HEBRIE 11
11
Krax Yum Rhawm
1Krax yum rhawm kienie, mawh ceu pa uik fah rhawm grawng sang pon ka ceu pa keud pot jun pot kah mai mawh pa sang een rhawm ti pon ka ceu pa ang nyang bax yaox heue. 2Hoik mawh ka daux an, kuad song khankix pa hoik pon pa kham mhai rug grawng kix heue. 3Mawh kheu krax yum rhawm ex chix tawng, grawng pa hoik lih mawh haktiex,#Jah 1:1 kheu gumlox pa teei ti yuh khaing ceu pa pon ti yaox heue. 4Mawh kheu krax yum rhawm Abelax tan ceu pa tan pa nie lheu mhawm ka Siyiex, khaing pa tan Ka-inax, mawh kheu nan nawh tom pon pa kham mhai rug ka grawng nawh, grawng pa mawh nawh pa rahsee. Siyiex kham mhai rug ka grawng totaix pa tan nawh khankix mai viang nawh hoik yum kawx, nawh kawn sikah tom yam in heue.#Jah 4:3-10 5Mawh kheu krax yum rhawm hoik teei ti gah Enawk, son ang nawh sang yaox krax yum mai sawg ang lai yaox nawh, kheu hoik gah Siyiex nawh hu heue. Nawh Cao hoik kham mhai rug ka grawng nawh, grawng pa hoik yuh nawh pa khaw caw ka rhawm Siyiex, ka sivoe sang gah nawh hu heue.#Jah 5:21-24 6Phan ang koe krax yum rhawm pon ang doh chix khaw caw ka rhawm Siyiex, grawh grawng nawh kaw pa hoek ka Siyiex, tak lai yum rhawm grawng mawh Nawh mai grawng mawh Nawh cao pa tawx bwanson ka kix pa sawg ka Nawh heue. 7Mawh kheu krax yum rhawm, yam tawx Siyiex lox ka Noax, ka grawng ceu pa ang nyang bax yaox khankix, nawh lhat graung mai yuh nyiex reu ting, tom pon taoh pui nyiex nawh heue.#Jah 6:13-22 Mawh kheu nan nawh hoik prawng ti deuh phimap ka haktiex mai hoik lih mawh cao sin ceu pa rahsee awm pa khaw mai krax yum rhawm heue. 8Mawh kheu krax yum rhawm yam kok ka Abraham, nawh nghiet mai lih hu ka dee tak sang pon nawh son sin mai nawh lih hu, viang nawh ang tawng dee sang hu nawh kawx heue.#Jah 12:1-5 9Mawh kheu krax yum rhawm, nawh hoik lih mawh nyo sinie ka daux haktiex pa dex mai lox sijax mukheu an, awm mawh ka daux haktiex pa ang mawh cie nawh mai nawh ot ka daux nyiex gox man, tau mai Icak mai Yakop, pa rom ti mawh cao sin lox mukheu tix mu khaing tau mai nawh heue.#Jah 35:27 10Grawh grawng nawh, nawh ca krox ti jhak son veng pa koe num jaong rong, cao sum cao yuh pa mawh Siyiex heue. 11Mawh kheu krax yum rhawm viang tokaux Sara kawx, pon sibrawm ti nghe doeh ru, yam hoik luan riex ju nawh, mawh kheu, nawh een nawh sawn Kaw pa hoik tawx lox sijax mukheu an mawh pa kaux sijax heue.#Jah 18:11-14, 21:2 12Mawh kheu nan pui tix kaux pa awm pa hoik yum lih mawh keeing cub pui hun pa awm simuing ka daux raoma khankix mai awm mhaik praok rawm sigrit sigra pa ang lai uik chix simin heue.#Jah 15:5, 22:17, 32:12 13Pui in khankix khawmuik hoik yum ka daux krax yum rhawm, yam ang nyang pon lox mukheu khankix, viang mawh nan kix hoik kuk puan khankix dee singai mai ah lox rieb ka khankix mai hoik kham grawng mawh kix pui tang meung mai nyo sinie ka piang haktiex heue.#Jah 23:4 14Grawh grawng nawh kix pa ah lox ceu pa yuh nan kieh grawng sawg kix son meung cie tokaux kix sidawng heue. 15Phan kix hoik keud grawng haktiex dee hoik lih hoek kix khaing an tete, kix hoik pon tix deeh ing kah heue. 16Kix simie ti cie meung pa nie lheu mhawm, pa mawh meung ka raoma heue. Siyiex ang kaig tua, ka pa kok Nawh mawh Siyiex kix, grawh grawng nawh Siyiex hoik cox khre veng tix veng son kix heue. 17Mawh kheu krax yum rhawm, yam cheuk ti yaox ka Abraham, nawh tan ka Icak. Mawh heue, kaw pa hoik gaux rhawm ti rieb ti teei lox sijax mukheu khankix, teei ti tan ka kawn simex tix, pa koe tix kaux khaing,#Jah 22:1-14 18pa mawh kaw pa hoik ah nin ka grawng nawh, “Ka daux Icak tak sang kok mawh ru maix heue.”#Jah 21:12 19Mawh kheu nawh deuh rhawm grawng pa chix Siyiex ti kieh Icak deeh kaoh im khaing krax yum kawx heue. Phan awm lox tiag nawh, hoik deeh pon nawh khaing krax yum heue. 20Mawh kheu krax yum rhawm Icak nawb bwan ka Yakop mai Esaw, ka grawng ceu pa tak sang hoek khaix heue.