2 GRAWNG BEEN 3
3
Grawng Sum Nyiex Bwan
(1Sim 6:1-38)
1Yam in Sawlamon jah tix sum nyiex bwan Siyiex ka daux veng Yerusaliem piang gawng Mawrix, dee pa hoik jhi Siyiex tix ka keeing nawh Davit mai ka dee pa hoik khre rien Davit ti deuh piang gwang glah pah nghox Awnan, ceu pui Yebusix heue. 2Nawh jah ti sum nyiex bwan an ka daux khix ra, ra ngaix yam hoik naog kwang nawh ka haktiex daux pon num tix num heue. 3In mawh num riah pa sum Sawlamon, ti deuh son nyiex bwan Siyiex heue. plak lang koe tigliah sawk, awm sawk prim pa hoik shiao ju dix mai plak vieh koe tixnga sawk heue. 4Sidub koe ka plak sivoe nyiex bwan, plak lang koe tixnga sawk, sidu vieh awm plak vieh nyiex bwan mai krax lhaong koe tixyieh tixnga sawk heue. Nawh hoik om plak daux ka khri nawnaw heue. 5Son daux lawg pa ting, nawh hoik kab ka phia khaox gix mai kraix om ka khri pa mhawm mai nawh saik ti deuh riang khaox sanlun mai riang maox soi khankix piang heue. 6Nawh jawg khre nyiex bwan ka siang simaox pa kied laoh lie sonsang mhawm ti yaox mai khri khankix mawh khri pa kaoh khaing plak meung Paravem heue. 7Nawh baox deeh kraix om nyiex bwan, lat mai pang siviex, ding mai siviex ting ka khri mai nawh saik ti deuh riang Cherubin ka ding nyiex heue. 8Nawh baox deeh yuh dee pa kied singax singeh#Lih 26:33-34 heue. Krax lang koe tixnga sawk, awm krax vieh nyiex bwan mai krax vieh koe tixnga sawk heue. Nawh hoik kraix om ti deuh ankix ka khri ceu pa mhawm liah yieh talantan heue. 9Krax ciien jim rhiem khri koe tixphwan shekhe mai nawh kraix om plak piang khankix ka khri heue. 10Ka daux dee pa kied singax singeh, nawh yuh ti deuh riang Cherubin ra mu pa saik awm paox tix mai kraix om ankix ka khri heue. 11Pruik Cherubin, krax lang khawmuik koe tixnga sawk, pruik Cherubin tix plak son tix mu koe phwan sawk, hoik teeh ding daux lawg; mai pruik an tix plak koe phwan sawk mai hu teeh pruik Cherubin an tix mu, 12Pruik Cherubin an tang mu tix plak koe phwan sawk mai pruik an hoik hu teeh ka ding daux lawg mai pruik an tix plak kawx koe phwan sawk mai hoik teeh pruik Cherubin an tang mu heue. 13Pruik Cherubin inkix hoik di tix koe tixnga sawk khawmuik, kix cung ka caong cao kix mai kix veeh pakngai tix plak daux heue..#Lih 25:18-20 14Nawh yuh ti deuh man tie pa klai raoma mai man lheung pliex mai man pa raoh mai man keei ceu pa mhawm mai kix taing tix sau riang Cherubin ka daux man ankix heue. 15Nawh baox yuh ti deuh rong pa lhaong tixngoe phwan sawk ra mu, ka plak sivoe nyiex bwan mai kaing rong pa koe toeh rong ankix ku mu plak lang koe phwan sawk heue. 16Nawh yuh maox ceng khankix awm pa hoik koe ka plak daux dee pa singax singeh mai deuh ankix piang toeh rong mai nawh baox yuh riang pakpeung plix kla jiang tixyieh mu mai sau ti deuh piang maox ceng khankix heue. 17Khaix an, nawh sum rong an khankix ka plak sivoe nyiex bwan, ka plak khawn dawm tix mu mai ka plak khawn gwiex tix mu, nawh kok ceu kaux rong pa koe plak khawn dawm mawh Yakhim mai rong pa koe plak khawn gwiex kok ceu kaux mawh Bawzax heue.
Wa Common Language Bible © Bible Society of Myanmar, 2012