MATHIEX 10

Kawncau Kao Ra Kaux

(Mak 3:13-19; Luk 6:12-16)

1Nawh Cao kok kawncau Nawh kao ra kaux hoek ka tix mai tawx sibrawm tix ka piang kix sonsang grheu kix phicaox lih mai sonsang cox jhawm saux kuceu moi heue. 2Ceu kaux kawncau Nawh pa ting kao ra kaux mawh nin, kaw phao ka mawh Simon, pa kok mawh Petrux mai pux nawh Andare. Yakop kawn Zebedie mai pux nawh Yohan. 3Philipux mai Bathawlamie. Thomax mai Mathiex pui koh mau. Yakop kawn Alaphie mai Lebie ceu kaux ru nawh mawh Thatdie. 4Simon pui Kananix mai Yudax Isakariut, kaw pa tik pa tawx ka Nawh Cao heue.

Ploi Kawncau Hu Sidiex

(Mak 6:7-13; Luk 9:1-6)

5Yesux ploi pui kao ra kaux in hu mai tawm lox ka kix ah nin, “Pex paw vi hu dee ot pui tang ceu mai paw vi laig daux veng pui Samarix tix veng kawx. 6Hu ka yung pa hoik grai, pa dex mai geh nyiex Isarelax heue. 7Yam hu pex sidiex gau ah nin, Meung Raoma uik dex sang hoek heue. 8Cox pa koe jhawm saux moi, kieh pa hoik yum deeh kaoh im, kieh pui sipawg khankix singax mai grheu phi caox khankix lih heue. Pex hoik pon kheu yaox pex ti tawx ngawh ang mawh, mawh kheu nan paw lai teei ngawh mai tawx heue. 9Paw sau khri, mau, tawng, daux hau maox khlax. 10Paw vi viex bau son krax hu tix, paw viex sibex ra pheen, paw viex kiep, paw viex khaox gix, mawh kheu pui yuh kaing keung ti pon pa ih tix heue. 11Pex laig daux yaong daux veng mawx ang ah, sawg ka pui pa keung mai ot tan tom lih hu pex heue. 12Yam laig pex daux nyiex kienie, nawb heue. 13Phan mawh nyiex pa keung, kieh pa nhim pex ot piang nyiex heue. Viang mawh nan, phan ang keung kieh pa nhim pex deeh ing ka pex heue. 14Phan pui mawx ang rieb ka pex mai ang nghiet ka lox pex, yam lih hu pex khaing daux nyiex an, phan ang mawh nan khaing daux veng an, khruah ti tik phawng tiex pa koe ka caong pex tan heue. 15Aux krai lox tete ka pex, daux singaix prawng ca sax, haktiex Sawdom mai Gawmawrax tak lheu chaong khaing veng an heue.”

Kham Geu Pa Tuktiak

(Mak 13:9-13; Luk 21:12-17)

16“Jhak heue, Aux ploi pex hu awm yung hu sinax soxla khankix heue. Kheu nan pex lhak lhiem awm siuing khankix mai ang koe cai awm sikaux khankix heue. 17Rien rhawm tix ka pui, kheu kix tak teei pex tawx ka cub kuad song cao prawng see khankix mai kix tak sivied pex daux nyiex dee sidiex kix khankix heue. 18Tak viex pex hu sivoe pui giex kaing mai simiang khankix kheu grawng Aux, yuh ka mawx sonsang mawh mhai rug son kix mai ka pui tang ceu khankix heue. 19Viang mawh nan, yam teei kix tix tawx pex paw khi rhawm grawh grawng lox pa sang ah sang krai pex, kheu lox pa sang ah sang krai pex tak tawx ka pex ka daux bawg yam nari an heue. 20Mawh kheu ang mawh pex pa krai pa sikah, mawh Khuan Keeing Cao pa krai pa sikah ka daux pex heue. 21Puxaik tix kaux lai tix kaux tak sang teei ti tawx puxaik tix sonsang pah yum mai keeing kawx tak teei ti tawx kawn tix mai kawn praix khankix kawx tak thiang ka miex keeing tix mai tak pah kix yum heue. 22Pui khawmuik tak koeng ka pex mawh kheu ceu kaux Aux. Viang mawh nan, kaw pa kaux cong tom sidah, tak hoek krax taoh heue. 23Yam tuktiak pui ka pex daux veng in, to hu tang veng heue. Aux krai lox tete ka pex, ka ang pex nyang tah daux veng Isarelax khankix, Kawn kawn pui tak hoek heue.

