Sofon%EDas 3
3
Mak atzalal xaq i kuyb'al mak re i tinimit Jerusalén
1¡To' uwach i tinimit Jerusalén, jun tinimit qelqel,
tz'il laj tinimit xaq aj aj-anol k'ax!
2Xukoj ti retalil uch'awb'al i Ajwal
i xraj taj chi ksuk'b'axik;
xukub'a ti uk'ux che Ire,
xutzukuj ti u-Dios.
3I je raj-atzil je keje pacha i koj chi kraqaq pkiqul;
i ke'ataw tzij je keje pacha i utiw pa taq tz'inilik jyub' chaqij
chi lik kkikanaj ti jun b'aq re kkitij chukab' ij.
4I je u-profeta lik kekojon taj, lik xa keb' kipalaj;
i je rajsujul sipon kkiqajsaj u'ij i lo'laj k'ijib'al re i Dios,
xaq kki'an taj wach kub'ij i atb'al tzij re i Ajwal.
5Xwiri i Ajwal o pa tinimit;
Ire xwi ku'an i utz, i ku'an ti utz taj.
Ronojel usaqirb'al, lik kramtaj ti che u'atik utzij.
Xwiri i utz ti laj winaq reta'am ti i k'ixb'alil.
6I Ajwal kub'ij:
Insachom kiwach i nimaq taq tinimit,
ink'aqom pulew ni'pa i nimaq taq tak'taq re i tapial
xaq in-anom tz'inilik che uxol taq ub'e,
chi lik nti chik winaq ke'ik'aw che.
¡Che i tz'inilik nimaq taq tinimit
lik nti chik jun winaq kkanaj chwach!
7Xinch'ob'o: Keje ile i tinimit Jerusalén kuxij ni rib' chwe
xaq kraj na are kinsuk'b'a;
keje ile ksach ti uwach i rachoch
man xinya utojb'alil che.
Xwiri ike lik xek'achir la chu'anik
ronojel taq uwach i mak atzalal.
8Rumali, chiniwoy-ej ni yix che i ij
are kinwalij b'i che i lapanik chiwij.
Yin in Ajwal, kinb'ij:
Inch'ob'om umolik kichi' i nimaq taq tinimit xaq i ajawinik
re kinya b'i ronojel i woywal pkiwi ike,
xaq nim laj u'a'ul i woywal.
¡Ronojel i jyub' ta'aj ksach ni uwach
rumal u'a'ul i woywal!
9Are kupon ile, kin-an ni ch'am
che kich'ab'al i tinimit,
man keje ile konojel kkikoj in-ij,
xaq ketiki chub'ixkil inb'i.
10Ch'aqa ya re taq raqana Etiopía,
intinimit chi je kichernaq b'ik kek'un ni k'iyal mul chutz'onoxik utzil chwe
xaq kuk'am li kisipon chwe.
11Intinimit, che taq i ij le,
lik katk'ix ti chik
che ronojel i anik chi xa'ano are xinaqel yin,
rumali kewesaj ni awu'
i je qelqel laj taq winaq
chi xaq kki'an nim che kib'.
I lik kak'ut ti chik unimarsaxik awib'
chupam i lo'laj injyub'.
12Yin kinya ni kan winaq chawe chi lik je ajaj xaq lik utz kik'ux,
chi lik kkikub'a kik'ux che inb'i.
13Ni'pa i kek'asi kan che i tinimit Israel
kki'an ti chik i utz taj,
xaq ket'oron ti chik,
xaq nti chik tzij chi chom taj kel pkichi'.
Lik ketiki ni chutzuqik kib'
xaq lik ke'uxlan na i lik kkixij ti kib'.
B'ix re kikotemal rumal i tinimit Jerusalén
14¡Chatb'ixanoq, tinimit Sion!
¡Chatsik'in ru' kikotemal, tinimit Israel!
¡Chatkikotoq, tinimit Jerusalén,
lik chatkikot ru' ronojel awanima!
15I Ajwal ya xresaj utojb'alil amak chawij
xaq lik je uk'ulam ti ajch'oj chawij.
I Ajwal, chi Ajawinel re Israel, lik o awu':
Lik kaxij ti chik uri awib' che i utz taj chi kek'unik.
16Che taq i ij le kb'ix ni che i Jerusalén:
“¡Maxij awib' tinimit Sion,
xaq maya chke a'ab' chi kk'is kicho'ab'!”
17I Awajwal Dios o awu';
¡Ire lik ronojel ktiki che i katuto na!
I Ajwal lik kkikot ni awu' yet.
Ru' k'axnab'al uk'ux kuya chik k'ak' ak'aslemal;
i rumal ukikotemal kb'ixan na.
18Keje pacha jun ij re nima'ij.
Kitzalijik i winaq chi je elsam b'i chwach kulew
Kub'ij i Ajwal:
“Yin katwesaj ni pu'ab' i utz taj chi lik at uterb'em
xaq che i k'ixb'alil chi o pawi yet.
19Che i ij le kin-an ni ch'oj
chkij konojel ni'pa i kki'an k'ax chawe.
Kinto ni i chij chi kjetz'pinik
xaq kin-an ni utz che i jun chi sachnaq;
kinya ni u'ij xaq retamaxik
chwach ronojel i jyub' ta'aj, ronojel i yo'yanik chi xki'an chiwe.
20Che taq i ij le
kixink'am na li yix, kinmol ni ichi';
kin-an ni chiwe chi lik kjaltaj uwach ik'aslemal
xaq kin-an ni chiwe chi k-etamax iwach xaq o ni i'ij
chkixol konojel i winaq chwach i jyub' ta'aj.
Yin in Ajwal, inb'im.”
Currently Selected:
Sofon%EDas 3: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
