MATHIEX 21

Brug La Laig Daux Veng

(Mak 11:1-11; Luk 19:28-40; Yo 12:12-19)

1Yam dex hoek kix ka veng Yerusaliem, hoek ka yaong Bephake, pa koe ka dex gawng Sanlun, yam an Yesux ploi kawncau Nawh ra kaux hu, 2mai ah nin ka kiex, “Hu ka daux yaong pa koe sivoe pax mai dom mawx dom an pax tak yaox ka la pa hoik phyawk pa ot kawn tau mai nawh. Kah, viex hoek ka Aux awx. 3Phan pui tix kaux kaux, ah tix ceu ceu ka pax, pax tak deeh krai ah nin, Simiang koe ceu lo heue, kaw an tak ploi hoek dom mawx dom an heue. 4Ceu in hoik mawh, sonsang naog lox cao jhai pa ah nin,

5“Pex krai ka kawn bun Zion,

Jhak heue, Simiang maix hoek ka maix,

viex rhawm awn mai brug,

Ka piang kawn la awn ju heue.”#Zak 9:9

6Kawncau ankiex hu yuh awm pa hoik nhie Yesux kiex yuh heue, 7viex la mai kawn la awn ju hoek sau kraung ceep kix piang la mai Nawh Cao ngawm piang heue. 8Ka daux cub pui hun plak nie teei kraung ceep tix nah ti tawm ka daux krax mai tang kaux khankix kid kak khaox tawm ka daux krax heue. 9Cub pui hun khankix, pa hu sivoe mai pa hawt khaix Nawh Cao kok yo ah nin,

“Hosanna#Yaog 118:25 (Hebrie) ka Kawn Davit,

Kaw pa hoek ka daux ceu kaux Simiang#Yaog 118:26

ting bwanson heue.

Hosanna dee lhaong khaing paox tix heue.”

10Yam laig Nawh Cao ka daux veng Yerusaliem, khawm veng khawmuik lulax rhawm, lawh maw mai chawk ah nin, “Kaw in mawh mawx?” 11Cub pui hun khankix ah nin, “In mawh cao jhai, Yesux, pa hoek khaing veng Nazariet ka daux meung Galilie heue.”

Kieh Nyiex Bwan Singax

(Mak 11:15-19; Luk 19:45-48; Yo 2:13-22)

12Yesux laig ka daux nyiex bwan Siyiex mai grheu pui pa coh pa liag ka daux nyiex bwan khankix lih mai cot pheen pui pa loh mau khankix mai dee ngawm pui coh sikaux khankix cang klud heue. 13Nawh Cao ah nin ka kix, “Hoik tiiem ti deuh ah nin,

Nyiex Aux tak kok mawh dee rawg bwan#Isa 56:7 heue.

Viang mawh nan pex hoik kieh mawh

Dee ot pui tud rhim#Ye 7:11 heue.”

14Pui dug ngai mai pui laux caong khankix hoek ka Nawh Cao ka daux nyiex bwan mai Nawh cox kix moi heue. 15Viang mawh nan yam cao giex kaing li pa ting khankix mai pui tiiem lai khankix yaox ceu pa daox deng pa yuh Nawh Cao khankix mai kawn nyawm khankix pa kok yo ka daux nyiex bwan ah nin, “Hosanna ka Kawn Davit” kix song rhawm ka, 16mai ah nin ka Nawh Cao, “Mhong Maix pa ah pui ceu in khankix lie?” Yesux ah nin ka kix, “Mawh heue, ang pex sax phat,

Maix hoix kieh krax yaog yaw grum,#Yaog 8:2

khaing daux jheeh kawn nyawm iak,

Kawn nyawm peuex khankix, lie.”

17Nawh Cao prah kix mai lih hu khaing daux veng, ka yaong Betanix, mai it tan heue.

Jhax Lawg Ka Khaox Ruh

(Mak 11:12-14,20-24)

18Yam deeh ing Nawh Cao ka veng plak ponngawb cao, Nawh cai rhawm, 19yaox khaox ruh tix khaox dex krax mai Nawh Cao hu ka khaox an, yaox ngie lhax giex mai Nawh Cao ah nin ka khaox an, “Jah yam in tom hoek leeing ju, paw lai kieh maix plix tix bawg kawx” Dom mawx dom an, khaox ruh an fit mai kroh hu heue. 20Yam yaox kawncau khankix ka in, kix kied daox deng ka ah nin, “Khaox ruh in chix kroh hu dom mawx dom an yuh ka mawx?” 21Yesux pawk lox ah nin ka kix, “Aux krai lox tete ka pex, phan pex koe krax yum rhawm, pa ang sang tang rhawm, pex tak ang joeng pon yuh pa hoik yuh ka khaox ruh in khaing, phan pex ah ka gawng in kawx, gah dee ot maix mai rau ka daux rawm sigrit sigra, tak sang mawh awm ah pex heue. 22Ceu pa rawg mhaing pex, ka daux krax pa yum rhawm, pex tak pon heue.”

