ISAYAX 35
35
Min Plak Ngai Zion
1Daux tiag mai haktiex dee kroh, tak gaux rhawm mai haktiex mhaik, tak nyawm rhawm mai pruh tai awm pruh tai kat ngim klang. 2An tak pruh tom nie mai kied nyawm rhawm, tau mai krax gaux rhawm mai ah lai rhax. Min pakngai Lebanon mai pa mhawm grang Kharamelax mai haktiex Sharon, kix tak yaox ka min pakngai Siyiex mai pa mhawm grang Siyiex ex. 3Kieh plawng taix iak riang koe riang mai kieh nge ngawng pa siyaung koe riang.#He 12:12 4Ah nin ka pui pa koe rhawm lhat, “Paw lhat, teei riang tix jhak heue, Siyiex pex tak hoek mai krax pa pawk bix mai krax ciyang pa tawx Siyiex, Nawh Cao tak hoek mai taoh ka pex.” 5Khaix an ngai dug, tak deeh blah mai yhaok lheet, tak deeh kieh hawng. 6Pui chawh caong, tak jaloh tix awm cak mai dak pa aw tak ah lai rhax.#Mat 11:5; Luk 7:22 Mawh kheu rawm keud tak lih khaing daux tiag mai rawm klawng tak lih khaing daux mhaik. 7Mhaik hax tak mawh rawm dung mai haktiex hit rawm, tak mawh rawm keut, ka dee it sox praix, tak mawh rib mai priem mai rib nhu oi khankix. 8Krax ting tak koe tan, kix tak kok krax ting an mawh pa singax, pui pa ang singax, tak ang pon tiang ka piang krax an, pie pui daox kawx ang lud krax an. 9Sivai sangsi ang koe tan, totiag vao ang hu ka piang krax an, sawg ka ceu an kawx ang lai yaox tan, Viang mawh nan, pui pa hoik pon krax taoh tak lai ling ka tan. 10Pui pa hoik taoh Siyiex kah, tak deeh hoek mai hoek ka veng Zion mai pa rhax lai mai pa gaux rhawm koe ka piang kaing kix leeing ju, kix tak pon krax gaux rhawm mai pa nyawm rhawm mai krax khi rhawm krax ngia krax ngheeik tak luan singai heue.
Currently Selected:
ISAYAX 35: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
