LOX KAB 2
2
Bwanson Pingnya
1Kawn simex aux eue, phan maix nghiet ka lox aux mai sau lox tawm beenli aux ka daux rhawm maix, 2daong yhaok maix, viex khawm rhawm tix mai sawg ka cuyi pingnya. 3Pui pa kok pa sawg ka pingnya hawt khaix lox pa yo nawh, 4Phan maix sawg awm sawg tix mau mai awm sawg sinngao pa hoik mox, 5mawh kheu nan maix tak sang tawng rhawm pa lhat graung ka Siyiex mai yaox pa tawng pa yung cie Siyiex. 6Grawh grawng nawh, Siyiex mawh cao pa tawx pingnya, krax tawng krax yung lih mawh kheu Gum lox Siyiex heue. 7Nawh khrawm ti deuh pingnya son pui rahsee mai Nawh mawh cao pa tieb tie son pui pa yuh pa rahsee, 8priex ka pui yuh pa rahsee mai ka daux krax pa rahsee mai pau daux krax pa lawng kix, 9kheu nan maix tak sang tawng mai chix prawng ca daux krax pa rahsee mai daux krax pa mhawm khawmuik heue. 10Kheu laig cuyi pingnya ka daux rhawm maix mai krax tawng yung rhawm maix koe krax gaux rhawm gaux rhi heue. 11Lox satix pau ka maix mai krax tawng yung kia ngien ka maix heue. 12Tak taoh maix luan khaing krax pa caox mai khaing daux tawm taix pui pa chix ah lox kawk lox vawk heue. 13Pui pa tik ka krax rahsee mai pa hu ka daux krax pa faik. 14Pui pa gaux rhawm gaux rhi ka daux phimap mai pa gaux rhawm gaux rhi ka pa kawk vawk mai pa caox caig heue. 15Pui pa ang hu ka daux krax pa rahsee mai pa hu ka daux krax pa kawk vawk. 16Tak taoh maix luan khaing bun pa chix nyaw glaw mai bun coh kaux pa ang mhawm. 17Bun pa tik ka cao pa yuh bwanson cao pa gau yam iak ju nawh, piawm ka lox tawm mukheu Siyiex heue. 18Nyiex bun an, dex dawd mai krax yum, krax nawh dex dawd mai simeeig khankix heue. 19Pui pa laig ka daux nyiex nawh ang pon tix deeh hoek tix kaux kawx mai ang lai pon ti klawd heue. 20Mawh kheu in maix hu daux krax pui pa mhawm mhiem mai nied ti hu hawt daux krax pui pa rahsee heue. 21Pui pa rahsee khankix, hoek ka daux meung Nawh Cao mai pui pa grum mhawm khankix, tak yaox ti ot ka dee an heue. 22Pui pa ang rahsee khankix, yaox ti kham ka pa grheu ti tik khaing daux meung Nawh Cao mai pui pa nieb luan yuh khankix tak yaox ti kham geu ka pa teei ti tik heue.
Currently Selected:
LOX KAB 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012