SIMIN 4
4
Beeh Glawm Kawn Simex Kawhat
1Simiang Siyiex ah nin ka Mose mai Arun, 2“Teei carang kawn simex Kawhat khankix, khaing daux sinax ceu pui Lewix, awm pa koe nyiex ma kix mai nyiex ma keeing kix, 3jah ka pa koe ju tixngoe num haok plak piang, tom hoek ka pa dex koe ju tix phwan num, pa sang laig ti yuh kaing jhaw ka daux nyiex gox bwan man bang kum pui hun. 4In mawh kaing jhaw kawn simex Kawhat khankix, ka daux nyiex gox bwan man bang kum pui hun, pa dex dawd mai ceu pa kied singax singeh khankix heue. 5Yam khre rien kix ti lih hu khaing dee bang peung tix, Arun mai kawn simex nawh khankix tak hoek mai kix tak teei man tie plak daux lih mai tawb ti deuh teug bwan pa kham mhai ruk ka an heue. 6Khaix an kix tak lhop hak phix ka piang an tix plah mai baox lhop man klai raoma tix plah ka piang mai kix tak chup ti deuh khaox glawm nawh heue. 7Ka piang pheen khan blah, kix tak tawm ti deuh man pa klai raoma tix pheen mai deuh pan, cawn, tawg mai klong rawm, son pa sang see tix khankix ka piang mai blah pa khan, tak mawh pa koe ka piang an heue. 8Kix tak tawb man pa raoh rawt tix pheen ka piang an kix mai baox deeh tawb hak phix tix plah ka piang an mai kix tak chup ti deuh khaox glawm nawh heue. 9Kix tak teei man pa klai raoma tix pheen mai tawb ka piang pang jawk ten khri mai kawk ngu, sigiep ngu, tawg nyia ngu mai kawk bee mai ceu pa sang shiao kix ka son an. 10Khaix an kix tak sau kraung khrai pa shiao khankix, ka plak daux mai tawb ka hak phix tix plah mai deuh ka piang khaox glawm. 11Ka piang khu khri dee tan, kix tak tawb man pa klai raoma tix pheen mai kheem ka hak phix tix plah mai chup ti deuh khaox glawm ka heue. 12Khaix an kix tak teei kraung khrai pa shiao tix khawmuik son kaing jhaw pa sang yuh kix ka dah dee pa singax mai sau ka plak daux man klai raoma tix pheen mai kix deeh kheem an khankix ka hak phix tix plah mai sau an ka piang khaox glawm. 13Kix tak teei ti tik nyaox khaing ka piang khu dee tan mai tawm man lung pliex tix pheen ka piang. 14Kix tak sau ti deuh kraung khrai pa sang shiao kix ka daux kaing jhaw pa yuh ti tan khawmuik, pa mawh pan ngu, khaox sigawng nex, sipeed vieh plah mai pan khoek mai can kraung pa shiao kix son khu dee tan. Mai kix tak lhop ti deuh hak phix tix plah ka piang kraung an mai chup ti deuh khaox glawm ka heue. 15Yam hoik tawb Arun mai kawn simex nawh khankix ka dee pa singax singeh mai can kraung khrai pa shiao kix son dee pa singax singeh khawmuik, yam deeh lih hu kix khaing nyiex bang tix, khaix an kawn simex Kawhat khankix tak hoek ti klawm ceu an khankix hu heue. Viang mawh nan kix tak ang pon ti hu krox hu teeh ka ceu pa singax an tix ceu kawx, son ang kix pon ti hoek krax yum. Inkix mawh can ceu pa koe ka daux nyiex gox bwan man bang kum pui hun, pa sang klawm kawn simex Kawhat hu heue. 16Beeh glawm pa hoik ap ka Eliza kawn simex cao giex kaing li Arun, mawh bee tok mai nyawng bhawng, krax tan phawng nghox ca im son ku singaix, bee groi mai can kraung khrai ka daux nyiex gox bwan man khawmuik mai can pa koe daux nawh khawmuik tau mai dee pa singax mai kraung khrai pa shiao kix khawmuik. 17Simiang Siyiex ah nin ka Mose mai Arun, 18“Paw tat ti tik doeh nyiex ma ceu pui Kawhat khankix khaing daux sinax ceu pui Lewix, 19Viang mawh nan yuh ceu inkix pa dex mai kix, sonsang im ju kix mai son ang kix pon ti yum ka, yam hoek kix dex ceu pa kied singax singeh. Arun mai kawn simex nawh khankix tak hu laig ka plak daux sivoe mai tawx beeh glawm ka kix kaux mawx kaux an, son kaing jhaw mai kaing pa sang yuh kix. 20Viang mawh nan kix tak ang pon ti laig ka plak daux, sonsang jhak simi ka ceu pa singax singeh, phan ang mawh nan kix tak yum ka heue.”