Chawk Grawng Sibrawm

(Mak 11:27-33; Luk 20:1-8)

23Yam hoek Nawh Cao ka daux nyiex bwan, cao giex kaing li pa ting khankix mai kuad song pui khankix hoek ka Nawh Cao yam sidiex gau Nawh ah nin, “Maix yuh ceu in khankix ka akhwang sibrawm pui mawx? pui mawx pa tawx sibrawm in ka Maix?” 24Yesux pawk lox ah nin ka kix, “Aux kawx tak sang chawk pex ka grawng tix ceu, phan pex pon pawk ka Aux, Aux kawx tak sang krai ka pex grawng pa pon Aux akhwang sibrawm ti yuh ceu in khankix dee mawx heue. 25Krax cubcom Yohan kaoh khaing dee mawx? Kaoh khaing raoma lie, phan ang mawh nan kaoh khaing kawn pui lie?” Kix keud tau ah nin, “Phan ex ah, Kaoh khaing raoma, Nawh Cao tak chawk ah nin, Phan mawh nan yuh patix pex ang yum rhawm ka nawh? 26Viang mawh nan phan ex ah, Kaoh khaing kawn pui, ex lhat ka cub pui hun khankix, kheu kix khawmuik een Yohan mawh cao jhai heue.” 27Mawh kheu nan kix pawk lox ka Yesux ah nin, “Yix ang tawng heue.” Nawh Cao baox ah nin ka kix, “Aux kawx ang krai ka pex grawng pon Aux akhwang siawp sibrawm ti yuh ceu in khankix khaing dee mawx heue.”

Kawn Simex Ra Kaux

28Pex ce yuh ka mawx? Pui tix kaux koe kawn simex ra kaux mai nawh hu ka kaw phao ka ah nin, Kawn simex aux eue maix hu ka daux sipeem plix siiet singaix heue.” 29Nawh deeh pawk lox ah nin, “ Aux ang hu, viang mawh nan khaix an nawh doh keud ka phimap tix mai hu heue. 30Pui an hu ka kawn nawh ra kaux tix kaux mai ah awm pa hoik ah nawh phao ka. Kawn an pawk lox ah nin, Keeing, Aux sang hu heue, viang mawh nan, nawh ang hu. 31Kiex ra kaux, mawh mawx pa hawt yuh alo keeing tix?” kix ah nin, “Kaw phao ka heue.” Yesux ah nin ka kix, “Aux krai lox tete ka pex, pui pa koh mau khankix mai bun pa coh kaux tix, tak laig ka daux meung Siyiex ka pex heue. 32Kheu hoek Yohan ka pex daux krax pa rahsee, pex ang yum rhawm ka nawh, viang mawh nan pui koh mau khankix mai bun pa coh kaux tix khankix yum rhawm ka nawh heue. Pex hoik yaox ka grawng in kawx, pex ang doh keud ka tokaux tix mai ang yum rhawm ka nawh.”

Cao Sipeem mai Cao Vai

(Mak 12:1-12; Luk 20:9-19)

33“Pex baox nghiet lox tiag tang ceu tix ceu heue. Koe cao sipeem plix siiet tix kaux, pa sum plix siiet tix dah mai vie vung viang sipeem an mai kaong dee biiet rawm plix siiet mai sum nyiex lhaong pa pau sipeem tix lhang mai nawh tawx pui vai ka sipeem plix siiet an mai hu ka praix tang klawng heue. 34Yam dex hoek bawg yam sang teem plix, nawh ploi kawncau tix khankix hu ka pui yuh sipeem, sonsang teei plix cie nawh heue. 35Pui yuh sipeem khankix giex kawncau nawh mai tap toi ka tix kaux, pah yum ka tix kaux mai dheem ka simaox tix kaux heue. 36Nawh baox deeh ploi kawncau tang kaux khankix hu, nie lheu khaing phao ka mai pui yuh sipeem khankix yuh ka kix awm pa hoik yuh phao ka an heue. 37Khaix an nawh keud ah nin “Kix tak yungyi ka kawn aux,” mai ploi kawn tix hu ka kix heue. 38Viang mawh nan, yam yaox pui yuh sipeem khankix ka kawn nawh, kix ah nin ka paox tix, “Kaw in mawh cao sin. Hoek, ex pah nawh yum mai teei sin nawh.” 39Kix giex nawh mai taing nawh plak praix sipeem mai pah nawh yum heue. 40Yam hoek cao sipeem, nawh tak sang yuh pa tix ka pui yuh kaing sipeem khankix lie?” 41Kix ah nin ka Nawh Cao, “Nawh tak yieh laux ka pui caox an khankix yum, mai nawh tak sang deeh tawx pui vai ka sipeem plix siiet nawh ka pui tang kaux, pa tak tawx plix siiet ka nawh, yam hoek bawg yam teem plix heue.”

42Yesux baoh ah nin ka kix, “Ang pex sax phat ka daux Phuk lai sigang khri pa ah nin lie?

Simaox pa hoik tik pui pa yuh nyiex,

hoik yuh kieh mawh kaing ka daog.

In mawh pa yuh Siyiex,

mai mawh pa daox deng ka ngai ex heue.#Yaog 118:22-23

43Mawh kheu nan Aux krai ka pex, tak teei Meung Siyiex khaing pex mai tawx ka pui pa chix plix, plix pa dex dawd mai Meung Siyiex heue.” 44Pui pa rau piang simaox in, tak pot mai simaox in phan rau piang pui mawx ang ah, tak kieh nawh phawng awm phawng tiex heue.”

45Cao giex kaing li pa ting khankix mai Pharishie, khankix yam mhong kix lox tiag Nawh Cao, kix tawng Nawh krai grawng kix heue. 46Yam sawg kix ti giex ka Nawh Cao, kix lhat ka cub pui hun khankix, kheu kix ce Nawh mawh cao jhai heue.

Currently Selected:

MATHIEX 21: WCL

Highlight

Compare

Copy