SIMIN 3
3
Kawn Simex Arun
1Inkix mawh daoh doe Arun mai Mose khankix, yam sikah Simiang Siyiex mai Mose ka piang gawng Sina heue. 2Inkix mawh ceu kaux kawn simex Arun, Nadap mawh kawn Ai mai Abihux, Eliza mai Itama heue.#Si 26:60 3Inkix mawh ceu kaux kawn simex Arun pa hoik groi kix rawm bee ti tawx mawh cao giex kaing li mai pui pa hoik appong kix yuh kaing jhaw Siyiex, awm cao giex kaing li heue. 4Nadap mai Abihux yum sivoe Simiang Siyiex, yam tan kix ngu pa ang singax ka sivoe Simiang Siyiex#Krub 10:1-2; Si 26:61 ka daux tiag gawng Sina mai kiex ang koe kawn praix, mawh kheu nan Eliza mai Itama yuh kaing jhaw cao giex kaing li, ka greem sivoe keeing kix Arun heue.
Ceu Pui Lewix
5Simiang Siyiex ah nin ka Mose, 6“Teei doeh ru pui Lewix khankix hoek dee dex mai deuh kix ka plak sivoe cao giex kaing li Arun, sonsang pon kix ti yuh kaing jhaw son nawh heue. 7Kix tak yuh kaing tang nawh mai son pa lo cub pui hun khawmuik, daux sivoe nyiex gox bwan man bang kum pui hun, sonsang yuh kix kaing jhaw son nyiex gox bwan man heue. 8Kix tak yaox ti khre rien ka kraung khrai pa koe ka daux nyiex gox bwan man bang kum pui hun mai ceu pa lo kawn praix Isarelax, sonsang yuh kix kaing jhaw nyiex gox bwan man heue. 9Maix tak tawx ceu pui Lewix khankix ka Arun mai ka kawn simex nawh khankix, kix mawh pa hoik tawx maix ka nawh khawmuik, khaing daux sinax ceu pui Isarelax heue. 10“Mawh kheu nan maix tak tawx beeh glawm ka Arun mai kawn simex nawh khankix mai kix tak priex rien ka kaing cao giex kaing li, pui tang kaux pa hoek dex tan tak pon ti yum heue.” 11Khaix an Simiang Siyiex sikah ka Mose ah nin heue. 12“Jhak heue, tokaux Aux hoik laug ti teei ceu pui Lewix khaing sinax ceu pui Isarelax khankix, son tang kawn Ai ku kaux, pa liang tix keh, sinax ceu pui Isarelax khankix, mawh kheu nan ceu pui Lewix khankix, tak mawh pui cie Aux.#Lih 32:26-29 13Mawh kheu kawn Ai khawmuik mawh cie Aux, ka daux singaix pa hoik pah Aux ka kawn Ai khankix khawmuik, ka daux meung Ejiptux, Aux hoik kieh kawn Ai pa koe daux ceu pui Isarelax khawmuik singax singeh, son tokaux Cao Aux, khawm pui mai khawm to brie khankix, #Lih 13:2 kix tak mawh cie Aux, Aux mawh Simiang Siyiex heue.
Teei Carang Pui Lewix
14Simiang Siyiex sikah mai Mose ka daux tiag gawng Sina ah nin, 15“Simin ceu pui Lewix khankix, awm koe nyiex ma keeing kix mai kawn nyiex ma kix maix tak simin simex ku kaux, jah ka pa koe ju tix khix haok plak piang heue. 16Mawh kheu nan Mose simin kix awm gumlox pa hoik tawm Simiang Siyiex ka nawh heue. 17Inkix mawh ceu kaux kawn simex Lewix, Gerashon, Kawhat mai Merarix. 18Ceu kaux kawn simex Gerashon, mawh Libanix mai Shimi awm pa koe kawn nyiex ma kix. 19Kawn simex Kawhat, mawh Amaran, Izaha, Hebaron mai Awzazilax, awm pa koe kawn nyiex ma kix. 20Kawn simex Merarix mawh Mahalix mai Mushi, awm pa koe kawn nyiex ma kix, inkix mawh kawn nyiex ma ceu pui Lewix khankix, awm pa koe doeh nyiex ma keeing kix heue. 21Pa lih tix koe khaing Gerashon mawh doeh nyiex ma ceu pui Libanix khankix mai doeh nyiex ma ceu pui Shimix, inkix mawh doeh nyiex ma ceu pui Gerashon heue. 22Ceu pui an kix pa hoik simin tix, awm pa koe kawn simex khankix, jah ka pa koe ju tix khix, haok plak piang can pui pa hoik simin ti deuh, koe aliah rheng phwan yieh kaux heue. 23Doeh nyiex ma ceu pui Gerashon khankix, tak mawh pa sang bang ti ot plak khaix nyiex gox bwan man ka plak glip singaix heue. 24Cao kaing pa kwang ka piang nyiex ma keeing ceu pui Gerashon khankix, mawh Eliasap kawn simex Lelax heue. 25Beeh glawm kawn praix ceu pui Gerashon ka daux nyiex gox bwan man, mawh man vie vung viang nyiex gox bwan man mai braux, man tie son diang siviex nyiex gox bwan man bang kum pui hun khankix, 26mai man tie son diang siviex gwang nyiex gox bwan man mai can pa feuk hawt vung viang nyiex gox bwan man mai dee koe khu dee tan, khawm maox pa shiao khankix mai kaing jhaw pa dex mai kix khawmuik heue. 27Pa lih tix koe khaing Kawhat mawh doeh nyiex ma ceu pui Amaram, doeh nyiex ma ceu pui Izaha, doeh nyiex ma ceu pui Hebaron mai doeh nyiex ma ceu pui Awzalax