#Jah 27:27-29,39-40 21Mawh kheu krax yum rhawm yam dex sang yum Yakop nawh nawb bwan ka kawn simex Yosiep khawm ra kaux mai nawh tum piang khaox grix tix mai krub ka Siyiex heue.#Jah 47:31—48:20 22Mawh kheu krax yum rhawm yam dex sang sidah ju Yosiep, nawh simawd ka grawng yam sang lih hu kawn praix Isarelax mai tawm lox ka grawng si ang tix heue.#Jah 50:24-25; Lih 13:19 23Mawh kheu krax yum rhawm yam keh Mose, kheu yaox miex keeing nawh,#Lih 2:2 grawng mawh nawh kawn pa mhawm grang, kiex ang lhat ka lox pa hoik tawm simiang mai kiex mox nawh been loe khix heue.#Lih 2:2 24Mawh kheu krax yum rhawm khaix hoik ting Mose, nawh ang cu ti kieh kok nawh mawh kawn, kawn bun Pharaw,#Lih 2:10-12 25laug ti rom ti kham geu ceu pa nu pa khawm tau mai pui Siyiex, khaing pa pon ti gaux rhawm, ka krax gaux rhawm pa dex mai phimap tix vong vong, 26yiag ceu pa map pa dex mai Cao Khrit, mawh sinngao pa nie lheu ting khaing sinngao meung Ejiptux, grawh grawng nawh, nawh ca jeung ngai tix ka bwanson pa tak sang pon khaix heue. 27Mawh kheu krax yum rhawm nawh ang lhat ka krax song rhawm simiang mai prah ka meung Ejiptux.#Lih 2:15 Grawh grawng nawh, nawh kaux cong awm pa yaox nawh ka Kaw pa ang ngai chix yaox heue. 28Mawh kheu krax yum rhawm nawh priex ti yuh pawie Pasakha mai pa phruah nham, cao pa yuh laux ka kawn Ai khankix, tak ang teeh ang chuh ka pui Isarelax heue.#Lih 12:21-30 29Mawh kheu krax yum rhawm kix hu preeng ka rawm sigrit sigra pa raoh, awm pa hu ka haktiex pa kroh pa sioh mai yam hu pui Ejiptux khankix ti yaox awm an, rawm lhop ka kix heue.#Lih 14:21-31 30Mawh kheu krax yum rhawm guh veng, veng Yerikho grhup, khaix hoik cuang kix kah, aliah singaix heue.#Yaw 6:12-21 31Mawh kheu krax yum rhawm Rahap bun coh kaux, ang lai laux leeing tau mai kix pa ang chix cu nghiet khankix,#Yaw 6:22-25 kheu hoik rieb nawh ti teei pui jiang ka daux krax pa nhim pa yuh paox pie heue.#Yaw 2:1-21 32Aux tak sang baox krai pa yuh ka mawx? Grawh grawng nawh bawg yam aux tak ang kub phan aux krai grawh grawng Gideon,#Cao 6:11—8:32 Barak, #Cao 4:6, 5:31Samson #Cao 13:21, 6:31 Yephathax, #Cao 11:11, 2:7 grawng Davit, #1Sa 16:1; 1Sim 2:11 Samoelax#1Sa 1:12, 5:1 mai cao jhai khankix. 33Mawh kheu krax yum rhawm kix hoik pex ka meung haktiex khankix mai hoik yuh pa rahsee, hoik pon lox sijax mukheu khankix, hoik thox ka jheeh sivai sangsi, #Dan 6:1-27 34hoik kieh sibrawm ngu laux kah#Dan 3:1-30 hoik luan khaing krax laux ka lawm vaid, hoik kieh ting riang khaing daux pa iak riang, hoik lih mawh pa ting riang ka daux pa yuh naing mai hoik kieh kru naing pui tang ceu khankix to heue. 35Bun khankix hoik pon pa deeh kaoh im kawn tix khaing krax yum #1Sim 17:17-24; 2Sim 4:25-37 mai tang kaux tix blah ang rieb ti teei ka krax ploi krax taoh mai kham ceu pa tap toi yum, son sang pon kix pa deeh kaoh im pa nie lheu mhawm heue. 36Tang kaux tix blah kham geu ceu pa nieb yuh pa ang cee ang cak kah mai pa sivied kah, mawh heue. Mai lheu khaing an kham geu ceu pa phyawk mai pa laung daux thawng heue.#1Sim 22:26-27; 2Been 18:25-26; Ye 20:2, 37:15, 38:6 37Hoik dheem kix ka simaox,#2Been 24:21 hoik si kix dud ka jhi, hoik nyaw glaw ka kix, hoik mug kix yum ka vaid, kix hoik ceep hak yung mai hak pex mai hu vung viang, kheu raux ang koe tidtix mai kham geu ceu pa tug kha mai pa tuktiak, 38mai hu vung viang ka daux tiagtu mai piang gawng lua mai ka daux rang mai ka daux tiex heue. 39Inkix khawmuik, viang hoik koe ceu pa kham mhai rug grawng kix, kheu krax yum rhawm kix, kix ang lai pon ka lox sijax mukheu, 40grawh grawng nawh, Siyiex hoik kieh koe ceu pa nie lheu mhawm ka son ex, son ang lai yuh ti kieh kix grum naog, ka pa tang tiah khaing ex heue.
Currently Selected:
HEBRIE 11: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
