YAWSUX 11
11
Pex Ka Haktiex Plak Laong
1Khaix hoik luan ceu an khankix, yam hoik mhong simiang Yabin, pa mawh simiang veng Hazaw ka ceu inkix, nawh ploi pui hu ka simiang Yawbat, simiang veng Madon, simiang veng Shimaron, simiang veng Akhashap khankix, 2Mai ka simiang pa ot plak laong ka paing gawng khankix mai ka daux lung pa koe ka plak seh veng Gennesariet mai ka piang dee lung haktiex khankix mai ka dee lhaong tiex plak haktiex Dawrax khankix, pa koe ka plak klip singaix khankix, 3mai ka pui Khanan, pa ot ka plak lih singaix mai ka plak klip singaix, pui Amawrix, pui Hitix, pui Pherazix, pui Yebusix, pa ot ka piang gawng lua khankix mai pui Hiwix, pa ot greem caong gawng Heramon ka daux haktiex Misapa khankix heue. 4Mawh kheu nan, kix lih hu tau mai kru naing pa koe kix. Kru naing kix mawh pa viex pui tom nie, awm haoh hun mhaik praok rawm sigrit sigra, tau mai brung naing kix pa kied hun, khawm ling lawx brung naing kix pa kied nie hun khawmuik heue. 5Yam hoik yaox cub simiang inkix ka paox ti tau, hoik hoek mai bang ti ot tau hawt rawm nhawng Merom, sonsang puing ka pui Isarelax khankix heue. 6Khaix an, Siyiex leeing ju ah nin ka Yawsux, “Paw doh koe krax lhat graung kheu jao kix, grawh grawng nawh, ka daux yam in pasax, Aux tak ap ti tawx kix yum ka plak sivoe ceu pui Isarelax khankix heue. Pex tak pat ti tik siniag caong brung kix mai gleeing ti tik ling lawx brung kix khawmuik ka ngu. 7Mawh kheu nan, Yawsux mai pui naing khawmuik pa koe tau mai nawh lih hu sijaox mai rieb ti puing kix hawt rawm nhawng Merom heue. 8Siyiex leeing ju hoik ap ti tawx kix ka daux tawm taix pui Isarelax mai hoik pon ti pex kix mai hawt ti pheet tom hoek ka veng ting Sidom mai hoek ka rawm klawng Misarephot mai ka ngawd Mizapa, pa koe ka plak lih singaix heue. Kix puing ti tik kix tom ang lai prah kix pon klawd pie tix kaux kawx heue. 9Mawh kheu nan, Yawsux yuh ceu an ka kix, awm pa hoik krai Siyiex leeing ju ka nawh heue. Nawh pat ti tik siniag caong brung kix mai gleeing ti tik ling lawx brung kix ka ngu heue. 10Yawsux deeh blak ti ing bawg yam an mai puing ti teei veng Hazaw mai pah simiang nawh ka lawm vaid tix, veng Hazaw hoik mawh cao kaing haktiex simiang an khankix glang ka an dix heue. 11Kix mug pui ankix khawmuik pa koe ka daux veng an yum ka lawm vaid tix mai yuh laux leeing heue. Can pui pa im ju ang lai koe pie tix kaux kawx heue. Khaix an, nawh gleeing ti tik veng Hazaw ka ngu heue. 12Awm gumlox pa hoik tawm Mose pa mawh kawncau Siyiex, Yawsux puing ti teei veng pa kwang simiang ankix khawmuik mai mug simiang khankix khawmuik yum ka lawm vaid tix mai yuh kix laux leeing heue. 13Viang mawh nan, can veng pa koe ka piang gawng khankix mai pui Isarelax ang gleeing ti tik ka ngu pie tix veng kawx lheu khaing veng Hazaw, pa gleeing Yawsux ti tik tix veng khaing heue. 14Kraung pa pon tud pon rhim kix khaing daux veng inkix khawm to brie eei kix, pui Isarilax khankix teei ti cie, awm kraung pa pon tud rhim kix son cao kix heue. Viang mawh nan, kix pah ti tik pui ku kaux ka lawm vaid tix, tom hoek bawg yam hoik laux leeing kix mai kix ang lai prah pui im koe pie tix kaux kawx heue. 15Awm hoik tawm Siyiex leeing ju gumlox tix ka kawncau Nawh Mose, mawh kheu nan Mose deeh tawm ka Yawsux mai Yawsux hawt ti yuh awm an heue. Nawh ang prah can ceu pa ang tix nyang hoik yuh khankix khawmuik, ka pa hoik tawm Siyiex leeing ju ka Mose heue.
Grawng Pex Yawsux Ka Haktiex An Khankix
16Mawh kheu nan, Yawsux hoik rhim ti teei haktiex inkix khawmuik, pa mawh haktiex gawng lua, pa koe plak seh mai haktiex Goshin khawmuik daux lung daux ngawd mai daux lung rawm klawng Yawdan, khawm gawng Isarelax khankix tau mai daux lung daux ngawd nawh khankix, 17jah khaing gawng Halat mai krax pa lih dung ka gawng Sirax, tom hoek dee singai ka veng Balagat, pa koe daux ngawd Lebanon, ka plak greem caong gawng Heramon heue. Nawh hoik giex simiang kix khawmuik mai mug kix ka lawm vaid mai pah kix yum heue. 18Yawsux yuh naing tom nie rheung bawg yam tau mai simiang inkix khawmuik heue. 19Lheu khaing pui Hiwix mai pui pa ot ka daux veng Gibun khankix, veng tix veng kawx ang yuh krax nhim tau mai pui Isarelax khanki heue. Veng tang dah khankix khawmuik, hoik mawh pa rhim ti teei khaing daux bang naing heue. 20Grawh grawng nawh, Siyiex leeing ju hoik yuh rhawm kix kien, sonsang hoek kix tix puing ka pui Isarelax khankix daux bang naing mai sonsang yuh Nawh Cao kix laux leeing mai kix tak ang lai mawh pa sang pon krax caux rhawm heue. Viang mawh nan, Nawh Cao tak sang yuh kix laux leeing, awm gumlox pa hoik tawm Siyiex leeing ju ka Mose heue.#Pi 7:16 21Ka daux bawg yam an, Yawsux deeh hoek mai grheu ti tik ceu pui Anagax khaing piang gawng khankix, khaing veng Hebaron, khaing veng Debirax, kaing veng Anabax, khaing gawng Yudax mai khaing piang gawng Isarelax khawmuik heue. Yawsux yuh kix laux leeing tau mai veng pa ot kix khawmuik heue. 22Can pui Anagax ang lai deuk tix kaux kawx, ka daux haktiex pui Isarelax khankix heue. Kix kawn ot ngie ka daux veng Gaza, veng Gata mai ka daux veng Ashadot, khankix nong nong heue. 23Mawh kheu nan, Yawsux rhim ti teei haktiex hawt baoh an khankix khawmuik, awm pa hoik ah Siyiex leeing ju ka Mose mai Yawsux hoik tawx ankix mawh singao ka pui Isarelax khankix, awm gwieh kix ti koe cub mawx cub an ka doeh ru kix heue. Khaix an, haktiex hoik yiien khaing naing heue.
Wa Common Language Bible © Bible Society of Myanmar, 2012