khankix, inkix mawh doeh nyiex ma ceu pui Kawhat heue. 28Awm pa hoik simin kix ti yaox simex khawmuik jah ka pa koe ju tix khix haok plak piang, koe daix rheng liah yieh kaux, kix mawh cub pui pa priex rien ka dee pa singax singeh heue. 29Doeh nyiex ma Kawhat tak mawh pa bang ti ot plak seh nyiex gox bwan man heue. 30Mai cao kaing pa kwang ka piang doeh nyiex ma keeing ceu pui Kawhat mawh Elizaphan pa mawh kawn simex Awzelax heue. 31Beeh glawm kix mawh pa viex teug bwan pa kham mhai ruk, pheen, pang jawk ten khri mai khu dee tan, khawm kraung pa shiao dee pa singax singeh, man tie plak daux mai can ceu pa shiao khawmuik heue. 32Eliza kawn simex cao giex kaing li Arun tak mawh cao kaing ting ka piang cao kaing ceu pui Lewix mai kia ngien ka pa priex rien dee singax singeh khankix heue. 33Pa lih tix koe khaing Merarix mawh doeh nyiex ma ceu pui Mahalix mai doeh nyiex ma ceu pui Mushix, inkix mawh doeh nyiex ma Merarix khankix heue. 34Ceu pui pa hoik simin tix yaox ka simex khawmuik, jah ka pa koe ju tix khix haok plak piang, koe liah rheng ra yieh kaux heue. 35Cao kaing pa kwang ka piang nyiex ma keeing ceu pui Merarix mawh Zurelax pa mawh kawn simex Abihelax, in khankix mawh pui pa bang tix ot ka praok plak laong nyiex gox bwan man heue. 36Beeh glawm son kawn prai Merarix khankix mawh pa viex ceu in khankix, phia, lat, rong, daux jhup jaong kraung khrai pa shiao mai kaing jhaw pa dex mai ceu an khawmuik, 37rong hawt vung viang gwang nyiex gox bwan man, tau mai daux jhup jaong, lag mai maox khankix heue. 38Can kix pa bang ti ot sivoe nyiex gox bwan man plak lih singaix mai plak sivoe nyiex gox bwan man bang kum pui hun mawh Mose, Arun mai kawn simex nawh khankix, kix mawh pa priex ka dee pa singax singeh, sonsang pon yuh ti tawx ceu pa lo kuceu son ceu pui Isarelax khankix, pui tang kaux pa hoek dex tan tak pon ti yum heue. 39Can pui pa hoik simin khaing ceu pui Lewix khawmuik, pa hoik simin Mose mai Arun awm gumlox pa hoik tawm Simiang Siyiex, awm pa koe doeh nyiex ma kix, pa mawh kawn simex, jah ka pa koe ju tix khix haok plak piang koe ra mheen ra rheng kaux heue.
Pui Lewix Tang Kawn Ai
40Simiang Siyiex ah nin ka Mose, “Simin kawn Ai ceu pui Isarelax khawmuik jah ka pa koe ju tix khix haok plak piang mai teei carang kix khawmuik heue. 41Maix tak teei ceu pui Lewix mawh son Aux, Aux mawh Simiang Siyiex mai teei kix son tang kawn Ai khaing daux sinax ceu pui Isarelax khawmuik mai to brie pa eei ceu pui Lewix khankix, son tang kawn liang pa keh daux sinax to brie ceu pui Isarelax khawmuik heue. 42Mawh kheu nan Mose simin ka carang kawn Ai pa keh daux sinax ceu pui Isarelax khankix, awm gumlox pa hoik tawm Simiang Siyiex ka nawh heue. 43Can kawn simex pa mawh kawn Ai, pa hoik simin ka ceu kaux khawmuik, jah ka pa koe ju tix khix, haok plak piang, can pa hoik simin khawmuik koe ra mheen ra rheng ra yieh atixgliah loe kaux heue. 44Khaix an Simiang Siyiex sikah ka Mose ah nin, 45“Teei ceu pui Lewix khankix, son tang kawn Ai, khaing daux sinax ceu pui Isarelax mai teei to brie cie ceu pui Lewix khankix, son tang to briex pa eei ceu pui Isarelax khankix, ceu pui Lewix tak mawh cie Aux, Aux mawh Simiang Siyiex heue. 46Sonsang deeh taoh maix ka kawn Ai, ceu pui Isarelax khankix, ra yieh atixgliah loe kaux, pa nie lheu khaing carang ceu pui Lewix khankix, 47Maix tak teei mau phwan shekhe, ka kix ku kaux maix tak teei an khankix, ka plak mau shekhe pa priex kix singax, pa mawh mau tix shekhe sidu tixnga Gerax heue. 48Maix tak tawx mau pa tawx kix khaing ngawh pa deeh taoh kix pui pa lheu ka Arun mai kawn simex nawh khankix. 49Mawh kheu nan Mose teei mau pa deeh taoh khaing pui an pa lheu khaing pui pa hoik deeh taoh ceu pui Lewix ka. 50Khaing kawn Ai ceu pui Isarelax khankix, nawh teei mau tix rheng loe yieh tixgliah phwan shekhe, awm pa koe ngawh jum mau shekhe pa hoik priex nawh singax heue. 51Mose tawx mau pa deeh taoh kix ka Arun mai kawn simex nawh khankix, awm lox krai Simiang Siyiex mai awm gumlox pa hoik tawm Simiang Siyiex heue.
Wa Common Language Bible © Bible Society of Myanmar, 2012