MATHIEX 22
22
Lox Tiag Pawie Ku Paox
(Luk 14:15-24)
1Yesux pawk lox mai deeh krai lox tiag tix blah ka kix ah nin, 2“Meung Siyiex awm simiang ting tix kaux, pa yuh pawie ku paox son kawn simex tix heue. 3Nawh ploi kawncau tix khankix hu kok ka kix pa hoik ghaok ka pawie ka paox glang ka an, viang mawh nan kix ang hoek. 4Nawh baox deeh ploi kawncau nawh tang kaux ah nin, krai ka kix pa hoik ghaok, aux hoik cox khre pa ih mai hoik pah mawie, tobrie pa kluing khankix mai hoik cox khre ti deuh kuceu, hoek ih pawie ku paox liak. 5Viang mawh nan, kix ang cu nghiet mai hu khaing tan, tix kaux hu ka ma, mai tang kaux hu ka kaing lai geu yuh tix heue. 6Kix pa deuk tan, giex kawncau an khankix mai yuh pa ang khaw ka kix mai pah kix yum heue. 7Simiang ting an song rhawm kah mai ploi pui naing nawh khankix hu yieh mai yuh pui pa pah khankix laux leeing mai gleeing veng kix heue. 8Khaix an nawh ah nin ka kawncau nawh khankix, hoik khre rien ka pawie ka paox, viang mawh nan kix pa hoik ghaok ang keung ka pawie heue. 9Mawh kheu nan pex hu ka gah krax ting khankix mai ghaok pui pa yaox pex ka pawie ku paox tom nie awm pa chix pex heue. 10Kawncau nawh khankix lih hu ka krax ting khankix mai khrawm pui pa yaox kix khawmuik, khawm pui pa caox mai pa mhawm, mawh kheu nan nyo naog ka pawie ka paox heue.#Mat 13:47
11Viang mawh nan yam laig simiang ting ti jhak ka nyo khankix, nawh yaox pui pa ang ceep kraung ka paox tix kaux. 12Nawh ah nin ka kaw an, paox grawm eue, yuh patix maix lai hoek tin maix khex ang ceep kraung ka paox lie? kaw an ang nye ka heue. 13Khaix an simiang ting an ah nin ka kawncau nawh khankix, phyawk taix caong nawh taing daux pa faik plak praix, dee yiiem riag mai dee greeik rhang heue. 14Grawh grawng nawh, pa kok koe tom nie, viang mawh nan pa laug ti teei kied tux heue.”
Tawx Gha Keun
(Mak 12:13-17; Luk 20:20-26)
15Yam an Pharishie khankix kum kawng paox tix, grawng sang pon kix ti yaox dee lud lox Nawh Cao heue. 16Mawh kheu nan, kix ploi kawncau kix khankix hu tau mai pui Herut khankix ka Nawh Cao, ah nin, “Sara cao gau eue, yix tawng Maix mawh pa mawh meh mai sidiex gau grawng krax Siyiex rahsee mai ang lhat ka pui tix kaux kawx heue. Kheu ang Maix jhak ka pakngai kawn pui heue. 17Mawh kheu nan, Maix ce yuh ka mawx, krai ex mhong liak. Khaw tix tawx mau koh ka simiang Kesa lie, ang khaw ti tawx lie?” 18Viang mawh nan Yesux tawng grawng pa caox pa keud kix ah nin, “Pui pie lhen khankix eue, pex nyaw cheuk ti yaox Aux yuh ka mawx? 19Jhi Aux yaox ka mau koh heue.” Kix viex denari tix plah hoek ka Nawh Cao heue. 20Nawh Cao chawk ah nin ka kix, “In mawh riang mawx ceu kaux pui mawx?” 21Kix deeh ah nin ka Nawh Cao, “Mawh riang mai ceu kaux Simiang Kesa heue.”#Ro 13:7 Yam an Nawh Cao baox ah nin ka kix, “Mawh kheu nan ceu pa mawh cie Kesa tawx ka simiang Kesa heue. Ceu pa mawh cie Siyiex tawx ka Siyiex heue.” 22Yam mhong kix lox an, kix kied daox deng ka heue. Prah Nawh Cao mai hu khaing tan heue.
