ISAYAX 34
34
Krax Prawng Ca Ka Piang Ceu Pui
1Ceu pui kuceu eue, greed dex sonsang mhong pex ka, pui hun khankix eue, nghiet heue, kieh haktiex mai pui pa ot ka daux nawh nghiet ka, ka piang haktiex mai pa kaoh khaing daux nawh. 2Mawh kheu pa song rhawm Siyiex hoek ka piang ceu pui khawmuik mai pa meet rhawm Nawh hoek ka piang kru naing kix. Nawh Cao hoik kieh an khankix laux leeing, Nawh Cao hoik ap kix ka cao pa pah ka pui yum. 3Pui pa pah yum khankix tak tik kix ka plak praix, tokaux yum kix tak cux sium, nham kix tak kheem ka gawng. 4Can pa koe piang raoma, tak laux leeing mai raoma tak pua tix, awm bua lai. Can pa koe ka daux nawh tak grhup, awm cia lhax ruh khaing khaox tix.#Jhi 6:13-14 5Mawh kheu vaig lawm Aux, hoik nyaux tom sak ka piang raoma, jhak heue, an lih hoek sonsang ci yang ka Edom#Isa 63:1-6; Ye 49:7-22; Yez 25:12-14, 35:1-15; Amo 1:11-12; Aw 1-14; Ma 1:2-5mai ka piang pui pa jhax lawg Aux ka. 6Vaid lawm Siyiex hoik sak ka nham mai hoik kluing ka klon bee mai ka nham kawn yung mai pex mai ka klon bee sok lax yung mhaing. Mawh kheu Siyiex yuh krax tan pa appong ka veng Bawzarax mai yuh krax pah pa kied ting ka Edom. 7Mawie praix tak sikrub tau mai kix mai kawn mawie awn ju mai mawie ting riang khankix. Haktiex ot kix hoik yoek ka nham mai phawng tiex hoik kluing ka klon bee. 8Mawh kheu Siyiex koe singaix pawk bix mai koe num ciyang son veng Zion. 9Rawm klawng Edom tak lih mawh peeh khaox gix mai phawng tiex tak lih mawh mhat, haktiex an tak lih mawh peeh khaox gix pa cap ngu heue. 10An tak ang lai yeet ku singaix, taox tak haok leeing ju.#Jhi 14:11, 19:3Tak grham an riem tix ju hoik tix ju mai ang koe pui lai ling ka leeing ju. 11Viang mawh nan klang mai goh tak rhim an mawh sinngao tix, pang plawh mai lak tak ot ka daux an mai Nawh Cao tak tuk maox yi mai kla maox tiag pa ang koe tid tix ka piang haktiex an. 12Ang lai koe simiang pa sang yaog mawh simiang, cao simiang kix ang lai koe ngawh koe jum. 13Yeem kat tak kwah ka nyiex haw, rib tak kwah ka nyiex tab lhaong, an tak mawh dee ot sox praix mai sim kala-uk khankix. 14Totiag tak sipub ka sox la mai pex tiag tak kok ka paox pie tix mai totiag pa hu sawm tak yaox dee laux tix mai laux lee tix heue. 15Siuing lah ak tak yuh mheem tix tom tan mai num ti vah kawn tix tan sonsang khrawm kawn tix greem veei tix, klang preng tak khrawm ti ot giep mawx giep an tan. 16Sawg ti yaox khaing daux phuk lai Siyiex mai phat ti yaox heue. Inkix pie tix mu kawx, tak ang koe krax cud krax cha, ang tix mu kawx tak ang koe krax cud krax cha ka son paox ku tix heue. Grawh grawng nawh, jheeh Aux hoik tawm ti deuh an mai Khwan Nawh Cao hoik kraix khrawm ka kix heue. 17Nawh Cao hoik yuh nieb son kix mai taix Nawh Cao hoik tiag ti tawx dee ot kix ka maox kix tak pon mawh sinngao cie tix leeing ju mai ot ka dee an leeing ju heue.
Currently Selected:
ISAYAX 34: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