24Kawncau ang lheu ting khaing sara cao gau mai siliex ang lheu ting khaing simiang nawh. 25Phan kawncau awm sara cao gau nawh mai siliex awm simiang nawh, ding heue. Phan kix hoik kok Cao nyiex Belazebulax kix tak nie lheu kok pui nyiex Nawh khaing in miex ding heue.”

Pa Caw Ex Ti Lhat Kah

(Luk 12:2-7)

26Mawh kheu in paw vi lhat ka kix, mawh kheu pa hoik pie lhen, pa ang pon hoe ang koe tix ceu kawx mai ceu pa glip pa ang tawng, ang koe tix ceu kawx heue. 27Pa krai Aux ka pex, ka daux pa faik pex hu krai ka daux pa riang. Pa mhong pex daux yhaok, yo ti krai piang prang nyiex heue. 28Paw lhat ka kix pa chix teei tokaux yum mai ang chix teei ju yum. Viang mawh kawx nan, lhat ka kaw pa chix yuh laux ka ju khawm tokaux ka daux mawnarhok heue. 29Coh saik ra mu son mau tix piak ang mawh lie? Phan Keeing pex ang tawx akhwang, sim khankix ang rau piang tiex tix mu kawx. 30Pie hauk kaing pex kawx hoik simin khawmuik heue. 31Mawh kheu in, paw lhat, pex lheu ngawh khaing saik khankix heue.

Thiang Ti Tik Ka Khrit

(Luk 12:8-9)

32“Pui pa kham ti rieb ti teei ka Aux ku kaux, plak sivoe ngai pui, Aux tak kham ti rieb ti teei nawh sivoe ngai Keeing Aux pa ot ka daux meung raoma heue. 33Pui mawx ang ah, pa thiang titik ka Aux plak sivoe ngai pui, Aux tak thiang titik nawh plak sivoe ngai Keeing Aux pa ot ka daux meung raoma heue.”

Ang Mawh Pa Nhim

(Luk 12:51-53, 14:26-27)

34“Paw ce Aux hoek ti tawx pa nhim piang haktiex in, Aux hoek ti tawx pa nhim ang mawh, viang mawh nan hoek ti tawx vaid tix mu heue.

35Mawh kheu hoek Aux ti kieh keeing

mai kawn simex nawh,

miex mai kawn bun nawh,

yiex mai mun nawh

tang rhawm mai gwieh paox tix heue.

36Pui koeng khankix, tak deeh mawh pui daux nyiex tokaux tix heue. #Mi 7:6

37Kaw pa nie lheu moh ka miex keeing tix khaing Aux, ang keung ka Aux mai kaw pa nie lheu moh kawn simex kawn bun tix khaing Aux, ang keung ka Aux. 38Kaw pa ang klawm khaox lhak tokaux tix mai hawt khaix Aux, ang keung ka Aux. 39Kaw pa sawg ti yaox ju tokaux tix tak som ju heue. Kaw pa som ju kheu Aux, tak yaox ju heue.”

Pa Pon Bwanson

(Mak 9:41)

40“Kaw pa rieb ti teei ka pex, mawh pa rieb ti teei ka Aux mai kaw pa rieb ti teei ka Aux, rieb ti teei ka kaw pa ploi Aux hu heue. 41Kaw pa rieb ti teei cao jhai ka daux ceu kaux cao jhai tak pon bwanson cao jhai heue. Kaw pa rieb ti teei pui rahsee ka daux ceu kaux pui rahsee, tak pon bwanson pui rahsee heue. 42Pui mawx ang ah, tawx kaw pa iak khankix tix kaux nyaux rawm sikiied tix kawk ngie, ka daux ceu kaux kawncau tix kaux kaux, Aux krai lox tete ka pex, bwanson cie nawh tak ang som grai heue.”

Currently Selected:

MATHIEX 10: WCL

Highlight

Compare

Copy