Grawng Kaoh Im Pui Yum
(Mak 12:18-27; Luk 20:27-40)
23Ka daux ngaix an Sadukie khankix, pa ang yum rhawm ka grawng deeh kaoh im hoek ka Nawh Cao mai chawk lox tix gum ah nin, 24“Sara Cao gau eue, Mose krai ah nin, pui tix kaux ang koe kawn, phan yum, pux nawh tak deeh teei moeng nawh, son ang ceu cat puxke bawt heue. 25Yam an koe puxaik aliah kaux mai yix. Kaw phao ka tix kaux teei ti moeng mai yum heue. Ang koe kawn mai nawh prah moeng tix mai pux nawh heue. 26Awm an ra kaux tix kaux mai loe kaux tix kaux. Tom sidah hoek ka aliah kaux tix kaux yum heue. 27Khaix hoik yum kix khawmuik, bun an kawx yum heue. 28Mawh kheu nan, yam hoek bawg yam deeh kaoh im, ka daux kix aliah kaux bun an tak mawh moeng kaw mawx lie? Kheu kix khawmuik hoik to moeng ka nawh heue.”
29Yesux pawk lox ah nin, “Pex lud kheu ang pex tawng phuk lai sigang khri mai sibrawm Siyiex. 30Bawg yam deeh kaoh im sax, ang lai teei mex, moeng kix tak awm kawncau raoma heue. 31Ka grawng pa deeh kaoh im, pex ang sax phat pa hoik krai Siyiex ka pex ah nin lie? 32Aux mawh Siyiex Abraham, Siyiex Icak mai Siyiex Yakop heue. Siyiex ang mawh Siyiex pui pa yum, viang mawh nan mawh Siyiex pui pa im heue.” 33Yam mhong cub pui hun khankix lox an, kix kied daox deng ka lox sidiex gau Nawh Cao heue.
Lox Pingnyap Pa Blon Ting
(Mak 12:28-34)
34Viang mawh nan yam mhong Pharishie khankix, ka grawng hoik kieh Nawh Cao yawg yiien ka Sadukie khankix, kix khrawm paox tix heue. 35Ka daux kix tix kaux pa mawh cao prawng, cao tawng lai been chawk Nawh Cao ka lox tix ceu, sonsang cheuk ti yaox ka Nawh heue. 36“Sara cao gau eue, ka daux lai beenli, lox pingnyap pa yuh ka mawx, lheu ting khaing paox tix?” 37Nawh Cao ah nin ka nawh, “Maix tak moh Siyiex maix khawm rhawm tix khawmuik mai khawm ju tix mai khawm pa chix keud chix tawng tix khawmuik heue. 38In mawh pingnyap pa ting lhaong phao ka heue. 39Pingnyap ra gum tix gum pa ah nin kawx awm in heue. Maix tak moh paox plawg paox nyhawm tix awm moh ka tokaux tix heue.#Krub 19:18; Mat 19:19; Ka 5:14; Ro 13:9; Yak 2:8 40Ka daux lox pingnyap ra gum in lox lai beenli mai lox cao jhai khawmuik hoik grum ka heue.”
Chawk Grawng Khrit
(Mak 12:35-37; Luk 20:41-44)
41Yam khrawm Pharishie khankix paox tix, Yesux chawk kix ka lox tix gum, #Mak 12:35-37; Luk 20:41-44 42Ah nin, “Pex ce grawng Khrit yuh ka mawx? Nawh mawh Kawn mawx?” kix ah nin ka Nawh Cao, “Mawh kawn Davit heue.” 43Nawh Cao baox ah nin ka kix, “Phan mawh nan yuh ka mawx Davit kok Nawh mawh Simiang ka daux Khuan ah nin,
44Simiang ah nin ka Simiang aux,
Ngawm plak taix khawn dawm Aux,
tom Aux deuh pui pa koeng ka Maix, ot greem caong Maix?”
45Phan Davit kok Nawh mawh Simiang, Nawh chix mawh kawn nawh yuh ka mawx?” 46tix kaux kawx, ang chix pawk ka lox Nawh Cao tix gum kawx mai khaix ngaix an pui ang lai kan chawk lox ka Nawh Cao heue.
Currently Selected:
MATHIEX 22: WCL
Highlight
Share
Compare
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
