HOSE 2
2
Ang Koe Krax Kaux Sijax
1Ah nin ka pux aik pex khankix, “Pex mawh pui Aux heue. Ah nin ka pux o pex khankix, pex hoik pon krax caux rhawm heue. 2Kah kum mai miex pex, mawh kheu nawh ang mawh moeng aux mai aux ang mawh mex nawh heue. Kieh nawh tik via krax pa lud vao nawh khaing pakngai nawh mai jhawm pa lud vao nawh khaing daux sinax teeh nawh awx. 3Phan ang mawh nan, aux tak peeik ti tik kraung nawh mai kieh nawh ka kaung, awm ka daux yam tak keh nawh mai kieh nawh awm daux tiagtu dee kroh mai kieh nawh yum ca kheu sang nyaux nie rawm heue. 4Aux tak ang lai koe krax caux rhawm ka kawn praix nawh khankix heue. Grawh grawng nawh, kix mawh kawn praix pa pon khaing krax pa lud vao heue. 5Miex kix hoik yuh krax pa lud vao, nawh pa nghe ka kix, hoik yuh ceu pa kaig tua heue. Mawh kheu nawh ah nin, Aux tak sang hawt ti hu khaix paox moh tix khankix, pa tawx blah aux mai rawm aux, hauk yung aux mai kraung man aux, rawm bee mai rawm plix siiet aux khankix heue. 6Mawh kheu nan, jhak heue, Aux tak sang thox krax hu nawh ka kat lawm mai tie nawh ka ding son ang nawh lai chix yaox ka krax hu tix heue. 7Nawh tak ang to ti hawt khaix paox moh tix mai ang krup kix, nawh tak sang sawg kix mai ang lai yaox kix, khaix an nawh tak ah nin, aux tak sang deeh ing ka mex phao voe aux heue. Mawh kheu dee ot aux sivoe in nie mhawm khaing dee ot aux yam in heue. 8Nawh ang lai tawng ka hoik tawx aux nghox, gaox mai rawm plix siiet pa khraox mai rawm bee khankix ka nawh mai hoik baox naok ti kieh khri, mau nawh khankix nie, viang mawh nan, nawh lai viex ti tan inkix ka siyiex Balax heue. 9Mawh kheu nan, Aux tak sang deeh ing teei nghox aux khankix ka daux bawg yam vawg nghox mai khawm rawm plix siiet pa khraox aux khankix, ka daux baux yam biiet rawm plix siiet mai tak sang deeh teei hauk yung Aux mai kraung man aux khankix, pa sang kheem ti priex tokaux nawh heue. 10Yam in aux tak sang plak jhi krax pa kraing nawh, ka plak sivoe ngai paox moh nawh khankix mai pui tix kaux kawx, tak ang lai pon taoh ti teei nawh khaing dau taix Aux heue. 11Aux tak sang baox deeh kieh krax pa silao rhawm nawh that grai, khawm singaix pawie nawh, haok khix khraox nawh, singaix twah nawh, khawm pawie pa hoik tat nawh ti deuh khawmuik heue. 12Aux tak sang kieh nhu plix siiet nawh khankix laux leeing mai khawm khaox ruh nawh, ka pa hoik ah nawh yuh nin, inkix mawh totaix pa hoik tawx paox moh aux ka aux heue. Aux tak sang kieh kix mawh daux tiagtu mai mawh son pa ih totiag khankix heue. 13Aux tak ciyang ka nawh, son phimap baux singaix pa hoik gleeing nawh ti tan nyawng bhawng khankix ka siyiex Balax heue. Yam an nawh hoik jawg tokaux tix ka krim yhaok mai siang ceu pa mhawm mai hoik hu hawt khaix paox moh nawh, nawh hoik piawm ka Aux heue. Siyiex ah nan heue.”
Krax Caux Rhawm Siyiex
14Mawh kheu nan, jhak heue, Aux tak sang nyaw glaw nawh mai viex nawh laig ka daux tiagtu mai krai lox pa nyawm rhawm ka nawh heue. 15Kaoh khaing tan Aux tak sang tawx sipeem plix siiet ka nawh mai tawx daux lung Akhaw #Yaw 7:24-26mawh siviex pa koe krax keud pot jun pot, nawh tak sang ah lai rhax tan, awm ka baux singaix yam kawn awn ju nawh, awm ka daux singaix yam lih hoek nawh khaing daux meung Ejiptux heue. 16Siyiex ah nin, “Ka daux singaix an maix tak sang kok Aux yuh nin, mex aux eue, mai maix tak ang lai kok ah nin ka Aux, cao aux eue, 17Aux tak sang teei ti tik ceu kaux siyiex Balax khaing daux jheeh pui Aux mai kix tak ang lai deeh doh deud ka ceu kaux in khaix in tibawg kawx heue. 18Ka daux singaix an, Aux tak sang yuh sijax mukheu tau mai totiag daux tiag khankix mai sim sai daux raoma khankix mai khawm ceu pa chix mu ti hu piang tiex heue. Ak mai vaig pa shiao tix daux naing khankix, Aux tak sang raig pot khaing piang haktiex, sonsang kieh kix nyawm it nyawm tum heue. 19Aux tak sang teei maix mawh moeng Aux leeing ju heue. Aux tak sang teei maix mawh cie Aux ka daux krax pa mawh meh mai ka daux krax pa rahsee, ka daux krax pa moh rhawm mai ka daux krax pa caux rhawm. 20Aux tak sang teei maix mawh cie Aux, ka daux pa kaux sijax mai maix tak tawng ka Siyiex heue. 21Siyiex ah nin, ka daux singaix an, Aux tak sang deeh pawk lox ah nin heue. Aux tak sang deeh pawk lox ka raoma mai raoma tak sang deeh pawk lox ka haktiex heue. 22Haktiex tak sang deeh pawk lox ka nghox koi ka rawm plix siiet pa khraox mai ka rawm bee khankix, inkix tak sang deeh pawk lox ka Yezerelax heue. 23Aux tak sang rhuat nawh son tokaux Aux piang haktiex in mai aux tak sang koe krax caux rhawm ka nawh, pa ang sax pon krax caux rhawm heue. Aux tak ah nin ka pui an kix, pa ang tie mawh pui Aux maix mawh pui Aux,#Ro 9:25; 1Pe 2:10 mai nawh tak ah nin Maix Cao mawh Siyiex aux heue.”
Currently Selected:
HOSE 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012