Popular Bible Verses from HEBRIE 11

Share

Krax yum rhawm kienie, mawh ceu pa uik fah rhawm grawng sang pon ka ceu pa keud pot jun pot kah mai mawh pa sang een rhawm ti pon ka ceu pa ang nyang bax yaox heue. Hoik mawh ka daux an, kuad song khankix pa hoik pon pa kham mhai rug grawng kix heue.

Phan ang koe krax yum rhawm pon ang doh chix khaw caw ka rhawm Siyiex, grawh grawng nawh kaw pa hoek ka Siyiex, tak lai yum rhawm grawng mawh Nawh mai grawng mawh Nawh cao pa tawx bwanson ka kix pa sawg ka Nawh heue.

Mawh kheu krax yum rhawm ex chix tawng, grawng pa hoik lih mawh haktiex, kheu gumlox pa teei ti yuh khaing ceu pa pon ti yaox heue.

Mawh kheu krax yum rhawm yam kok ka Abraham, nawh nghiet mai lih hu ka dee tak sang pon nawh son sin mai nawh lih hu, viang nawh ang tawng dee sang hu nawh kawx heue. Mawh kheu krax yum rhawm, nawh hoik lih mawh nyo sinie ka daux haktiex pa dex mai lox sijax mukheu an, awm mawh ka daux haktiex pa ang mawh cie nawh mai nawh ot ka daux nyiex gox man, tau mai Icak mai Yakop, pa rom ti mawh cao sin lox mukheu tix mu khaing tau mai nawh heue.

Mawh kheu krax yum rhawm, yam tawx Siyiex lox ka Noax, ka grawng ceu pa ang nyang bax yaox khankix, nawh lhat graung mai yuh nyiex reu ting, tom pon taoh pui nyiex nawh heue. Mawh kheu nan nawh hoik prawng ti deuh phimap ka haktiex mai hoik lih mawh cao sin ceu pa rahsee awm pa khaw mai krax yum rhawm heue.

Mawh kheu krax yum rhawm hoik teei ti gah Enawk, son ang nawh sang yaox krax yum mai sawg ang lai yaox nawh, kheu hoik gah Siyiex nawh hu heue. Nawh Cao hoik kham mhai rug ka grawng nawh, grawng pa hoik yuh nawh pa khaw caw ka rhawm Siyiex, ka sivoe sang gah nawh hu heue.

Mawh kheu krax yum rhawm Abelax tan ceu pa tan pa nie lheu mhawm ka Siyiex, khaing pa tan Ka-inax, mawh kheu nan nawh tom pon pa kham mhai rug ka grawng nawh, grawng pa mawh nawh pa rahsee. Siyiex kham mhai rug ka grawng totaix pa tan nawh khankix mai viang nawh hoik yum kawx, nawh kawn sikah tom yam in heue.

Mawh kheu krax yum rhawm viang tokaux Sara kawx, pon sibrawm ti nghe doeh ru, yam hoik luan riex ju nawh, mawh kheu, nawh een nawh sawn Kaw pa hoik tawx lox sijax mukheu an mawh pa kaux sijax heue.

Grawh grawng nawh, nawh ca krox ti jhak son veng pa koe num jaong rong, cao sum cao yuh pa mawh Siyiex heue.

Mawh kheu krax yum rhawm khaix hoik ting Mose, nawh ang cu ti kieh kok nawh mawh kawn, kawn bun Pharaw, laug ti rom ti kham geu ceu pa nu pa khawm tau mai pui Siyiex, khaing pa pon ti gaux rhawm, ka krax gaux rhawm pa dex mai phimap tix vong vong, yiag ceu pa map pa dex mai Cao Khrit, mawh sinngao pa nie lheu ting khaing sinngao meung Ejiptux, grawh grawng nawh, nawh ca jeung ngai tix ka bwanson pa tak sang pon khaix heue. Mawh kheu krax yum rhawm nawh ang lhat ka krax song rhawm simiang mai prah ka meung Ejiptux. Grawh grawng nawh, nawh kaux cong awm pa yaox nawh ka Kaw pa ang ngai chix yaox heue.

Mawh kheu krax yum rhawm, yam cheuk ti yaox ka Abraham, nawh tan ka Icak. Mawh heue, kaw pa hoik gaux rhawm ti rieb ti teei lox sijax mukheu khankix, teei ti tan ka kawn simex tix, pa koe tix kaux khaing

Mawh kheu krax yum rhawm Rahap bun coh kaux, ang lai laux leeing tau mai kix pa ang chix cu nghiet khankix, kheu hoik rieb nawh ti teei pui jiang ka daux krax pa nhim pa yuh paox pie heue.

Mawh kheu krax yum rhawm kix hu preeng ka rawm sigrit sigra pa raoh, awm pa hu ka haktiex pa kroh pa sioh mai yam hu pui Ejiptux khankix ti yaox awm an, rawm lhop ka kix heue.

Mawh kheu krax yum rhawm guh veng, veng Yerikho grhup, khaix hoik cuang kix kah, aliah singaix heue.

Mawh kheu krax yum rhawm nawh priex ti yuh pawie Pasakha mai pa phruah nham, cao pa yuh laux ka kawn Ai khankix, tak ang teeh ang chuh ka pui Isarelax heue.

Mawh kheu krax yum rhawm yam dex sang sidah ju Yosiep, nawh simawd ka grawng yam sang lih hu kawn praix Isarelax mai tawm lox ka grawng si ang tix heue.

Mawh kheu krax yum rhawm yam dex sang yum Yakop nawh nawb bwan ka kawn simex Yosiep khawm ra kaux mai nawh tum piang khaox grix tix mai krub ka Siyiex heue.

Mawh kheu krax yum rhawm Icak nawb bwan ka Yakop mai Esaw, ka grawng ceu pa tak sang hoek khaix heue.