ti yuh mheem ka khaox gix an khankix heue. 18Kieh kiah khankix ot ka dee lhaong gawng mai kieh ghot saphan khankix ot ka daux rang heue. 19Nawh Cao hoik yuh ti deuh khix, mawh mhai son bawg yam mai singaix kawx, kieh tawng bawg yam tak laig it heue. 20Nawh Cao yuh pa faik kieh mawh ponsawm mai totiag khawmuik, lailing yam an heue. 21Sivai sangsi pa awn ju khankix, graox mai sawg ti ih kug khaing Siyiex heue. 22Yam lih singaix, kix deeh hoek mai deeh it ka daux dee ot kix heue. 23Kawn pui kawx lih hu yuh kaing tom hoek bawg yam ponbo heue. 24Siyiex eue, grawng pa phan pa yuh Maix khankix, kied nie haoh hun heue. Can pa koe khankix khawmuik, Maix hoik yuh ka cuyi pingnya tix heue. Kraungkhrai Maix hoik grum naog ka piang haktiex heue. 25Totiag pa iak pa ting, pa chix hu chix mu, pa ang lai uik simin khankix ot ka daux rawm sigrit sigra pa ting pa vieh heue. 26Ka dee an, reu ting khankix kawx lailing#Bax 41:1; Yaog 74:14; Isa 27:1 mai kax ting pa hoik yuh Maix khankix kawx, klieh ka daux rawm an heue. 27Totiag totu khankix khawmuik, kix krox jun ka ceu pa ih pa tawx Maix ka kix yam hoek bawg yam heue. 28Kix ih awm pa tawx Maix heue. Kix nyawm rhawm, ka pa tawx Maix ceu pa mhawm ka taix tix heue. 29Phan Maix vud ngai khaing kix, kix kha rhawm heue. Phan Maix teei ju kix yum, kix deeh ka phawng tiex heue. 30Maix ploi khwan singax Maix yuh kix, deeh cox yuh plakngai haktiex pa khraox heue. 31Kieh min plakngai Siyiex kaux cong leeing ju liak. Kieh Siyiex koe krax pa gaux rhawm, ka ceu pa hoik yuh Nawh khankix liak. 32Nawh Cao jhak ka haktiex mai haktiex siyaung heue. Nawh chuh ka gawng mai gawng lih mawh taox ngu heue. 33Aux tak ah lox rhax ka Siyiex, yam kawn im ju aux heue. Aux tak ah lox rhax yaogyaw ka Siyiex aux yam kawn klawd aux heue. 34Yam kawn keud aux daux rhawm tix, kieh khaw ka rhawm Nawh liak. Aux kawx, tak koe krax gaux rhawm ka daux Siyiex heue. 35Can pui pa lud khankix, Nawh Cao teei ti tik khaing haktiex mai pui pa ang rahsee khankix, ang lai kieh koe phao khaix, ju aux eue, yaogyaw ka Siyiex heue. Haleluya!
Currently Selected:
YAOGYAW 104: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
