Filipenses 3

Lapanik chrij i circuncisión xaq i atb'al tzij

1Yix wo'or wachalal chwach i Cristo, chixkikot ni rumal i Ajwal. O chik jun tzij kinb'ij chiwe; tupu intz'ib'am chik i tziji chiwe, yin krix ti ink'ux chub'ixkil, man lik kuriq uchak chiwe. 2Chi'ana kwent chke ike chi kkib'ij chi yix o uchak ki'an i circuncisión ike le utz ti kki'ano. 3Man are yoj iwu' lik antal i circuncisión chqe lik oj saqil, man yoj kqakoj u'ij i Dios pqak'ux, xaq kul qak'ux xwi che i Jesucristo. Kqakub'a ti qak'ux che taq i aljinsab'al, we antal che i qach'akul, o we ntaj. 4Yin, wetene kwaj, kinkub'a ni uri ink'ux che ile, man in-anom chik ronojel pacha i kkib'ij ike le. Mijun chke ike u'anom ni mas ile chinwach yin. 5#3.5 Ike kkikoj ki'ij man attal tz'um chutzam kichulb'al chi je achiyab'.Yin, are o wajxaqib' ij chwe, xki'an i circuncisión le chwe. Lik in aj Israel winaq, in umuq uxikin kan i mam Benjamín; lik in aj Hebreo winaq che walaxik, inqajaw inchuch je aj Hebreo winaq; lik xinkoj u'ij i atb'al tzij tz'ib'tal kan rumal i mam Moisés, man in aj Fariseo, xaq lik xinya ink'ux che ile. 6Lik xinya inwach ku' ike chi kki'an k'ax chke i jutzob'aj re i Cristo. We kqa'an utz che qib' xa rumal i qakojonik che i ujer atb'al tzij, yin lik in utz uri, man lik xinkojon che ile. Lik mijun inmak xriqtaj chupam ile. 7Ronojel ni'pa i xin-an ujer, chi xinch'ob' yin moq kinch'ak ni i utz rumal, wo'or kinkoj ti chik u'ij. Wo'or weta'am chi ronojel ile nti uchak chwe rumal i Cristo. 8Xwi ta la ile, xaq ronojel ni'pa i olik nti chik uchak chwe; xwi i retamaxik i Jesucristo chi Wajwal, are ile kuriq uchak chwe. Ronojel ni'pa i olik xinkanaj kanoq rumal i Cristo, pacha tz'il xin-an che, lik xink'aq kanoq xa rumal uriqik i Cristo, 9man kwaj yin in o ni che ire. Rumali, kinya ti chik incho'ab' chukojik i ujer atb'al tzij anb'al utz che wib' chwach i Dios. Kwaj yin utz in o chwach i Dios xa rumal ukub'ib'al ink'ux che i Cristo; are inyijb'axiki kwaj yin, chi kpe ru' i Dios. 10Are i kwaj yin, retamaxik mas uwach i Cristo, xaq kwaj kinna ni ucho'ab' pink'aslemal, chi are i cho'ab' chi o ru' rumal uwalijik che i kamik. Xaq kwaj kinya ni wib' chutijik i k'ax pacha xuna ire. Xaq kwaj kin-an che wib' pacha ire, are xuya rib' che i kamik, 11man kwaj uriqik i ij chi kinwalij chkixol i kamnaq.

K'amaja kojupon che i k'isb'al taq anik chi rajwaxik kqa'ano

12Yin xinb'ij taj we inriqom chik ronojel ile, xaq xinb'ij taj we lik in utz chik. Xwiri kintijin chi b'e, lik kinkoch'ij wib' chu'anik re kintiki chu'anik, man rumal ile xinucha i Jesucristo. 13Ix, wachalal chwach i Cristo, yin xinb'ij taj we ya inriqom chik ronojel, xwiri, are kin-ano, kinsachsaj pink'ux ni'pa in ik'awnaq chupam; are i kin-ano, kinkoch'ij ni wib' chu'anik ni'pa i k'a rajwaxik kin-ano. 14Rumali lik kinkowij ink'ux che i b'inik chupam i utz, man keje ile kinch'ak i sipon chi i Dios kojusik'ij chuk'amik chila chikaj rumal i Jesucristo.

15Qonojel ni'pa i jikil qak'ux chupam i saq laj tzij re i Dios, o uchak kqach'ob'o pacha i xinb'ij le. We junwi kich'ob' yix chrij ile, i Dios xaq ku'aljinsaj ni ile chiwe. 16Xwiri chqach'ob'o xaq chqa'ana pacha kraj i qak'aslemal k'ak' chi oj kojonnaq chik che.

Yoj oj aj chikaj

17Ix, wachalal chwach i Cristo, chi'ana yix iwonojel pacha i kin-an yin, xaq chikojo retalil chke i jub'an chi kki'ano pacha kqa'an yoj.#3.17 Keje ile chi'ana man ni'pa taq i kojtijin chu'anik are i k'utb'al re chiwe yix. 18Man lik je k'i i winaq chi kkich'ob' ike chi lik nti uchak i ukamik i Cristo chwach i krus. K'iyalmul inb'im chik ile, xaq laj kin-o' chub'ixkil tan chik chiwe. 19Ike chi keje kech'ob'ow ile, ksachsax ni kiwach pa a' man i ki-diosil ike xa are utzuqik kib'. Ronojel ni'pa taq i kki'ano le, utz ne te ri wetene kek'ix che, xwiri ike le xa kki'an nim che kib' rumal. Ike to' kkich'ob' i kik'aslemal waral chwach i jyub' ta'aj. 20Xwiri, yoj oj re i tinimit chila chikaj, xaq lik qoy-em ni uk'unik i Tol qe aj chila chikaj, chi are i Ajwal Jesucristo. 21Kolujalwachij i qach'akul chi nti u'ij, k-onb'ej ni xaqjun che pacha i re ire, chi lik nim u'ij uchomal. Ire ktiki ni che rumal i nim laj ucho'ab'; i ucho'ab' le xaq ktiki ni che ronojel ni'pa olik.

Currently Selected:

Filipenses 3: ACHICUB

Highlight

Compare

Copy