YAWBAX 24
24
Grawng Ngia Yawbax
1“Bawg yam khankix ang mawh pa ang mox khaing cao pa ting sibrawm, yuh ka mawx pui khankix pa tawng ka Nawh Cao, ang yaox ka singaix prawng Nawh Cao see lie? 2“Pui tiblah chix greed ka mhai rong haktiex khankix, kix tud rhim ka cub yung cub pex mai viex tix cie son cao tix heue. 3Kix grheu ka la cub kawn doe khankix hu dee singai mai kix teei ti cie mawie miexmai awm kraung tang ti deuh heue. 4Kix nyhot pui pa cud cha khankix lih khaing daux krax mai pui hot sibhawm piang haktiex hoik tang mox tix heue. 5Kix lih hu awm totiag la tiag sonsang yuh kaing mai sau riang rao tix sawg pa ih daux tiagtu son kawn praix tix heue. 6Kix khrawm nyhee nghox ka daux kaung mai sut tix viex plix siiet khaing sipeem pui caox caig heue. 7Kix ang koe kraung ceep mai ceu pa lhop, kix it ka kaong leeing sawm bawg yam kuat praix heue. 8Kix hoik caux ka lhiex khaing piang gawng mai blawm tix ot hawt rang, kheu ang koe dee peung heue. 9Kawn nyawm pa ang koe keeing khankix, pui tiblah hoik pluat ti teei jheeh nawh khaing teeih miex nawh mai pui hot sibhawm hoik yaox tix tang kraung tix heue. 10Pui hot shia lih hu khawm ka kaong tix mai pa ang tix koe kraung ceep mai kix klawm lhiem nghox pui khawm cai rhawm tix heue. 11Kix krid bee mai biiet rawm plix siiet cie pui daux dang biiet plix siiet mai pa sang nyaux nie tix rawm heue. 12Pui awn riang pa dex yum hoik ngia ka daux veng mai ju pui saux pui mat khankix riag yo rawg mhaing ka Siyiex, viang mawh nan Nawh Cao ang nghiet ka lox kix heue. 13“Koe pui tiblah tieh feen ka pa riang, kix ang sax tawng ka pa riang mai ang hu ka daux krax pa riang an heue. 14Cao pa pah pui yaog ti kaoh caocao, nawh pah pui hot shia mai pui cud pui cha khankix mai daux ponsawm nawh mawh pui briex heue. 15Ngai pui lud vao mai moeng kawn pui khankix keud pot jun pot sonsang faik praix ah nin, ang ngai pui mawx chix yaox ka aux, mai nawh hoik mox grang pakngai tix heue. 16Yam faik praix kix yieh tix laig ka daux nyiex khankix mai pon ngaix kix mox tokaux khaing pa riang heue. 17Grawh grawng nawh plak ponngawb kix deuh awm veei pa yum son tix mai kix tawng veei pa yum mawh pa lhat graung ka son tix heue. 18Kix tak mawh pa sibloe piang rawm, nyum cie kix mawh pa jhax lawg ka piang haktiex mai nawh tak ang lai yaox tix hoek ka daux sipeem plix siiet kix heue. 19Awm kroh hit rawm ciex mai grai hu kheu hax koek, mawh kheu nan can pui pa koe krax lud tak grai grup ka daux meung yum heue. 20Vaig pa hoik keh ka nawh tak piawm ka nawh, graik tak ih nex nawh awm priex nyawm, pui tix kaux kawx tak ang lai doh keud ka nawh tix bawk kawx mai pui caox caig khankix, tak graig awm gaw khaox heue. 21Mawh kheu nawh yuh krax kha rhawm ka bun neh ang chix koe kawn mai ang yuh ceu pa mhawm ka miexmai heue. 22Viang mawh nan Siyiex yuh laux ka pui pa kied ting riang khankix ka sibrawm Nawh Cao, viang nawh yaog ti kaoh kawx ang koe pui pa rien ka ju nawh tix kaux kawx heue. 23Nawh Cao priex rien ka kix mhawm mhawm mai kix deuh rhawm tix piang an, mai ngai Nawh Cao ca jhak piang krax hu kix heue. 24Kix hoik yaog ka tokaux cao tix tivud ticu, khaix an tak grai hu, kix hoik hoek ka daux pa yeen ti kieh kix tiem mai hoik teei ti tik kix lih khaing daux krax awm pui tang kaux khankix mai kix tak kroh hu awm sigleem nghox khankix heue. 25Phan ang mawh nan, mawh pui mawx pa sang pon plih pon jhi ka mawh aux pui pie lhen tix kaux mai kieh lox sikah aux ang mawh tidtix lie?”
Currently Selected:
YAWBAX 24: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
