MATHIEX 11
11
Yohan Ploi Kawncau Chawk Yesux
(Luk 7:18-35)
1Khaix hoik tawm Yesux lox ka kawncau Nawh kao ra kaux, Nawh Cao lih hu khaing tan mai hu sidiex gau ka daux veng khankix heue. 2Yam an Yohan ot ka daux thawng mai mhong grawng kaing pa yuh Cao Khrit khankix, nawh tom ploi kawncau tix hu tix blah, 3mai chawk ah nin ka Nawh Cao, “Maix mawh Kaw pa tak sang hoek an lie?, phan ang mawh nan ex tak sang krox ka tang kaux lie?” 4Yesux pawk lox mai ah nin ka kix, “Pex hu mai krai ka Yohan grawng ceu pa mhong pa yaox pex, 5pui dug ngai deeh chix yaox, pui laux caong deeh chix hu, pui saux sipawg deeh singax, pui lheet yhaok deeh chix mhong mai pui pa hoik yum deeh kaoh im mai sidiex gau ka pui hot sia mhong ka lox bwan gaux rhawm heue. 6Kaux pui mawx ang laux rhawm kheu grawng aux, tak pon bwanson heue.” 7Khaix hoik hu kix, Yesux jah ti sidiex gau grawng Yohan ka cub pui hun khankix, “Pex lih hu jhak patix daux tiagtu? Hu jhak pex ka gawng priem, pa vu vied yam phlu bhaung lie? 8Phan ang mawh nan, pex lih hu jhak patix? Hu sonsang yaox pui pa ceep kraung pa awn lie? Kix pa ceep kraung pa awn khankix ot ka daux nyiex simiang ting khankix heue. 9Pex lih hu kheu patix? Lih hu jhak ka cao jhai lie? Mawh heue, Aux krai ka pex, mawh pa lheu ting khaing cao jhai heue. 10In mawh pa hoik tiiem ka grawh grawng nawh ah nin,
Jhak heue, Aux ploi kawncau Aux hu sivoe Maix,
pa tak sang cox khre krax hu Maix sivoe Maix heue.#Ma 3:1
11Aux krai lox tete ka pex, ka daux pui pa keh khaing bun khawmuik, pa lheu ting khaing Yohan cao cubcom ang sax lih koe tix kaux kawx, viang mawh nan kaw pa nie iak khaing paox tix ka daux meung raoma lheu ting khaing nawh heue. 12Jah ka baux yam Yohan cao cubcom tom hoek yam in, pui rhim ti teei Meung Raoma mai grhawm ti laig tan heue. 13Grawh grawng nawh cao jhai khawmuik mai lox lai beenli grux krai lox jhai tom hoek Yohan heue. 14Phan pex koe rhawm ti sang rieb teei, kaw in mawh Eliyax pa tak sang hoek heue. 15Kaw pa koe yhaok kieh nawh mhong heue.
16Sang chix tiag aux ka baux ju in ka ceu pa tix lie? Hoik awm kawn nyawm khankix pa ngawm daux lah mai kok yo ka tix kaux lai tix kaux,
17Ah nin, “Ex hoik phlu pi son pex mai pex ang graoh.
Ex hoik yiiem riag, viang mawh nan pex ang khi rhawm tix.”
18Kheu Yohan hoek, ang ih mai ang nyaux, kix tom ah, Kaw in koe phicaox; 19Yam hoek Kawn kawn pui, ih mai nyaux, kix ah, jhak yaox, Kaw in mawh pui ting priex mai pui ting nyaux rawm plix siiet mai yuh paox pie ka pui koh mau mai pui ting map khankix heue. Viang mawh nan, pingnya cie Siyiex hoik plak jhi rahsee ka daux kaing pa yuh tix khankix heue.”
Ang Doh Keud Ka Phimap
(Luk 10:13-15)
20Yam an Nawh Cao jah ti ah ka veng khankix dee hoik yuh Nawh kaing pa ting sibrawm, kheu kix ang doh keud ka phimap tix heue. 21“Veng Khawrazin eue, maix koe pa kha rhawm. Veng Biesedax eue, maix koe pa kha rhawm,” phan kaing pa ting sibrawm khankix pa hoik yuh ka daux pax, yuh ka daux veng Turux mai veng Sidom, kiex tak hoik doh keud ka phimap tom dix, ka daux pa ceep man pa taing ka hauk mai kraix ka nyaox heue. 22Aux krai ka pax, daux singaix prawng ca sax, pax tak nie kin pa kham geu khaing veng Turux mai veng Sidom heue. 23Veng Kapeniom eue,
Tak yaogyaw maix tom hoek meung raoma lie?
Maix tak lih hu daux meung yum heue.
Grawh grawng nawh, kaing pa ting sibrawm pa hoik yuh ka daux maix, phan yuh ka daux veng Sawdom, veng an tak koe tom singaix heue. 24Aux krai ka maix, ka daux singaix prawng ca sax, maix tak nie yaox ti kham geu lheu khaing haktiex Sawdom heue.”
Hoek Laux Lee Mai Aux
(Luk 10:21-22)
25Yam an Yesux ah nin, “Aux yaogyaw ka Maix Keeing Simiang pa ting piang raoma mai haktiex, kheu Maix hoik mox ceu in khankix, khaing pui lhak lhiem mai pui pa chix tawng khankix mai hoik plak jhi khankix ka kawn ngie khankix heue. 26Mawh heue, Keeing kheu Maix koe rhawm alo ti yuh nan heue. 27Keeing Aux hoik ap khawmuik ka Aux mai pui tix kaux kawx ang tawng ka Kawn Cao lheu khaing Keeing Cao mai pui tix kaux kawx ang tawng ka Keeing Cao lheu khaing Kawn Cao mai kaw pa laug kawn Cao ti plak jhi ka nawh heue.
28Pex pa taug pa mao mai klawm kraung cien khankix khawmuik eue, hoek ka Aux mai Aux tak kieh pex laux lee tix heue. 29Teei ti klawm khaox glawm Aux mai hoek ti gau ka Aux, kheu Aux koe rhawm pa awn pa tiem mai ju pex tak yaox dee laux lee tix heue. 30Mawh kheu khaox glawm Aux mawh pa yie ti klawm mai kraung Aux mawh pa chaong heue.”
Currently Selected:
MATHIEX 11: WCL
Highlight
Share
Compare
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
