ISAYAX 41
41
Siyiex Teem Pui Isarelax
1Klawn tiex rawm sigrit sigra eue, ot yiien yawg nghiet ka Aux, kieh pui ku kaux deeh koe riang rao pa khraox, kieh kix greed tix dee dex, khaix an, kieh kix krai, kieh kix viex paox hoek dex son krax prawng ca. 2Pui mawx pa so ka pui tix kaux hoek khaing haktiex plak lih singaix lie? Pui ka koe riang rao tix pex, Nawh Cao tak ap pui kuceu ka nawh, nawh tak dig simiang khankix greem caong tix mai yuh awm phawng tiex ka vaig lawm tix mai ak nawh kieh kix awm kam phlu bhaung hu sidauh. 3Nawh pheet ka kix mai preeng ka kix tom pon luat luan, ka krax pa ang nawh sax dig ka caong tix. 4Mawh pui mawx pa khre mai yuh ceu an, pa kok ka doeh ru tom yam jah, mawh Aux pa mawh Siyiex, pa mawh yam jah mai pa mawh tom sidauh. 5Klawn tiex rawm sigrit sigra hoik yaox mai lhat mai dee sidah sidu haktiex kawx siyaung ka mai kix greed tix hoek dex. 6Pui kukaux teem ka paox plawg tix mai ah nin ka puxaik tix, “Kieh koe rhawm kwa heue.” 7Pui min ka kaing taix kawx tawx riang ka cao chix kraung mau, pui pa tawk mhawm ka daix kawx, tawx riang ka pui pa tawk ka piang dum mai ah nin ka pui cuat rhiem, “An mhawm heue.” Mai nawh kawx teei jim rhiem tawk ka son ang lung lhiang. 8Viang mawh nan maix pui Isarelax pa mawh siliex Aux, Yakop pa hoik laug aux ti deuh mai doeh ru Abraham paox grawm aux;#2Been 20:7; Yak 2:23 9Maix mawh pui pa hoik teei Aux khaing dee sidah haktiex mai pa hoik kok khaing daog haktiex, ah nin ka maix, “Maix mawh siliex Aux, Aux hoik laug maix mai ang tik vud maix.” 10Paw lhat, mawh kheu aux ot mai maix, paw yaoh, mawh kheu Aux mawh Siyiex maix, Aux tak kieh maix kaux cong, Aux tak teem ka maix, Aux tak joh maix ka plawng taix dawm pa ting riang tix. 11Jhak heue, pui pa song rhawm ka maix, tak kaig tua mai laux pakngai mai pui koeng riang ciang khoi ka maix, tak ang mawh tidtix, tak laux leeing. 12Maix tak sawk ka pui tix mai maix ang pub kix, pui yuh naing ka maix, tak ang mawh tidtix, mawh pa giex going. 13Mawh kheu Aux mawh Siyiex maix, tak giex taix dawm maix, tokaux Aux ah nin ka maix, “Paw lhat, Aux tak teem ka maix.” 14Siyiex ah nin, Yakop pa mawh ngaw eue, paw lhat, pex pui Isarelax eue, Aux tak teem ka maix, cao taoh ka maix mawh Siyiex pa singax singeh pui Isarelax. 15Jhak heue, Aux tak kieh maix mawh cak khraox lawm pah nghox, koe rhang maix tak pah ka gawng ting tom phawng mai kieh gawng iak awm kam. 16Maix tak boe ka an mai bhaung ting tak phlu hu mai bhaung keukanglux tak phlu an prung prang maix tak gaux rhawm ka daux Siyiex, mai yaw rangdi ka Siyiex cao pa singax singeh pui Isarelax. 17“Yam sawg pui hot mai pui cud cha ka rawm ang yaox ka mai dak kix kroh ka sang nyaux nie rawm, Aux pa mawh Siyiex pawk lox kix, Aux pa mawh Siyiex pui Isarelax, tak ang tik vud ka kix. 18Aux tak paoh rawm klawng lih khaing dee lhaong mai paoh rawm keut lih khaing daux lung, Aux tak yuh daux tiag koe rawm mai haktiex kroh mawh dee lih rawm. 19Ka daux tiag Aux tak sum khaox Arit mai khaox Akashax, khaox Muratu, khaox Sanlun, ka daux tiag mhaik Aux tak priex khaox gix, khaox Taderax mai khaox Tashurax tau, 20Sonsang yaox mai tawng pui ka, kix tak simie ti keud mai doh rhawm ka, mawh taix Siyiex pa yuh ka ceu in mai mawh Siyiex pa singax pui Isarelax pa phan ka ceu in.
Rieng Rao Ang Koe Bwan Son
21Siyiex ah nin, viex see pex hoek heue, Siyiex pui Yakop ah nin, viex mhai rug cie pex hoek heue. 22Kieh kix viex an hoek mai jhi ex yaox mawh patix pa sang lih ti mawh, jhi ex yaox pa koe glang ka an, mawh pa yuh ka mawx, sonsang tawng pa sidah sidu ceu an khankix, phan ang mawh nan, krai ex mhong ka can pa sang hoek khankix. 23Jhi ex yaox jah yam in mawh patix pa sang lih mawh, sonsang tawng ex ka mawh pex siyiex mai yuh pa mhawm mai yuh pa caox, sonsang daox am ex mai yaoh ka. 24Jhak heue, pex ang mawh tidtix mai kaing pex kawx mawh pa giex going, kaw pa laug ka pex kawx, mawh pa seeing brai, 25Aux kieh pui tix kaux lih khaing caong ma laong mai hoek khaing plak lih singaix, nawh tak kok ka ceu kaux Aux mai nawh dig ka cub simiang, awm dig cao yuh aw tiex ka glaox. 26Mawh pui mawx pa krai pao tom yam jah sonsang tawng ex ka mai bawg yam sivoe in, sonsang pon ah ex nin, “Nawh mawh pa mawh meh lie? “Pui pa sang jhi ang lai koe pie tix kaux kawx, pui pa sang krai pao kawx ang lai koe, pui pa sang mhong ka gumlox maix, ang lai koe tix kaux kawx. 27Aux tak ploi pui ah nin ka veng Zion, “Jhak heue, jhak ka kix ku kaux, “Mai ploi pui viex lox bwan gaux rhawm ka veng Yerusaliem. 28Yam jhak Aux tan ang koe pui, tawx rhawm keud dong sawn ka sinax pui in khankix, yam chawk Aux ka kix, ang koe pui pawk tix kaux kawx. 29Jhak heue, siyiex an khankix mawh pa giex going, kaing yuh kix kawx ang koe ceu, riang rao raug kix kawx mawh bhaung pa giex going heue.
Currently Selected:
ISAYAX 41: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
