Hageo 1
1
Ub'ixkil uyijb'axik tan chik i rachoch i Ajwal
1Che ukab' junab' re u'atik tzij re i ajawinel ma Darío, che i nab'e ij re uwaq ik', i Ajwal xub'ij che i profeta Hageo, chi k-e chub'ixkil che i atol tzij re Judá, ma Zorobabel chi uk'ojol i ma Salatiel, xaq che i aj-ok'al utzam ke i ajsujul sipon, ma Josué, uk'ojol ma Josadac.
2-3Iri are xub'ij i Ajwal chi ronojel ktiki che, che i profeta chi kub'ij na: “I winaqi kkib'ij chi k'amaja kuriq i ij chi kyak tan chik wachoch. 4¿Xatab'a chiwe yix are i ij iri re kixjeqi chupam chomiq taq ja, tz'aqat i wachoch Yin tzaqnaq pulew? 5Yin in Ajwal chi Ronojel Kintiki che, kinb'ij chiwe lik chich'ob'o ub'e wach kixtijin chu'ankil. 6Yix lik k'i kitiko xwiri xa jub'i' kimolo; kitzuq iwib', xwiri lik kixnoj taj; kitu' iya' xwiri kik'aw ti ik'atik; kipasij iwib' xwiri lik kixmi' taj; i jun chi kchakun ij ij i rajil lik k-on taj. 7Yin in Ajwal chi Ronojel Kintiki Che, kinb'ij chiwe chi lik chich'ob'o wach kixtijin chu'ankil. 8Jix chwi taq jyub', chik'ama li che' xaq chiyijb'a chik wachoch. Yin lik kinkikotik kink'iji ni chupam xaq kink'ut ni inchomalil; keje ile kub'ij i Ajwal. 9Yix lik k'i kitzukuj, xwiri xa jub'i' kiriqo; ni'pa kik'ol piwachoch, Yin xa ru' wuxlab' kinxut'ij b'ik. ¿B'uchak? Man i wachoch wulijnaq, tz'aqat yix xwi kich'ob' uyijb'axik iwachoch yix. Yin in Ajwal, kinb'ij. 10Rumali kpe ti jab' piwi yix, xaq mitene ulew kuya ti i tikon. 11Are yin, xink'am li k'atik puwi i uwa taq ta'aj xaq chwi taq jyub', puwi i trigo, uche'lal uva xaq i olivo, pkiwi ni'pa taq i molonik pa taq es, pkiwi winaq xaq pkiwi i chikop, xaq puwi ni'pa taq kichak.”
12I ma Zorobabel, ma Josué xaq i winaq chi je kanajnaq chila lik xkixij kib' are xkita wach kub'ij i Ajwal chke pub'i i profeta ma Hageo, iri are i tzij chi Ajwal Dios uya'om te chuqul ub'ixkil. 13Are uri i ma Hageo, chi ajb'il utzij i Ajwal, xch'aw chke pub'i i Dios i xub'ij chke: “I Ajwal kub'ij: Yin in Ajwal kinb'ij: Yin in o iwu' yix.”
14-15Keje uri ile, i Ajwal xuya ukowil uk'ux ma Zorobabel, chi aj-atol tzij re i Judá, ma Josué chi aj-atzil ke ajsujul sipon, xaq i winaq chi je kanajnaq kanoq, che i ij kajib' juwinaq re uwaq ik' re ukab' junab' re rajawinik i ajawinel ma Darío, xkijeq tan chik uyakik i rachoch i Ajwal Dios, i Ajwal chi ronojel ktiki che.
Currently Selected:
Hageo 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