Beeh Glawm Kawn Simex Gerashon
21Simiang Siyiex ah nin ka Mose, 22“baox teei carang kawn simex Gerashon khankix, awm pa koe doeh nyiex ma keeing kix mai pa koe doeh nyiex ma kix. 23Jah ka pa koe ju tixngoe num haok plak piang tom hoek ka pa koe ju tix phwan num maix tak simin ka pui pa laig ti yuh kaing jhaw mai pa sang pon yuh kaing daux nyiex gox bwan man bang kum pui hun. 24In mawh kaing jhaw cie doeh nyiex ma ceu pui Gerashon mai pa sang teei kix beeh glawm khankix. 25Kix tak klawm man tie nyiex gox bwan man mai man tawb ka piang nyiex gox bwan man bang kum pui hun mai hak phix pa kheem ka piang an, khawm man tie siviex nyiex gox bwan man bang kum, 26man tie siviex laig daux biang, man feuk son hawt vung viang biang nyiex gox bwan man mai khu dee tan mai maox nawh khankix, kraung pa shiao, son kaing jhaw khawmuik mai can ceu pa hoik yuh kix ti deuh khawmuik, kix tak yuh kaing jhaw inkix. 27Arun mai kawn simex nawh khankix, tak ap kaing jhaw ka kawn simex Gerashon, khawm kaing pa sang yuh kix mai kaing jhaw pa koe beeh glawm kix ti yuh khawmuik mai maix tak gwieh kaing pa sang yuh khawmuik awm pa koe beeh glawm kix. 28Inkix mawh kaing jhaw cie doeh nyiex ma kawn simex Gerashon khankix ka daux nyiex gox bwan man bang kum, beeh glawm kix tak koe greem tawm taix Itama pa mawh kawn simex Arun cao giex kaing li heue.
Beeh Glawm Kawn Simex Merarix
29“Son kawn simex Merarix khankix maix tak simin awm koe doeh nyiex ma kix mai doeh nyiex ma keeing kix. 30Jah ka pa koe ju tixngoe num haok plak piang tom hoek ka pa koe ju tixphwan num maix tak simin kix pa pon laig daux kaing jhaw ku kaux, sonsang yuh kix kaing jhaw daux nyiex gox bwan man bang kum. 31Kaing pa caw kix ti teei beeh glawm, son nyiex gox bwan man bang kum, mawh pa tak klawm ka khaox phia nyiex gox bwan man, lat, rong mai daux jhup jaong khankix, 32rong hawt vung viang biang mai daux jhup jaong khankix, lag mai maox, khawm kraung pa shiao kix tau mai an khawmuik mai kaing jhaw pa caw kix ti yuh maix tak tawx beeh glawm awm pa koe ceu kaux kix. 33In mawh kaing jhaw cie doeh nyiex ma kawn simex Merarix khankix, son nyiex gox bwan man bang kum, greem tawm taix Itama kawn simex Arun cao giex kaing li heue.”
Grawng Ceu Pui Lewix
34Mose mai Arun khawm cao kaing pui hun hoik simin kawn simex ceu pui Kawhat khankix, awm pa koe doeh nyiex ma kix mai doeh nyiex ma keeing kix, 35jah ka pa koe ju tixngoe num haok plak piang tom hoek ka pa koe ju tixphwan num, pa pon laig daux kaing jhaw ku kaux, son kaing pa koe ka daux nyiex gox bwan man bang kum khankix, 36Can pui pa hoik simin tix, awm pa koe doeh nyiex ma kix, koe ra rheng aliah yieh tixphwan kaux. 37Inkix mawh doeh nyiex ma ceu pui Kawhat, pa pon ti yuh kaing ka daux nyiex gox bwan man bang kum, pa hoik simin Mose mai Arun, awm lox pa hoik tawm Simiang Siyiex ka Mose heue. 38Can pui pa hoik simin tix khaing kawn simex Gerashon, awm pa koe doeh nyiex ma kix mai doeh nyiex ma keeing kix, 39jah ka pa koe ju tixngoe num haok plak piang tom hoek ka pa koe ju tixphwan num, pa pon ti laig daux kaing jhaw ku kaux, son kaing pa koe ka daux nyiex gox bwan man bang kum, 40Can pui pa hoik simin tix, awm pa koe doeh nyiex ma kix, khawm doeh nyiex ma keeing kix, koe ra rheng liah yieh tixngoe kaux. 41Inkix mawh pui pa hoik simin kix khaing doeh nyiex ma kawn simex Gerashon, pa sang pon ti yuh kaing jhaw ka daux nyiex gox bwan man bang kum pui hun khawmuik, pa hoik simin Mose mai Arun awm lox pa hoik tawm Simiang Siyiex heue. 42Inkix mawh doeh nyiex ma kawn simex Merarix, pa hoik simin tix khaing nyiex ma kix mai doeh nyiex ma keeing kix khankix, 43jah ka pa koe ju tixngoe num haok plak piang tom hoek ka pa koe ju tixphwan num ku kaux, pa pon ti yuh kaing jhaw, son kaing pa koe ka daux nyiex gox bwan man bang kum pui hun khankix, 44Can pui pa hoik simin tix awm pa koe doeh nyiex ma kix khankix, koe loe rheng ra yieh kaux heue. 45Inkix mawh pui pa hoik simin tix khaing doeh nyiex ma kawn simex Merarix, pa hoik simin Mose mai Arun, awm lox tawm Simiang Siyiex ka Mose heue. 46Can pui pa hoik simin tix khaing ceu pui Lewix khawmuik, pa hoik simin Mose mai Arun, khawm cao kaing ceu pui Isarelax khankix, awm pa koe doeh nyiex ma kix mai doeh nyiex ma keeing kix, 47jah ka pa koe ju tixngoe num haok plak piang tom hoek ka pa koe ju tixphwan num ku kaux, pa sang hoek ti yuh kaing jhaw mai pa kham ti yuh kaing ceu an khankix, ka daux nyiex gox bwan man bang kum pui hun. 48Can pui pa hoik simin ti deuh, koe daix rheng phwan yieh tixdaix kaux. 49Awm lox pingnyap pa hoik tawx Simiang Siyiex, kix mawh pa hoik simin Mose kaux mawx kaux an, awm pa koe kaing jhaw kix mai awm kaing pa caw kix ti yuh khankix, mawh kheu nan kix mawh pa hoik simin tokaux Mose, awm lox pa hoik tawm Simiang Siyiex heue.
Wa Common Language Bible © Bible Society of Myanmar, 2012