Filipenses 2

Chomb'al ib' xaq u'anik ajaj che qib'

1Yix chi ix re chik i Cristo, we o ukowil ik'ux uya'om chiwe, we kuxlan ik'ux rumal k'axnab'al uk'ux ire chiwe, we o i Lo'laj Utewal i Dios iwu', we kiwaj iwib' chiwach, we xaq kiwil tob'al iwib' chiwach, 2chitz'aqatsaj uri ru' iri: Chininojsaj ru' kikotemal, chi'ana che iwib' lik junam iwach, xaqjun i k'axnab'al ik'ux chiwach, xaqjun i nojb'al, xaqjun iwanima che wach i ki'ano. 3Ronojel ni'pa i ki'ano, mi'ano we xa rumal ch'oj o we xa rumal i utz kiwaj kpe piwi yix, xaq we xa kojb'al re i'ij yix ki'ano. Xwiri ni'pa i ki'ano, mi'an nim che iwib' chu'ankil; chi'ana che iwib' chi o mas ki'ij i iwachi'il chiwach yix. 4Chitzukuj upetsaxik i utz pkiwi i jub'an, mi'an ile chi xwi piwi yix kiwaj i utz.

I u'anik ajaj che qib' xaq nim laj u'ij i Cristo

5Chi'ana che inojb'al yix xaqjun pacha unojb'al i Jesucristo.

6Ire, xaqjun ru' i Dios, xwiri xu'an ti nim che rib' rumal ile;

xuch'ojij ti ukojik u'ij pacha re i Dios.

7Are i xu'an ire,

xuya kan u'ij xaq xu'an che rib' pacha winaq;

lik xu'an pacha mokom che rib'.

8Are xk'un waral, xu'an ti nim che rib', xwiri lik xkojon che i Ta chikaj,

lik xuya ni rib' che i kamik.

I kamik chi xik'aw wi, lik k'ixb'alil, man xkamsax chwach i krus.

9Rumal ni'pa i u'anom le, i Dios xuya che chi atz u'ij,

I ub'i le, atz u'ij chkixol ronojel taq i b'iyaj.

10Keje xu'an i Dios ile,

man konojel kexuki na are kkita ub'i i Ajwal Jesús;

konojel i je aj chikaj, xaq konojel i je aj chwach i jyub' ta'aj, xaq konojel i je aj chuxe' i jyub' ta'aj.

11Is konojel kkib'ij na chi are i Jesucristo are i Ajwal.

Re oksab'al u'ij i Qaqajaw Dios.

Chi'ana saqil che i totajik pik'aslemal

12Rumali, ix, wachalal chi lik kixwaj. Keje pacha yix chi lik arewi xixkojonik; wo'or chi naj in o wi chiwe, chikowirsaj ni i kojonik le. Chiya iwib' chu'ankil wach i k'a kajwax chiwe re i iwelb'al chisaq. Chixija iwib', xaq mi'an nim che iwib', 13man are i Dios ktijin che uchak pik'ux yab'al re i utz laj rayijb'al chu'ankil pacha kraj ire, xaq kuya'o wach i rajwaxik chiwe.

14Ronojel ni'pa i ki'ano, chi'ana ru' ronojel ik'ux, mikoj uch'ojil, mitzukuj tzij. 15Keje ile chi'ana, man ke'el na chi ix ch'am, ix utz chkiwach i winaq; chi'ana chi lik ix rak'al i Dios chi nti mak chiwij, tupu ni'pa i je o chiwij chiwach je utz ti laj taq winaq, to' jech' kinojb'al. Xaq yix ix o ni chkixol ike pacha ix chomiq laj taq ch'umil kejuluw pa equm. 16Keje kixtzun ni yix ile chkixol ike are ki'aljinsaj ni tzij chke re k'aslemal chi kpe ru' i Dios. We keje ki'an ile che iwib', yin kink'ix ti uri are kk'un chali i Cristo. Kink'ix taj man k-aljin ni uri chi utz elnaq inchak chixol; to' ti ink'isom incho'ab' che. 17Nti k-ono we xinkamsax ni rumal i to'ik yix, ile xa kikotemal chwe yin. I ukub'ib'al ik'ux yix che i Ajwal, ke'eloq pacha jun sipon chwach i Dios; we xinkamsax yin iwumal, inkamik le ke'eloq pacha kik' oknaq puwi i sipon le. We keje ile kwil na, xa kinkikot ni uri rumal, xaq kwaj yin chi kixkikot ni yix wu'. 18Chixkikotoq, chixkikot ni yix junam wu' yin.

A Timoteo

19We i Ajwal Jesús kuya ni chwe, kwaj kintaq la b'i a Timoteo iwu', keuk'ama utzijol wach i'anom yix. We xinta wach i'anom, mas kkowir ink'ux. 20Nti chik jun chik pacha ire le chi lik junam qak'ux che i qachak; nti chik jun chik chi kk'achir ni chiwe yix. 21Konojel i jub'an, xa are ike ketijin chuch'ob'ik, kkikoj ti retalil che i chak re i Jesucristo. 22Xwiri, yix ya iwilom chik chi a Timoteo utz laj ajchak. Iweta'am chi ire lik kchakun wu', pacha jun ala kchakun ru' uqajaw. Keje ile kojtijin chupaxsaxik i utz laj tzij k'ak' re i Dios. 23Rumali, yin kwaj kintaq la b'i iwu', xwiri k'a kwil na wach k-an ni chwe yin waral. 24Xwiri lik kul ink'ux che i Ajwal chi xaq yin we' kixewila na.

Ma Epafrodito

25Xaq inch'ob'om chi o uchak kintaq chub'i i qachalal chwach i Cristo ma Epafrodito iwu' chi i taqom li chinto'ik. Ire le, lik wachi'il che i chak; lik uya'om ucho'ab' chu'ankil i chak wu' wach i rajwaxik chwe.

26Ire lik kraj chik rilik iwach yix iwonojel. Lik kk'achirik man yix itom utzijol chi iwab' te'eq ire. 27Qatzij, ire lik xuriq jun yob'il, laj xkamik; xwiri i Dios xril tob'al uwach. Xaq xril tob'al inwach yin, man we xkam ire waral, xa kupetsaj jun chik b'is pinwi. 28Rumali, lik kwaj kintaq la b'i iwu' man kuya i kikotemal yix are kiwil tan chik uwach. Xaq keje yin, kpaktaj ni inb'is we x-e iwu'. 29Are kupon iwu', chik'ulaj iwu' ru' ronojel ik'ux xaq chixkikot ru' pacha kraj i Ajwal. Chikojo ni ki'ij konojel i je pacha ire, 30man ire laj xkam chu'anik uchak i Cristo. Xuya rib' chwach i kamik tob'al we are xk'un waral chinto'ik, xolu'ana ik'exel yix ru' ni'pa i rajwaxik chwe yin.

Currently Selected:

Filipenses 2: ACHICUB

Highlight

Compare

Copy