LOX KAB 3
3
Pa Lhat Ka Siyiex
1Kawn simex aux eue, paw piawm ka pa sidiex gau aux, viang mawh nan priex lox tawm beenli aux khankix ka daux rhawm maix, 2grawh grawng nawh, lox tawm beenli an khankix kieh maix lang ju mai koe pa haok hwan heue. 3Paw lai kieh krax caux rhawm mai sijax mukheu gwieh hu khaing maix, teei gumlox an khankix mai tauk ka ngawg maix mai tiiem ti deuh ka khlawp rhawm rhi maix. 4Phan yuh nan maix tak sang yaox pa fah rhawm mai pon min plakngai sivoe ngai Siyiex mai sivoe ngai kawn pui heue.#Luk 2:52; Ro 12:17; 2Kaw 8:21 5Deuh rhawm ka Siyiex khawm rhawm khawm rhi tix, mai paw lai deuh rhawm ka pingnya tokaux tix. 6Can krax dee hu maix khawmuik deuh rhawm tix ka Siyiex, phan yuh nan Nawh Cao tak kieh krax hu maix rahsee heue. 7Paw keud tokaux tix mawh pa koe pingnya,#Ro 12:16 lhat graung ka Siyiex mai via khaing ceu pa caox. 8Phan yuh nan, siniag maix khankix koe riang mai gua si-ang maix tak naog heue. 9Sinngao cie maix mai plix num pa pon maix khankix tan ka Siyiex awx. 10Phan yuh nan, krao maix tak naog mai kraung pa sau maix rawm plix siiet pa khraox tak kreh heue. 11Kawn simex aux eue, paw nieb een ka ceu pa sivied Siyiex ti gau tix ang koe cee, yam chawk cheng Nawh Cao ka phimap maix paw laux rhawm.#Bax 5:17 12Grawh grawng nawh, Siyiex sivied ti gau ka kawn praix pa moh Nawh#Jhi 3:19 mai puat ka kawn praix pa khaw rhawm Nawh heue.#He 12:5-6
Ngawh Cuyi Pingnya
13Pui pa sawg ti pon pingnya, koe bwanson heue. 14Grawh grawng nawh, pui pa yuh lai ka pingnya, nie lheu mhawm khaing pui pa yuh ka lai mau heue. Rao lai pa pon pingnya nie lheu mhawm khaing khri heue. 15Pingnya, nie lheu ngawh khaing siang raoh heue. Can kraung pa khaw rhawm khawmuik, ang pon tiag sidu ngawh mai cuyi pingnya an heue. 16Ka daux taix khawn dawm nawh, koe ceu pa lang ju, daux taix khawn gwiex nawh, koe pa mi pa koe mai min plakngai nawh heue. 17Krax pingnya mawh daux krax pa mhawm, can daux krax pingnya khawmuik, mawh pa nhim pa yiien heue. 18Can pui pa jhawp ka pingnya hoik pon khaox pa im ju mai pui pa ang ploi taix tix ka pingnya koe bwanson heue. 19Siyiex phan haktiex mai: yuh raoma ka pingnya tix heue. 20Nawh Cao kieh rawm lih dee kied raux bih, kieh rawm ciex lih ka daux paiawm kheu pingnya tix heue. 21Kawn simex aux eue, cuyi pingnya mai pa yuh satix paw kieh gwieh hu sivoe ngai maix mai priex ti hawt jheung jheung awx. 22Phan yuh nan, ceu an khankix, mawh ju, khwan mai tak mawh min plakngai ka ngawg maix heue. 23Yam hu maix krax ang koe krax khi rhawm mai ang koe dee sideeing caong dee hu tix heue. 24Yam it maix ang koe ceu pa lhat, tak yaox ti laig it mhawm mhawm heue. 25Paw lhat graung ka ceu pa caox pa phai mai ceu pa laux leeing, pa yaox pui caox kix heue. 26Grawh grawng nawh, Siyiex mawh dee yum rhawm mai dee deuh maix rhawm, Nawh Cao tak priex maix son ang caong maix lai krix ka jhawk heue.
Krax Keud Pa Koe Pingnya
27Yuh bwanson ka pui pa khaw ti pon bwanson, phan ang yuh ang pon. 28Yam koe maix ti tawx tix ceuceu ka paox plawg maix, paw ah, “Hu ha, deeh hoek pasax, aux lawk tawx ka maix pasax.” 29Phan ang tie koe ceu pa khi rhawm paw lai keud tix ceu pa ang mhawm, ka paox plawg pa ot dex maix awx. 30Maix paw lai yuh krax simah ka pui pa ang lud tidtix ka maix. 31Maix paw ghoing ka kraung khrai pui pa tuktiak khankix mai paw laug ti hu ka krax hu nawh tix nyaing kawx. 32Grawh grawng nawh, Siyiex seeing ka pui pa vawk rhawm khankix heue. Pui rahsee khankix, koe akhwang ti yuh paox pie ka Nawh heue. 33Lox pa jhax lawg Siyiex hoek piang nyiex pui pa ang rahsee khankix mai Nawh Cao nawb bwanson ka dee ot pui rahsee khankix heue. 34Nawh Cao salao ka pui pa chix sa lao khankix mai yuh bwanson ka pui pa awn rhawm khankix heue.#Yaw 4:6; 1Pe 5:5 35Pui pa koe cuyi pingnya khankix, tak pon sin min plakngai mai pui pa yuh pa caox khankix, tak yaox ti kham geu krax kaig tua heue.
Currently Selected:
LOX KAB 3: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012