2 GRAWNG BEEN 4
4
Kraung Shiao Son Nyiex Bwan
(1Sim 7:23-51)
1Lheu khaing an nawh yuh khu tawng dee tan tix mu#Lih 27:1-2, piak lang koe tixnga sawk, plak vieh koe tixnga sawk mai plak lhaong koe kao sawk heue. 2Khaix an, nawh baox raug ti yuh dung rawm ka tawng lheung pa lak lo pakpeung, krax vieh koe kao sawk, krax lhaong koe phwan sawk mai hawt vung viang moing koe tixngoe sawk heue. 3Ka plak greem hawt praok moing an, koe grang pakpeung jiet awm riang mawie khankix khawmuik, hawt paw dung rawm tawng an daux tix sawk koe riang grang mawie ka kao mu, riang grang mawie khankix mawh pa raug tix koe ra tia yam hoik raug kix ti yuh heue. 4Rawm dung an hoik deuh tix piang riang moi kao ra mu, loe mu vai ngai tix ka plak laong, loe mu vai ngai tix ka plak klip singaix, loe mu vai ngai tix ka plak seh mai loe mu vai ngai tix ka plak lih singaix rawm dung hoik deuh ti ot piang kix mai kix ghaix kre tix ka plak daux khawmuik heue. 5Krax pu dung rawm koe tix tiag taix mai moing nawh awm pakpeung moing klong, awm kho tai kraox nhawng, rawm hoik kub laig ka daux loe rheng bat heue. 6Nawh baox yuh pan khoek kao mu#Lih 30:17-21 mai phwan mu deuh ka praok plak dawm mai an phwan mu deuh ka praok plak gwiex, sonsang yaox kix tix sigrhah krax tan pa gleeing khankix ka daux an, viang mawh nan, dung rawm an mawh sonsang khoek heem cao giex kaing li tix ka daux heue. 7Nawh yuh jawk ten khri kao mu#Lih 25:31-40 awm pa hoik koe pakpeung kix mai nawh deuh kix ka daux nyiex bwan, phwan mu ka praok plak dawm mai phwan mu ka praok plak gwiex heue. 8Nawh baox yuh pheen kao mu#Lih 25:23-30 mai deuh ka daux nyiex bwan, phwan mu ka praok plak dawm mai phwan mu ka praok plak gwiex heue. Nawh baox yuh klong khri tixyieh mu heue. 9Baox nie lheu khaing ankix, nawh yuh vang ot cao giex kaing li khankix mai vang pa kied ting mai siviex ting son vang an mai nawh hoik kraix om siviex ting an khankix ka tawng lheung heue. 10Nawh deuh dung rawm an ka praok plak dawm, plak seh plak lih singaix heue. 11Khaix an Huram, yuh aw, kawk pug rawm mai klong khankix heue. Mawh kheu nan, Huram, hoik yuh kaing pa caw nawh ti yuh son simiang Sawlamon ka daux nyiex bwan Siyiex; 12Pa hoik yuh tix mawh rong khankix ra mu mai kaing rong ankix pa awm grang pakpeung klong, pa lang chup tix piang toeh rong an ra mu, plah dieb ngai rub pa sang tawb ti deuh kaing rong pa awm pakpeung klong an ra mu pa hoik koe piang doeh rong khankix, 13pakpeung plix kla jiang pon yieh mu, son plah dieb ngai rub ra mu, pakpeung plix kla jiang ra tia son plah dieb ngai rub ankix ku mu, sonsang mawh pa kheem ka kaing rong pa awm klong ra mu, pa hoik koe piang toeh rong an khankix, 14mai nawh baox yuh ling lawx iak khankix mai deuh pan ting piang ling lawx iak an, 15dung rawm tix mu mai riang moi kao ra mu ka plak greem an, 16mai khawm aw, kawk pug rawm, sigawng nex mai khawm kraung pa shiao kix khawmuik, Huram cao pa min ka kaing taix kuceu, yuh ti tawx tawng lheung pa kied plang son simiang Sawlamon mai nyiex bwan Siyiex heue. 17Ka daux lung Yawdan, simiang hoik kieh kix raug ti yuh ankix ka daux tiex glaox baoh sinax veng Sukok mai veng Zeredax khankix heue. 18Sawlamon hoik pon tix koe kraung khrai inkix khawmuik ka pa hoik yuh tix khankix ka daux pa kied haoh hun mai nawh hoik ang lai tawng tix sawn ka krax diang cien tawng lheung khankix heue. 19Mawh kheu nan, Sawlamon hoik koe kraung shiao pa hoik yuh ti deuh son nyiex bwan Siyiex, pa mawh khu khri dee tan mai pheen pa sang khan ti deuh blah khankix, 20jawk ten khri tau mai kawk ngu pa hoik yuh tix ka khri nawnaw, sonsang tok tix ka daux krax pa hoik koe been ti deuh plak sivoe dee pa singax singeh, 21tau mai tai mai kawk ngu mai gip kong ngu, pa yuh tix ka khri nawnaw khankix, 22Sigiiep ngu, klong, jaok pa lang mai pan daong nyaox pa yuh tix ka khri nawnaw khankix heue. Awm diang krax dee laig kix ka dee pa singax singeh, siviex ting plak daux an, tom hoek ka dee pa kied singax singeh mai siviex ting plak daux num lawg ting nyiex bwan khankix, hoik mawh pa jawg tix ka khri khawmuik heue.
Wa Common Language Bible © Bible Society of Myanmar, 2012