Apocalipsis 5

I b'orom wuj chi o tz'ib' chwach xaq i Ral Chij

1Te'uri xwilo, i Jun chi kul pa kub'ib'al chi o u'ij, o jun wuj pu'ab' wiqab'im. I wuj le, o tz'ib' che k'ulala, xaq b'orom uwach, xaq nak'om wuqub' sello chuchi', tz'apb'al re. 2Are uri xwil jun ángel, nim ucho'ab', ksik'in chub'ixkil: “¿Pachin nawi kmajaw che kujaq i wuji xaq kuraqch'ij i sello chi tz'apb'al re chi o che?” Xub'ij. 3Xwiri, nti jun xriqtajik chi ktiki chujaqik i wuj le xaq kutaqej na wach o chwach; lik ntaj, mitene chkixol i je aj chikaj, xaq mitene chkixol i je aj chwach i jyub' ta'aj, xaq mitene chkixol i je kamnaq. 4Yin lik xino'ik, man nti jun kmajaw che kujaq i wuj le, xaq mitene krajlaj uwach, mitene kutaqej. 5Te'uri o jun chke i nimaq taq winaq xub'ij chwe: “Chamayij o'ej, chi o wi ire chi kmajaw che kujaq i wuj. Ire le are i Cristo aj Israel winaq chi koy-em, are i Jun chi umuq uxikin kan i ajawinel ma David. Ire le o ucho'ab' pacha jun koj, man uqajsam ucho'ab' Itzel; rumal uri o pu'ab' kuraqch'ij i wuqub' sello xaq kujaq i wuj.” Xub'ij chwe.

6Are uri xintaqej, xaq xwil pacha jun Ral Chij alaj che chi kamsam na#5.6 I Chij le, antal che chi kamsam na chwach i Dios, tojb'al re kimak i winaq. Are i Jesucristo chi xkamsaxik, tob'al ke yoj., xwiri k'aslik tak'al chila. Chila tak'al wi ru' i kub'ib'al chi o u'ij, chkiwach i kajib' b'iroxik chi o kixik' pacha winaq ketzunik, xaq chkiwach i nimaq taq winaq. I Ral Chij le, o wuqub' rok'a', xaq wuqub' ub'a'wach, ile are i wuqub' Lo'laj Utewal i Dios utaqom li chwach ronojel i jyub' ta'aj. 7Are uri i Ral Chij xtejeb' ru' i Jun chi kul pa kub'ib'al chi o u'ij, xuk'am i b'orom wuj che chi o pu'ab' wiqab'im. 8Are xuk'am i wuj, i kajib' b'iroxik chi o kixik' pacha winaq xexuki chwach i Ral Chij le; xaq keje xki'an i je kajib' juwinaq (24) nimaq taq winaq. I je nimaq taq winaq le, chkijujunal o ki-arpa, xaq kuk'am b'i tu'b'al re an-o'oj nojnaq che pom porb'al re chwach i Dios. I pom le are kitz'onb'al i jutzob'aj re i Cristo chwach i Dios. 9Xkib'ixaj jun b'ix lik k'ak'; are iri:

“Yet kmajaw chawe kak'am ni wuj le xaq karaqch'ij ni sello chi o che;

man yet at kamsam chwach i Dios,

xaq ru' akik'el xealo' i winaq, yab'al ke che i Dios.

Je alo'om ronojel i tinimit, ronojel i jyub', ronojel kijayil, xaq ronojel ch'ab'al.

10Aya'om chke je ajpatan chrij i qa-Dios:

A'anom chke je ajawinelab', xaq je rajpatan i Dios,

aya'om chke kki'an i atb'al tzij chwach i jyub' ta'aj.”

Keje ile xkib'ixaj i nimaq taq winaq.

11Te'uri xintaqej, xaq xinta kich'awb'al k'iyal ángel; ike kisutim kij i nimaq taq winaq, xaq i kajib' b'iroxik chi o kixik' pacha winaq ketzunik, xaq i Jun chi kul pa kub'ib'al chi o u'ij. I kik'iyal i ángel le, lik nti koqxik. 12Ike xesik'in chub'ixkil i tziji:

“¡I Ral Chij chi kamsam na,

kmajaw che chi koksax u'ij rumal o pu'ab', rumal ub'eyomal,

rumal unojb'al, rumal ucho'ab',

kmajaw che chi koksax ni u'ij, kb'ix ni uchomal, kb'ix ni unimal u'ij!”

Keje ile xkib'ij i k'iyal ángel.

13Xaq xinta kich'awb'al konojel ni'pa taq i je antal rumal i Dios, ni'pa i je o chila chikaj, ni'pa i je o chwach i jyub' ta'aj, ni'pa je o chuxe' ulew, xaq ni'pa i je o pa mar, chi kkib'ij:

“¡Che Ire, chi kul pa kub'ib'al chi o u'ij, xaq che ire chi Ral Chij kb'ix che,

chqab'ij ni ki'ij, chqab'ij ni kichomal, chqab'ij ni kicho'ab', kqakoj ni ki'ij

rumal wach o pki'ab' k-e ij saq chkij!”

Keje ile xkib'ij konojel.

14Are uri i je kajib' b'iroxik chi o kixik' pacha winaq ketzunik xkib'ij: “¡Lik keje ile ch-antaj na!” Xecha. Are uri i je kajib' juwinaq (24) nimaq taq winaq xexuki'ik, xaq xkikoj u'ij Ire chi kk'is ti uk'aslemal k-e ij saq chrij.

Currently Selected:

Apocalipsis 5: ACHICUB

Highlight

Compare

Copy